AGGEO 1 - Maung a Balita Biblia (PnPV)(PnPV)

Say Ganggan na Katawan

ya Ipaalagey lamet so Timplo

1Diad ononan agew na kumanem a bulan na kumadwan taon na panaari nen Dario ed Persia, say Katawan nansalita diad panamegley nen propita Aggeo. Say sinalita na Katawan et para si Zorobabel a gobirnandor na Juda tan lakin anak nen Sealtiel, tan para si Josue a Pangulon Pari tan lakin anak nen Josadac.

2Say Katawan a Makapanyarin-amin inkuantod kinen Aggeo, Ibabaga na sarayan totoo ya aliwan sikato ya niy manepeg a panaon a pamaalagey lamet ed Timplo.

3Insan inkuan na Katawan ed saray totoo diad panamegley nen propita Aggeo,

4Totook, akin et manaayam kayod mararakep ya abung, balet palpaolyan yon aderal-deral so Timplok?

5Ag yo ta nanaimanoy nagagawad sikayo?

6Nantanem kayoy dakerakel, balet dagdaiset so naani yo. Walay nanaakan yo, balet ag kayo napepesel. Walay nanainom yon alak, balet ag kayo napepenek! Walay ikakawes yo, balet ag napepetangan so laman yo. Ag makagenap a pambilay so nanaanap da ray kumikimey a miuupa.

7Ag yo amtay makasengeg no akin onyay nagagawa?

8Laka yo lad kapokdulan ta mangala kayoy kiew, tan ipaalagey yo lamet so Timplo; diad satan siak so napaliket tan nagalang ak onung na manepeg a kigalang ko.

9Nanilalo kayon makaani na dakerakel, balet dagdaiset so naani yo. Et nen insempet yo ray naani yo intitikyab ko ra. Akin et onmay ginawak? Lapud apaolyan ya aderal-deral so Timplok; inarap yon kikimeyan so dilin kaabungan yo.

10Sikato yay makasengeg ya anggapoy onterter ya oran tan anggapoy ontubon tanaman.

11Anggapoy pateterteren kon oran ed dalindiad kapokdulan, diad kaalogan, diad kaubasan, tan diad kaolibaandiad amin a tanaman ed dalin, diad saray totoo tan saray ayayep, tan diad amin a bengatlan labay yon pabalegen.

Tinmoluk ed Ganggan na Katawan

iray Totoo

12Insan si Zorobabel, tan si Josue, tan amin da ray totoon sinmempet a nanlapud inkibantak ed Babilonia inonur day imbagad sikara na Katawan a Dios da. Tinmakot ira tan inonur day propita Aggeo ya ibabaki na Katawan.

13Insan sinalita nen Aggeo ed saray totoo so impaibagad sikato na Katawan: Siak so nakaiba yosatan so sipan ko.

14Pinabiskeg na Katawan so linawa na balang sakey ed sikara a mangipaalagey lamet ed Timplo: si Zorobabel a gobirnador na Juda; si Josue a Pangulon Pari, tan amin a totoon sinmempet a nanlapud inkibantak dad arum a bansa. Inggapo ray impankimey da ed Timplo na Katawan a Makapanyarin-amin a Dios da,

15nen kumaduamplo tan apat na kumanem a bulan na kumadwan taon na panaari nen Dario.