1Onsabiy agew a saray totoo mankanta ra:
Idadayew ta ka, Katawan!
Mamapasnuk kad siak nen saman,
balet natan liligliwaen mo ak tan
ambetel lay olom ed siak.
2Say Dios so manangilaban ko;
manmatalek ak ed sikato, et ag ak antakot.
Say Katawan iitdan to ak na pakayari tan biskeg;
sikatoy manangilaban ko.
3Onung a say ambetel a danum et
mangiiter na liket ed saray totoon napgaan,
ontan met a saray totoo na Dios
et manliket ira no ilaban to ra.
4Onsabiy agew a saray totoo ikanta ra,
Misalamat kayod Katawan!
Kerew kayod sikaton tulongan to kayo!
Ibaga yod amin a bansa iray ginagawa to!
Ibaga yod sikara ya ontan lay inkatalonggaring to!
5Kantaan yoy Katawan, lapud saray ginagawa ton matalonggaring.
Ipaamta yo ya ed sankamundoan.
6Maneyag tan mankanta kayod liket, sikayon manayam ed Sion!
Matalonggaring so masanton Dios na Israel,
tan manaayam ed kawalaan da ray totoo to.
Who We AreWhat We EelieveWhat We Do
2025 by iamachristian.org,Inc All rights reserved.
