1 SAMUEL 5 - Maung a Balita Biblia (PnPV)(PnPV)

Say Kaban na Sipanan diad Filistia

1Kayarin asamsam na saray Filisteo so Kaban na Sipanan na Dios, manlapud Ebenezer inyakar dad siudad dan Asdod.

2Inawit dad dalem na timplo na dios dan Dagon, tan inyan dad abay na talintao to.

3Diad kabkabwasan na ontombuk ya agew anengneng na saray taga Asdod a say talintao nen Dagon et atumban tikleb diad arap na Kaban na Sipanan na Katawan. Impaalagey da sirin tan impawil dad pasen to.

4Diad kabkabwasan ed ontombuk ya agew anengneng da a say talintao et atumba lamet a tikleb diad arap na Kaban na Sipanan. Nakal natan so olo to tan saray taklay to, tan wala rad pasen a mamaarap ed puirta; atilak so kabalgan labat. (

5Kanyan anggad natan saray papari nen Dagon tan saray manangigalang ed sikato diad Asdod et luluksoan da man a pasen tan ag da gagatinan.)

6Mapalaloy impanusa na Katawan ed saray taga Asdod, tan pinatakot to ra. Dinusa to ra tan saray totood kaliber-liber dan pasen diad panamegley na inkapelpelsaan da.

7Nen anengneng day nagagawa, inkuanda, Say Dios na Israel et dudusaen to itayo tan say dios tayon Dagon. Ag tayo la nayarin panayamen dia tay Kaban na Sipanan.

8Angibaki ra sirin na manawag ed amin da ray limaran arari na saray Filisteo! Nen atipon la ran lima, tinepet dad sikara, Antoy gawaen tayo ed Kaban na Sipanan na Dios na Israel?

Inmebat ira, Iyakar yod Gat. Kanyan inyakar dad Gat, sakey a siudad ed Filistia.

9Balet kasabi tod man, dinusa met na Katawan iman a siudad, tan ginewgew ton maung iray totood man. Dinusa to ra diad panamegley na inkapelpelsaan na amin a totood siudad, mamataken man o mamalangwer.

10Kanyan impaiyakar day Kaban na Sipanan ed siudad na Ecron. Kasabi tod man, ineyag na saray totoo, Inyakar da diay Kaban na Sipanan na Dios na Israel a mamatey ed sikatayon amin!

11Kanyan angibaki ra lamet na manawag ed amin da ray limaran arari na Filistia. Nen atipon la ran lima, inkuanda, Iyakar yoy Kaban na Sipanan na Dios ed pasen ton dili, pian ag to tayo patayen tan saray pamilya tayo. Walay gewgew ed intiron siudad, ta dudusaen iran maung na Dios.

12Anggan saray totoon ag inatey et apelpelsaan ira, tan inmakis iran kinmerew na tulong ed saray diriyos da.