1Legan to yan panaon say ari na Babilonia a si Merodac-baladan a lakin anak nen Baladan et nadngelan ton nansakit si Ari Ezekias; kanyan impawitan to na sulat tan rigalo.
2Maliket si Ezekias ya nagawat ed saramay imbaki tan impanengneng ton amin iray kayamanan tosaray pilak tan saray balituk to, saray rikado tan saray pabalingit to, tan amin a kagawaan na saray sondalo. Anggapoy ag to impanengneng ed sikara a bengatlan walad saray kuarton panagsinupan odino walad anggan iner a pasen na nanarian.
3Insan linmay propita Isaias ed kinen Ari Ezekias tan tinepet to, Iner so nanlapwan na sarayan totoo tan antoy kuandad sika?
Inmebat si Ezekias, Nanlapu rad Babilonia ya arawdawin bansa.
4Antoy anengneng dad palasio? tepet nen Isaias.
Anengneng dan amin. Anggapoy ag ko impanengneng ed sikara a bengatlan walad saray kuarton panagsinupan, ebat nen Ezekias.
5Insan inkuanen Isaias ed ari, Ibabaga na Katawan a Makapanyarin-amin ya
6onsabiy panaon a naawit ed Babilonia iray amin a bengatlan walad palasio tan amin a tinitipon ya anggad natan na saray lalakim. Anggapoy bengatlan nakeraan.
7Wala ray pigaran kakanayon mo a naala tan magmaliw iran yunuko a manlingkur ed palasio na ari na Babilonia.
8Say atalusan nen Ari Ezekias a kabaliksan to ya et say kiwala na kareenan tan kaandi na kaatapan legan na pambilay to, kanyan inmebat, Maung so imbagam ed siak a salita na Katawan.
Who We AreWhat We EelieveWhat We Do
2025 by iamachristian.org,Inc All rights reserved.
