SIRAC 4 - Maung a Balita Biblia (PnPV)(PnPV)

1Anak, ag mo sesebelan iray mairap-bilay ed pakalmoan da, odino panalagaren irad pankaukolan da.

2Ag ka manggagaway antokaman a makasengeg na isumlang odino pamasnukan na toon narasan.

3Ag mo aaruman iray gunigon na toon naandian lay ilalo. No sikatoy walad pankaukolan, ag mo isisiblet so pakatulong mod sikato.

4-5Ag mo isisiblet so pakatulong mod mipapayabol a mapalaloy kakairapan to. Ag mo ibebeneg so toon mairap-bilay odino itdan moy makasengeg na pangisambaan tod sika.

6No mapalaloy pakapasnuk tod sika tan isamba to ka, dengelen na Manamalsa so pikakasi to.

7Pagmaliw moy sikan dili a bantug ed sinagoga. Tuek ka ed saray totoon walad pakaoley.

8Dengel kad labay a salitaen na saray mairap-bilay, tan ebatan mo ra na marakep.

9Iyagel mo ray totoo ed saray malabay a manggaway makapoy ed sikara, tan nepeg a malet so panagsintinsiam.

10Magmaliw kan singa ama ed saray olila, tan itdan mo na tulong iray balo, say tulong ya ag la niiter ed sikara na saray kaasawaan da. Diad ontan magmaliw kan singa sakey a lakin anak na Sankatageyan, tan aroen to ka ya alabas nen say pangaaro na dilin inam.

Sakey a Bumabangat so Kakabatan

11Aasikasoen na Kakabatan iray manaanap ed sikato; pagmamaliwen to ran matalonggaring.

12Say pangarod Kakabatan et pangarod bilay, tuan liket so ibangon a masakbay a pananap ed Kakabatan.

13Napagalangan na baleg so siopaman a makagamur na Kakabatan. Inermay laen to, bindisionan na Dios.

14Aripen na samay Masanto iray aripen na Kakabatan, tan inaro na Katawan so balang sakey ya inaro toy Kakabatan.

15Mangiter na saray dugan sintinsia iray mangoonur ed Kakabatan; peteg ya arawid kaatapan iray mangiimano ed Kakabatan.

16Manmatalek kad Kakabatan, et nakayaryan mo tan nipatawir mod saray kabyangay boleg mo.

17Diad onona, iwanwan ka na Kakabatan ed saray mairap a dalan. Taktakoten to ka na mapalalo, et abaloan mo ya ag mo nayariay ontuloy. Mapalalon sulit na kairapan so kakaukolan na panametek na Kakabatan, tan suboken to ka na saray labay ton pagawa ya anggad sigput to ka lan napanmatalkan.

18Insan ag manabalan onsingger ed sika, ipaamta to ray iyaamut to, tan paliketen to ka.

19No onarawi ka ed dalan, ikaindan to ka tan paolyan to ka ed dilin kaderalan mo.

Say Panagmatalek ed Sikan dili

20Anamut mo ray pankanawnawam, balet alwaran moy sikan dili sumpad kaogsan. Ag mo memelagmelagen so sikan dili.

21Kanepegan na panagpaabeba so galang tan tanduro, balet say abeba a panangipasen mod sikan dili et iwanwan to ka ed kasalanan.

22Ag mo aabuloyan a nagawad sika so labay na saray arum a totoo no pakaderalan mo; ag mo dederaley sikan dili diad panamegley na pangisukom na saray kanepegan mo.

23Ag mo panduaduaruwaan so mansalita no nakaukolan. Ag mo iyaamut so kakabatan mo.

24Nakabatan labat so kakabatan tan aral mo diad panamegley na ibabagam.

25Balet ag ka onsusumlang ed katwaan, tan ag mo lilingwanan ya ag mo amtay amin a bengatla.

26Ag ka ombabaing a mangipatwa na saray kasalanan mo; anggapoy kakanaan na pamaer na iyaagos na ilog.

27Ag mo aabuloyan a naoleyan ka na toon makulang-kulang odino kilingan mo ray totoon bibirbiren.

28Talindegan mo so kaptaken, anggan makasengeg na pateyan mo; migampi so Katawan a Dios ed sika.

29Ag ka magangganat a mansalita odino onngingiras tan mapaolyan ed kimey mo.

30Ag ka singa lion ed abung odino mainap ed saray aripen mo.

31Ag mo iyoonat so limam a mangala na bengatla no matiwer ka no onsabiy panaon a pambayar mo.