JUDIT 13 - Maung a Balita Biblia (PnPV)(PnPV)

1Diad kaonuran, nen aralem lay labi, nampatanir la ray sangkaili tan tinmaynan la ra. Inkaput nen Bagoas imay tulda diad paway tan ag to inabuloyan ya onloob iray aripen nen Holofernes. Kanyan inmogip la ran amin; naknaksawan iran amin lapud abayag imay ponsia.

2Atilak a bukor ed dalem na tulda si Judit a kaiba toy Holofernes ya akarokul ya abuek ed katri to.

3Manaalagar ed paway na tulda imay biin aripen nen Judit, ta onlay Judit a mampikasi a singa gagawaen to kapag labi. Imbaga met nen Judit ed kinen Bagoas ya ompaway a mampikasi onung na gendat a gagawaen to.

4Andi lad man natan iray amin a sangkaili tan aripen, tan bukbukor la nen Holofernes tan si Judit ed dalem na tulda. Nanalagey si Judit ed abay na katri nen Holofernes tan nampikasi, O Katawan a Dios a Makapanyarin-amin, tulongan mo ak pad sayan ngalngalik la gawaen a pakagalangan na Jerusalem.

5Natan so panaon a pangyagel mod saray pinilim a totoo tan panulong mod siak a manumpal na planok a mamatey ed saray kalaban a manataktakot ed sikami.

6Linmay Judit ed lusek na katri diad abay na olo nen Holofernes tan inala toy akasabit ya ispada nen Holofernes.

7Inmasingger, inegnaan toy buek na olo nen Holofernes, tan kuanto, O Katawan a Dios na Israel, itdan mo ak pa natan na biskeg.

8Insan inyatagey nen Judit imay ispada tan sinigbat ton amidwa so beklew nen Holofernes diad anggaay nayarian to, et apotut so olo to.

9Intolin nen Judit so kabalgan nen Holofernes, inyepas tod katri, tan inala to may moskitiro ed saray lusek na katri. Insan pinmaway tan inter tod aripen to imay olo nen Holofernes,

10insan inkarga na samay aripen ed supot a pananginay kakanen.

Pinmawil ed Betulia si Judit tan samay Aripen to

Insan tinmaynan ira may duaran bibii, a singa gagawaen da lawas no onla ran mampikasi. Kayariy indalan dad kampo na Asiria, binmeltang irad patar tan kinmalab irad alusadsar na palandey, anggad asabi ray puirta na Betulia.

11Nen asingger la ra, kinmulyaot si Judit ed saray guardiad puirta, Lokasan yoy puirta! Lokasan yoy puirta! Wala nid sikatayo so Dios tayo. Impanengneng to lamet ed Israel so biskeg to tan inkana toy pakayari to sumpad saray kalaban tayo.

12Nen nadngel na saray lalaki so bosis to, nangganat iran inmakseb ed saray puirta tan tinawag da ray opisyal na baley.

13Binmatik iran amin ed puirta, matakken may ogaw. Anggapoy makapanisia a pinmawil si Judit. Nilokasan day puirta a looban nen Judit tan say aripen to tan malikeliket iran angawat ed sikara. Insan nen akaselsel la ray apoy pian walay daiset a liwawa tan akamokut la rad saramay duara,

14inmeyag si Judit, Idayew yoy Dios, idayew yo! Idayew yoy Dios ya ag to insiblet so panangasi tod saray totood Israel. Natad sayan labi, inkana to ak a mamatey ed saray kalaban tayo.

15Insan to inalad samay supot na kakanen so olo tan impanengneng tod saray totoo. Inkuanto, Nia so olo nen Holofernes, say pangulo na saray sondalo da ray taga Asiria, tan niay moskitiro a nanlapud katri to a dinokulan to nen mapalaloy inkabuek to. Inkana na Katawan so sakey a biin mamatey ed sikato.

16Diad ngaran na Katawan a mabilay, sasambaan ko ya ag ak balut naakdulan nen Holofernes, anggaman a pinalikdo na gangganak tan sikatoy makasengeg na impatey to. Ag ak arotakan onung ed ganggan odino naplag ed kababaingan; inasikaso ak na Katawan.

17Nikelawan a tuloy ya amiy totoo ed siudad. Timwek ira, inggalang day Dios, tan nambabansag iran nampikasi, O Dios mi, manepeg kan idayew. Nampalabo ka natan ed saray kalaban da ray totoom.

18Insan inkuanen Uzias, Pinablin Judit, say Sankatageyan a Dios et binindisionan to ka na mapalalo nen saray arum a bibii diad tapew na dalin. Manepeg ya idayew so Katawan a Dios ya amalsad tawen tan dalin! Inwanwan to ka nen pinotut moy olo na sankaruksaan a kalaban tayo.

19Ag balut nalingwanan na saray mangibabawag na pakayariy Dios so panagmatalek mod Dios.

20Itdan ka komun na Dios na andi-anggaan a kagalangan, lapud sayan ginawam. Tumangan to ka komun na saray bindision lapud nansiansia kan matoor ed sikato tan ag mo kinawanan ya impostay bilay mo, pian naekal so kairapan ed saray totoom.

Inmebat ya amin iray totoo, Amen, amen!