SARAY ARARI 14 - Maung a Balita Biblia (PnPV)(PnPV)

Si Ari Amasias na Juda(2 Awa. 25:1-24)

1Nen kumadwan taon na panaarid Israel nen Jehoas a lakin anak nen Joacaz, nagmaliw ya arid Juda si Amasias a lakin anak nen Joas.

2Ginmapon nanoley nen mantaon na duamplo tan lima tan nanayam ed Jerusalem legan ton nanoley a duamplo tan siam a taon. Si Joadan a taga Jerusalem so ina to.

3Ginagawa toy makapaliket ed Katawan, balet ag to aparaan si laki ton Ari David; ingen ginawa toy ginagawa nen Joas ya ama to.

4Ag to dineral iray paganon pasen a panangigalangan, kanyan intuloy na saray totoo so nambagat tan nampool na insinso ed saraman a pasen.

5Nen malet lad lima nen Amasias so pakaoley, pinatey to ra may opisyal ya amatey ed kinen ama ton ari.

6Balet ag to pinatey iray anak da, no ag ingen tinombuk toy ibabagay Katawan onung ed Ganggan nen Moises: Ag nepeg a pateyen iray atateng, lapud saray kasalanan a ginawa na saray anak da, tan ag nepeg a pateyen iray anak, lapud saray kasalanan a ginawa na saray atateng da; nepeg a pateyen so sakey a too, lapud kasalanan a ginawa ton dili.

7Pinatey nen Amasias iray samplon libo ya Edomitan sondalo diad Patar na Asin; diad bakal dinakep toy siudad na Sela, insan tinawag to na Jokteel, say ngaran ya ag ni naoman ya anggad natan.

8Angibakiy Amasias na totoo to ed kinen Ari Jehoas na Israel, ta pasasagyat ton mibakal.

9Balet onyay ebat nen Ari Jehoas: Aminsan, idad Palandey na Libano, impaikuan na masabit a kiew ed kiew a sidro: Ipaasawam so anak mo ed anak ko. Insan dinmalan so sakey ya ayep ed katakelan tan ginatinan to may masabit a kiew.

10Natan sika, Amasias, tinalom la ray Edomita, kanyan mapaatagey ka la. Panliketan mo la tay inkabantug mo tan ditan ka lad nanarian mo. Akin et mangigagapo ka niy golo a pakaderalan mo tan saray totoom?

11Balet ag dinmengel si Amasias, kanyan kinmurang si Ari Jehoas tan saray totoo to, insan nilabanan day Ari Amasias diad Bet-semes na Juda.

12Atalo iray sondalo nen Amasias, kanyan batik iran amin a sinmempet.

13Inawit nen Jehoas ya adakep si Amasias, tinmuloy ed Jerusalem, insan gineba toy padir na siudad manlapud Puirta na Efraim ya anggad Puirta na Suyok, a sanlasus tan siamaplon mitroy karokey to.

14Inala ton amin iray balituk tan pilak a nalmo to, amin a kagawaan ed timplo tan amin a kayamanan ed palasio, insan inawit to ran amin ed Samaria. Angawit met na saray totoon pamasengegan toy panumpal na labay ton nagawa.

15Nisulat ed libron Say Awaran da ray Ararid Israel iray arum nin ginagawa nen Jehoas, pati say inkasebeg ton akibakal ed kinen Ari Amasias na Juda.

16Inatey si Jehoas, nipompon ed kamposanto da ray arari diad Samaria, insan sinmalat ed sikaton nanari si Jeroboam ya anak ton laki.

Say Impatey nen Ari Amasias na Juda(2 Awa. 25:25-28)

17Nambilay ni na labinlimay taon si Ari Amasias na Juda kayariy impatey nen Ari Jehoas na Israel.

18Nisulat ed libron Say Awaran da ray Ararid Juda iray arum nin ginagawa nen Amasias.

19Diad Jerusalem walay komplut a pamatey ed kinen Amasias, kanyan batik si Amasias ed siudad na Lakis, balet tinombuk diman na saray kalaban to, insan da pinatey.

20Nilogan ed beneg na kabayo so bangkay nen Amasias nen nipawil ed Jerusalem, tan nipompon ed kamposanto da ray arari diad Siudad nen David.

21Insan saray totoo ed Juda kinoronaan dan manari so lakin anak nen Amasias a si Uzias a mantaon na labinanem.

22Abawi nen Uzias so baley na Ela tan pinasimbalo to yan impaalagey kayari na impatey nen ama to.

Si Ari Jeroboam na Israel

23Nen kumalabinliman taon na panaarid Juda nen Amasias a lakin anak nen Joas, nagmaliw ya ari na Israel si Jeroboam a lakin anak nen Jehoas, tan nanayam ed Samaria legan ton nanoley ya apataplo tan sakey a taon.

24Nanggagaway kaogsan sumpad Katawan; inalig toy impankasalanan nen Ari Jeroboam a lakin anak nen Nebat, say arin nilagnat ton nankasalanan so Israel.

25Abawi to ray dalin a sakop na Israel, manlapud Dalan na Hamat diad baybay ya anggad Inatey a Dayat diad abalaten. Sikato yay insipan na Katawan, say Dios na Israel, diad panamegley na aripen ton propita a si Jonas a lakin anak nen Amitai a taga Gat-hefer.

26Anengneng na Katawan so makapasinagem a paniirap na saray Israelita; anggapon balut so ontulong ed sikara.

27Balet aliwan getma na Katawan a deralen a sigput tan andi-anggaan so Israel, kanyan inyagel to ra diad panamegley nen Ari Jeroboam.

28Nisulat ed libron Say Awaran da ray Ararid Israel iray arum nin ginagawa nen Jeroboam, say inkasebeg tod saray bakal, tan no panon ton apapawil ed Israel iray baley na Damasco tan Hamat.

29Inatey si Jeroboam, nipompon ed kamposanto da ray arari, insan sinmalat ed sikaton nanari si Zacarias a lakin anak to.