1Insan si Moises, a kaiba to ray pangulo na Israel, kuantod saray totoo, Onur yo ray amin ya ibilin kod sikayo natad sayan agew.
2Diad agew ya ibaliw yod Ilog na Jordan tan iloob yod dalin ya iiter ed sikayo na Katawan a Dios yo, mangilira kayo na saray ankakabaleg a bato, palitadaan yo ra,
3insan yo isulat ira yan amin a ganggan tan bangat. No akaloob kayo la ed mayaman tan mataban dalin ya insipan ed sikayo na Katawan a Dios da ray lalaki yo,
4tan akabaliw kayo lad Jordan, ilira yo ra yan bato ed Palandey na Ebal, onung na ibibilin kod sikayo natad sayan agew, tan palitadaan yo ra.
5Manggawa kayod man na sakey ya altar a bato, balet ag kayo mangikakana na balatyang a kagawaan,
6lapud saray baton ag tinabas labat so nepeg ya ikana yod amin ya altar a gawaen yo para Katawan a Dios yo. Diman kayo mangisaklang na saray bagat a popoolan,
7tan diman kayo mangisaklang tan mangan na saray bagat a para kareenan, tan manliket kayod arap na Katawan a Dios yo.
8Diad tapew na saray apalitadaan a bato, isulat yon malinlinew so balang salita na saray ganggan na Dios.
9Insan si Moises a kaiba to ray Levitan pari, kuantod amin a totood Israel, Mandeen kayo tan dengel yo ak, sikayon totood Israel. Natad sayan agew nagmaliw kayon totoo na Katawan a Dios yo;
10kanyan onur yo tan sumpal yo ray amin a ganggan to ya iiter kod sikayo natad sayan agew.
Saray Samba a para saray Mananumlang11Insan inkuanen Moises ed saray totood Israel,
12No akabaliw kayo lad Ilog na Jordan, saray onggendan a tribu et manalagey ira ed Palandey na Gerizim tan ibawag day bindision ed saray totoo: Simeon, Levi, Juda, Isacar, Jose tan Benjamin.
13Saray onggendan a tribu et manalagey ira ed Palandey na Ebal tan ibawag day samba: Ruben, Gad, Aser, Zabulon, Dan, tan Neftali.
14Saray Levita ikolyaot da ra yan salita:
15Napelag komun so samba na Dios ed siopaman a manggawa na talintaon bato, kiew, odino mital insan to galangen ed maamut; kabosul na Katawan so pangigalangan ed saray talintaoy diriyos.
Insan onebat iray amin a totoo, Amen!
16Napelag komun so samba na Dios ed siopaman ya ag to igalang so ama odino ina to.
Insan onebat iray amin a totoo, Amen!
17Napelag komun so samba na Dios ed siopaman a mangyalis na mohun na dalin na kaabay to.
Insan onebat iray amin a totoo, Amen!
18Napelag komun so samba na Dios ed siopaman a mangibalang na bulag ed dalan.
Insan onebat iray amin a totoo, Amen!
19Napelag komun so samba na Dios ed siopaman ya ag mangiter na kanepegan da ray sangkaili, saray olila, tan saray bibiin balo.
Insan onebat iray amin a totoo, Amen!
20Napelag komun so samba na Dios ed siopaman a mangipelag na ama to ed kababaingan diad pangakdul tod sakey ed saray asawa nen ama to.
Insan onebat iray amin a totoo, Amen!
21Napelag komun so samba na Dios ed siopaman a sipingan toy ayep.
Insan onebat iray amin a totoo, Amen!
22Napelag komun so samba na Dios ed siopaman ya akdulan toy biin agi to odino agi tod ama o ina.
Insan onebat iray amin a totoo, Amen!
23Napelag komun so samba na Dios ed siopaman ya akdulan toy katolangan ton bii.
Insan onebat iray amin a totoo, Amen!
24Napelag komun so samba na Dios ed siopaman a maamut a mamatey na too.
Insan onebat iray amin a totoo, Amen!
25Napelag komun so samba na Dios ed siopaman a mangawat na kuarta a bayar na pamatey tod toon anggapoy kasalanan.
Insan onebat iray amin a totoo, Amen!
26Napelag komun so samba na Dios ed siopaman ya ag mangonur ed amin a ganggan tan bangat na Dios.
Insan onebat iray amin a totoo, Amen!
Who We AreWhat We EelieveWhat We Do
2025 by iamachristian.org,Inc All rights reserved.
