ESTER 9 - Maung a Balita Biblia (PnPV)(PnPV)

Pinatey na saray Judio iray Kalaban da

1[1] Diad kumalabintalon agew na Adar, say agew na igapoy pakayari na samay ganggan na ari,

2[2] saray kalaban da ray Judio so naoput. Tinakotan na amin a totood inerman a pasen iray Judio.

3[3] Diad tuay tua, saray gobirnador na sa ray luyag, saray arum a manoley, tan saray iskriba na ari et impanengneng day panamagalang dad saray Judio, lapud antakot ira ed kinen Mardokeo.

4-5[4-5] Samay ganggan na ari et ginawa ton bantug so ngaran nen Mardokeo ed intiron impirio.

6[6] Diad Susa a manonan siudad, pinatey na saray Judio so liman lasus a totoo,

7-10[7-10] tan inaala da ray kayaryan na saramay inatey. Kaibad saraya so samploran lalakin anak nen Haman ya anak nen Hamedata, sakey a Bugayo tan kalaban na saray Judio: Parsandata, Dalfon, Fasga, Rorata, Barea, Sarbaka, Marmasima, Arofayo, Arsayo, tan Zabotayo.

11[11] Diad saman lamlamang ya agew, nipasabid ari so bilang na saray apatey ed Susa.

12[12] Inkuantod kinen Riyna Ester, Diad Susa labat, liman lasus a totoo so pinatey na saray Judio. Dakdakel ni angangko so pinatey da ed saray luyag. Anto niy labay mo? Ibagam, et iter ed sika.

13[13] Inmebat si Ester, Abuloyan mo komun iray Judio a gawaen da lamet nabwas so ginawa ra natan, Ipabitay mo komun iray bangkay da ra may anak nen Haman.

14[14] Inmabubon so ari tan inabuloyan ton nipanengneng ed karaklan iray bangkay na saramay anak nen Haman.

15[15] Diad kumalabinapat ya agew na Adar, nantitipon lamet iray Judio ed Susa tan pinatey da niy talon lasus a totoo ed siudad. Balet ag da diniwit so kayamanan na saray pinatey da.

16[16] Nantotogyup met iray Judio ed saray luyag tan inyagel day sikaran dili. Pinaandi da ray kalaban da, diad impamatey day labinliman libon totoo diad kumalabintalon agew na Adar, balet ag da diniwit so kayamanan na saray pinatey da.

17[17] Diad kaimbuas, say kumalabinapat ya agew, tinondaan la na saray Judio so nampatey, tan ginawa ran pista na painawa tan panangan iman ya agew.

18[18] Balet say kumalabinliman agew so ginawan pista na saray Judio ed Susa, ta diad kumalabintalo tan kumalabinapat ya agew so impanpatey da tan diad kumalabinliman agew so intonda ra.

19[19] Sikato yay makasengeg a saray Judion manaayam ed saray ankekelag a baley et sisilibraan dan pista so kumalabinapat ya agew na bulan na Adar, say agew a paniiteran day rigalo na kakanen. Balet saray Judion manaayam ed saray ankakabaleg a siudad et sisilibraan da yan pista diad kumalabinliman agew.

Say Pista Na Purim

20[20] Impaisulat nen Mardokeo ed sakey a libro ira yan agawa tan impawit tod amin da ray Judio ed Impirio na Persia, arawi may asingger so kawalaan da.

21[21] Imbaga to a gawaen da ran pista so kumalabinapat tan kumalabinliman agew na bulan na Adar kapag taon.

22[22] Sarayan agew so impamaandi na saray Judio ed saray kalaban da. Nepeg met a saray Judio et silibraan dan pista so intiron bulan, ta sikato yay bulan a nagmaliw a panaon na liket tan gayaga so panaon na ermen tan inkaandiay ilalo. Nibagad sikara a diad sarayan agew mampoponsia tan manliliket ira, tan iitdan da ray kakaaro ra tan saray mairap-bilay na saray rigalon kakanen.

23[23] Kanyan sinumpal na saray Judio iray insulat nen Mardokeo.

24[24] Inkorit nen Mardokeo no panon so impilaban nen Haman ya anak nen Hamedata, ed saray Judio, no panon so impangipaakseb to na ganggan tan impanggawa toy pampapalaranan, pian naamtaan to so agew a pamatey tod sikara,

25[25] tan no panoy inyakar tod ari ta kerewen ton ibitay si Mardokeo. Balet si Haman so nansumpalan na samay maoges a ginetma tod saray Judio; sikato tan saray anak ton lalaki so nibitay ed panagbitayan.

26-28[26-28] Lapud sulat nen Mardokeo, lapud amin ya impanirap da, tan lapud amin ya agawad sikara, inawat na saray Judio so simbawa nen Mardokeo. Ginawa ran totontonen a para sikaran dili, saray kabyangay boleg da, tan siopaman a magmaliw a Judio, a silibraan na manepeg ira yan agew na amin a kailalakan, diad amin a siudad, luyag, tan bansa.

29[28] Nakaukolan ya anggad anggan silibraan na saray Judio ira yan agew na Purim, tan ag da ran balut paolyanan. (Atawag na Purim ira yan agew na pista, ta say purim ed salita ra et kabaliksan toy pampapalaranan.)

30-31[29-30] Insan si Riyna Ester, ya anak nen Aminadab, et kaiba toy Mardokeo a Judio ya angisulat na ginawa ra. Pinaletan na amin a pakayari na riyna iyan sulat a nipaakar ed Purim.

32[31] Binirbir dan duan sikaray akaoley ed inkiletneg na sayan pista tan malet a ginetma ran silibraan da, ya anggan antoy ibayar da. Andi-anggaan ya inletneg nen Ester iyan pista, tan nikorit ed libro iyan opisyal a ganggan to.