Salmo 42 - Maung a Balita Biblia (PnPV)(PnPV)

KUMADWAN LIBRO(Saray Salmo 42—72)Say Pikakasi na Toon Nibantak ed Arum a Bansa

1No panoy pampipirawat na ulsa ed ambetel a danum na kolus,

ontan met so pampipirawat kod sika, O Dios.

2Pampilpilalekan ta ka, say Dios a mabilay.

Kapigay pakaonlak ed arap mo a mangigalang ed sika?

3Agew-labin manakakis ak,

tan saray luak labat so pambibilay ko;

saray kalaban ko et pitepet da,

Iner so kawalaay Dios mo?

4Onsasakit so pusok kapag nanununotan ko ray agawa nen saman,

nen kaibak iray karaklan a linmad abung na Dios,

tan inwanwan ko rad panaakar da;

malikeliket iran mankankanta tan maneeyag na dayew ed Dios.

5Akin et onya lay paneermen ko?

Akin et mapalaloy kagugunigon ko?

Say Dios so panilaloan ko,

tan sikato lamet so idayew ko,

say manangilaban ko tan Dios ko.

6-7Diad bansa a nibantakan ko onsasakit so pusok,

kanyan sikatoy nanununotan ko.

Tinabunan to ak na saray daluyon na kaermenan;

pinadalanan to ak na delap na gewgew,

a singa manungol a danum a napepelag ed Jordan

manlapud saray Palandey na Hermon tan Mizar.

8Say Katawan ipanengneng to komun no agew so ag mangoman a panangaro to,

pian makapankanta ak no labi,

kantan pampikasik ed Dios na bilay ko.

9Ibabagak ed Dios a manangyagel ko,

Akin et nilingwanan mo ak?

Akin et siansiay paniirap ko

lapud inkaruksa da ray kalaban ko?

10Makapkapoy ak lad panagpabaing da,

ta tepet la ran tepet ed siak,

Inter so kawalaay Dios mo?

11Akin et onya lay paneermen ko?

Akin et mapalaloy kagugunigon ko?

Say Dios so panilaloan ko,

tan sikato lamet so idayew ko,

say manangilaban ko tan Dios ko.