ESDRAS 3 - Maung a Balita Biblia (PnPV)(PnPV)

Ginmapo lamet so Panangigalang

1Nen asabiy kumapiton bulan, manaayam lad saray baley da iray Israelita. Insan nantitipon iran amin ed Jerusalem.

2Si Josue a lakin anak nen Josadac, saray kapara ton papari, tan si Zorobabel a lakin anak nen Salatiel tan saray kakanayon to et impaalagey da lamet so altar a para Dios na Israel, pian napampoolan da na saray bagat onung na nisulat ed Ganggan nen Moises a too na Dios.

3Anggaman ya antakot irad saray arum a totoon manaayam ed saman a dalin, impaalagey da lamet so altar ed pasen ton gendat. Insan ginapwan da lamet so nampool ed tapew na altar na saray kinabwasan tan nilabin bagat.

4Sinilibraan da so Pista na saray Abung-abung onung ed saray totontonen a nisulat, tan kapag agew angisaklang ira na saray bagat a nakaukolan ed saman ya agew.

5Niarum ed sarayan bagat so inagew-agew ya isasaklang iran bagat a popoolan, saray bagat ya isasaklang no Pistay Balon Bulan, saray bagat kapag mantitipon ira a mangigalang ed Katawan, tan saray bagat a manlapud mabulos a linawa ya isasaklang na saray totoo ed Katawan.

6Ag ni inggapo na saray totoo so pangipaalagey lamet ed Timplo; anggaman ontan ginapwan da lad ononan agew na kumapiton bulan so mangisaklang ed Katawan na saray bagat a popoolan.

Nigapo so Impangipaalagey Lamet ed Timplo

7Angiiter iray totoo na kuartan ibayar ed saray kantiro tan saray karpintiro; angiiter met ira na saray kakanen, iinomen, tan larak na oliba ya ipapawit dad siudad na Tiro tan Sidon, a sikaray kasalat ira na saray kiew a sidro a manlapud Libano, ya ipaanur irad dayat ya anggad Joppe. Agawa ra yan amin diad impangyabuloy nen Impirador Ciro na Persia.

8Kanyan diad kumadwan bulan ed kumadwan taon manlapud samay insabi rad kawalaan na Timplo na Katawan diad Jerusalem, inggapo ray kimey. Nantutulongan a nankimey ira di Zorobabel, Josue, saray amin a kakanayon da, saray papari, tan saray Levita. Diad tuay tua tinmulong ya amin iray Israelitan pinmawil ed Jerusalem. Nipasen a makaoley ed amin a kimey ed Timplo iray amin a Levitan mantaon na duamplo a mampaatagey.

9Kanyan natutulongan ya angipangulod kimey ed Timplo si Jesua a Levita tan saray anak tan kakanayon to, tan si Cadmiel tan saray anak to (a kabyangan iray boleg nen Hodavias) (Tinulongan ira na saray Levitan kabyangay boleg nen Henadad.)

10Nen ginapwan da la iletneg so pundasion na Timplo, linmad pasen da iray paparin akasulong na saray kawes da tan akabemben ira na saray trumpita. Wadman met iray Levitan kabyangay boleg nen Asaf tan akabemben ira na saray piangpiang. Indayew day Katawan onung ed saray bilin ya impaakseb nen Ari David.

11Nankakanta ra a pangidayew tan pisalamat dad Katawan. Inolit-olit dan kinanta yan parti na kanta:

Maung so Katawan tan say ag mangoman a panangaro tod Israel et andi-anggaan.

Inmeyag so balang sakey na anggaay nayarian to; indayew day Katawan lapud nigapo lan niletneg so pundasion na Timplo.

12Dakel ed saray mamatakken a papari, Levita, tan pangulo da ray boleg so akanengneng ed samay inmonan Timplo, et nanakis iray maksil legan ya ipapaletneg so pundasion na sayan Timplo. Balet naneeyag ed liket iray arum a wadman.

13Anggapoy makapangibaga no dinay eyag na liket odino dinay eyag na akis, lapud diad ontan lan kasil na eyagan narengel ed arawi.