2 SARAY AWARAN 25 - Maung a Balita Biblia (PnPV)(PnPV)

Si Ari Amasias na Juda(2 Ar. 14:2-6)

1Nagmaliw ya ari si Amasias nen mantaon na duamplo tan lima, tan nanoley ed Jerusalem na duamplo tan siam a taon. Si Joadan a taga Jerusalem so ina to.

2Ginagawa toy makapaliket ed Katawan, balet aliwan maseseg ed saya.

3Nen malet lad lima nen Amasias so pakaoley, pinatey to ra may opisyal ya amatey ed kinen ama ton ari.

4Balet ag to pinatey iray anak da, no ag ingen tinombuk toy ibabagay Katawan onung ed Ganggan nen Moises: Ag nepeg a pateyen iray atateng, lapud saray kasalanan a ginawa na saray anak da, tan ag nepeg a pateyen iray anak, lapud saray kasalanan a ginawa na saray atateng da; nepeg a pateyen so sakey a too, lapud kasalanan a ginawa ton dili.

Say Impibakal na Juda ed Edom(2 Ar. 14:7)

5Tinogyup nen Amasias iray amin a lalaki ed saray tribu di Juda tan Benjamin tan impagmaliw to ran pigaran grupoy sondalo onung na nanlalapwan dan boleg. Angipasen na saray opisyal ed saray sanlilibo tan saray sanlalasus a totoo. Talon lasus libo ran amin a sondalo, tan duamplo a mampaatagey so taon da. Pinili ra yan sondalo, akaparaan iran mibakal, tan marunong iran mangikanay pika tan samper.

6Likud ed sarayan sondalo to, angupa ni na sanlasus libon sondalo na Israel. Apatiran toniladan pilak so inyupa to.

7Balet sakey a propita so linmad kinen Ari Amasias tan kuantod sikato, Ag mo pipilaen ira yan Israelitan sondalo. Ag kaiba na Katawan ira yan totoon taga Baybay a Nanarian.

8Abaloan mo amon napabiskeg kan mibakal no kaibam ira, balet ipatalo ka na Dios ed saray kalaban mo. Walad sikatoy pakayari a panaloen odino ipatalo ka.

9Tinepet nen Amasias ed samay propita, Antoy gawaen kod samay imbayar kon pilak ed sikara?

Inmebat imay propita, Nayarian na Dios ya ipawil ed sika so masoluk ni nen say saman!

10Pinasempet la sirin nen Amasias ira may inupaan ton sondalo. Lapud saya sinmempet iran mapalaloy pasnuk da ed saray taga Juda.

11Pinabiskeg nen Amasias so linawa to tan impangulo to ray sondalo to a linmad Patar na Asin. Diman ira nambabakal et akapatey ira di Amasias na samplon libon Edomitan sondalo

12tan akadakep ira na samplon libo. Inyakar da ra yan adakep da ed tambib na kelas ed siudad na Sela insan da ra intutulak. Kanyan inaatey iran amin ed tapew na saray baton ankakabaleg ed leksab.

13Legan to ya, saramay sondalon taga Israel ya ag ira impila nen Amasias ed bakal et dinogpaan da ray siudad na Juda a wala rad nanleetan na Samaria tan Bet-horon. Akapatey ira na talon libon lalaki, tan akasamsam ira na amayamay a bengatla.

14Kayari nen Amasias a tinalo iray Edomita, pinmawil a sankaawit to ray talintaoy diriyos da. Inlira to ra yan talintao, inggalang to ra, tan nampool ed sikara na insinso.

15Akapasnuk so Katawan ed saya, kanyan angibaki na propita ed kinen Amasias. Tinepet na samay propita, Akin et igagalang mo ray diriyos na arum a bansa ya ag da anggan niyagel ed pakayarim iray dilin totoo ra?

16Tinepet nen Amasias, Kapigan lay impanggawa mid sikan sumisimbawa na ari? Tonda ka lan mansalita, ta no andi papatey ta ka!

Tinmonda may propita kayari ton inkuan, Amtak la natan a ginetma lay Dios a deralen to ka, lapud ginawam ira yan amin tan ag mo dinengel so simbawak.

Say Bakal na Juda tan Israel(2 Ar. 14:8-20)

17Nankokomplut sumpad Israel si Ari Amasias na Juda tan saray sumisimbawa to. Angibaki na totoo to ed kinen Ari Joas na Israel a lakin anak nen Joacaz tan apo nen Jehu, ta pasasagyat ton mibakal ed sikato.

18Balet onyay ebat nen Ari Joas: Aminsan, diad Palandey na Libano, impaikuan na masabit a kiew ed kiew a sidro: Ipaasawam so anak mo ed anak ko! Insan dinmalan so sakey ya ayep ed katakelan tan ginatinan to may masabit a kiew.

19Sika, Amasias, ipapantam a tinalom la ray Edomita, balet ibabagak ed sika natan ya ag ka la onaalis ed nanarian mo. Akin et mangigagapo ka niy golo a pakaderalan mo tan saray totoom?

20Balet ag dinmengel si Amasias. Linawa na Dios a natalo si Amasias, lapud inggalang to ray talintaoy diriyos na saray Edomita.

21Kanyan akibakal si Joas na Israel ed kinen Ari Amasias na Juda. Nanabet ira ed Bet-semes na Juda.

22Atalo ray sondalo na Juda tan kibatiktik iran sinmempet.

23Adakep nen Joas si Amasias tan inawit tod Jerusalem. Inggeba tod man so padir na siudad manlapud Puirtay Efraim ya anggad Puirtay Sokung, sakey a sanlasus tan siamaplon mitroy karokey.

24Insempet tod Samaria iray amin a balituk tan pilak ed Timplo, saray kagawaan ed Timplo a guaguardiaan ira na saray kabyangay boleg nen Obed-edom, tan saray kayamanan ed palasio. Angawit met na saray totoon pamasengegan toy panumpal na labay ton nagawa.

25Kayariy impatey nen Ari Joas na Israel nambilay niy Ari Amasias na Juda na labinlimay taon.

26Nikorit ed Say Awaran da ray Arari ed Juda tan Israel ya amin iray arum a ginagawa nen Amasias manlapud inggapo na impanoley to ya anggad samput.

27Nanlapud insumlang tod Katawan, walay komplut a pamatey ed sikato diad Jerusalem. Diad kaonuran batik ed siudad na Lakis, balet tinombuk diman na saray kalaban to tan diman da pinatey.

28Nilogan ed beneg na kabayo so bangkay nen Amasias nen niakar ed Jerusalem, tan nipompon ed kamposanto da ray arari diad Siudad nen David.