1Kanyan say ari tan si Haman et linma ran mirongo ed kinen Ester
2a pidwa. Nen oniinom iray alak, tinepet na ari ed kinen Ester. Natan, Riyna Ester, antoy labay mo? Ibagam ed siak et iter kod sikay anggan kapaldua na nanarian.
3Inmebat si Riyna Ester, No labay na Kagalang kon Ari ya ipagamur so mugmon kerew ko, say pilalek ko et say pakapaliis ko tan saray totook ed patey.
4Saray totook tan siak et nilako kamin pateyen. No nilako kamin aripenen labat komun, andi bali la; ag ak la komun onesel, tan ag ta ka la sigensigenen nipaakar ed saya. Balet ngalngali da kami la pateyen, paandipaten!
5Insan tinepet nen Ari Asuero ed kinen Riyna Ester, Siopay makatepel a manggawa na ontan? Kawalaan to tan a too?
6Inmebat si Ester, Say kalaban mi et sayan toon maoges tan managpairap ed sikamisi Haman!
Asabyan na baleg a takot si Haman diad arap na ari tan say riyna.
7Inmalagey so ari a mapalaloy petang na olo to, pinmaway ed kuarto, tan linmad tanamanan na palasio. Atalusan nen Haman ya andi-duaruwan dusaen na ari lapud saya, kanyan tinmilak ta kerewen tod Riyna Ester ya ag la komun napatey.
8Nen pinmawil ed kuarto so arin nanlapud tanamanan, katiktikleb nen Haman ed yurongan a kawalaan na riyna. Diad impakanengneng na ari ed saya, inmeyag, Sayan laki et pasooten to met so riyna ed arap ko, diad dilin loob na palasio?
Ag ni asumpal so arin mansasalita, nen kinobutan la na saray yunuko so olo nen Haman.
9Insan inkuan na sakey ed saray yunuko a si Harbona, Si Haman nampagawa ni ingen diad abay na abung to na panagbitayan a pamitayan tod kinen Mardokeo, samay toon angilaban na bilay na Kagalang min Ari. Duamplo tan talon mitro so kaatagey to!
Ibitay yod man si Haman! inganggan na ari.
10Kanyan nibitay si Haman ed panagbitayan ya impagawa ton para si Mardokeo. Insan kinmepa so pasnuk na ari.
Who We AreWhat We EelieveWhat We Do
2025 by iamachristian.org,Inc All rights reserved.