JOB 29 - Maung a Balita Biblia (PnPV)(PnPV)

Say Kaonuran Ya Impangibalikas nen Job na Katonungan To

1Nansalita lamet si Job:

2Komun ta napapawil ira may agew a linmabas,

nen bambantayan ak na Dios!

3Say Dios wala lawas ed siak nen saman;

nen manaakar ak ed bilonget inantabay to ak na liwawa.

4Nen saraman ya agew maaligwas so bilay ko,

tan say pikakaaro na Dios inyagel toy ayaman ko.

5Wala nid saman ed siak so Dios,

tan siber-siber ed abay ko iray anak ko.

6Maniiter nen saman na daakan a gatas iray bakak tan saray kanding ko,

tan saray kiew na olibak mabonabona ra anggan saray walad kabatowan.

7No mantitipon nen saman iray mamasiken na siudad,

et siak met lad satay mikasakey ed sikara,

8mankalkalna met lan onoyus iray tobun-balo no kanengneng dad siak,

tan nagsialagey iray pangulo na saray totoo.

9Ontondan mansalita iray pangulo na saray totoo;

10namemet iray anggan manonan totoo.

11Balang sakey ya akanengneng ed siak odino akadngel na nipaakar ed siak

et maabig so nibaga ra nipaakar ed saray ginagawak.

12Tinutulongan ko ray mairap-bilay ya inmeey-ey;

tinutulongan ko met iray olila a solingsoling.

13Indadayew ak na saray sankapangaskasiyay kipapasen,

tan pinaligen koy bilay da ray bibiin balo.

14Ginawak lawas so anggaay nayarian ko a manumpal na kaptekan tan katunongan.

15Nagmaliw ak a mata da ray bulag,

tan sali da ray lopuy.

16Singa ak ama ed saray mairap-bilay,

tan akigampi ak ed saray sangkailin walay gunigon.

17Dinederal koy pakayari da ray maruksan totoo

tan inyaagel ko ray papairapen da.

18Inilaloan ko a mambilay ak na andokey

tan ompatey ak a maliket ed abung.

19Singa ak kiew a kinmayamkam ed danum iray lamut to,

tan kapag labi binasa na linaew iray sanga to.

20Indadayew ak nen saman na amin a totoo,

tan nansiansia lawas so biskeg ko.

21Nen naniiter ak na simbawa, marereen iray totoo

tan marengerengel irad saray ibabagak;

22anggapo lay niarum da no kasumpal kon manimbawa.

Saray salitak sinmepsep ed muling da a singa oran ed dalin;

23maliket iran amin ya angawat

a singa saray dumaralus a maliket a mangawat na oran no tiagew.

24Iniimisan ko ra nen kinmakapoy so linawa ra;

binmiskeg so linawa ra nen anengneng day masayaksak a lupak.

25Nagmaliw ak a pangulo tan imbabagak so nepeg dan gawaen;

inwawanwan ko ran singa panangiwanwan na ari ed saray sondalo to,

tan nililigliwak ira nen maermen ira.