Salmo 55 - Maung a Balita Biblia (PnPV)(PnPV)

Say Pikakasi na Toon Nantraidoran na Kaaro To

1O Dios, dengel mo pay pikakasik;

ag mo pa ipopolisay so kerew ko!

2Dengel mo ak pa tan ebatan mo ak;

makapkapoy ak la, lapud saray pagpagak.

3Napapagaan ak lapud panagtaktakot da ray kalaban ko,

tan lapud panagpairap da ray totoon maoges.

Iitdan da ak na gunigon;

ampetang so olo rad siak tan kabosul da ak.

4Mapalaloy takot ko,

tan say takot ed patey dedetdetan to ak.

5Mapalaloy pankigtut tan panggiwgiw ko;

say takot so manaarid siak.

6Kuanko, Wala komuy payak kon singa payak na malapati!

Ontikyab ak ed satan tan mananap ak na napampainawaan ko!

7Arawiy tikyaban ko,

tan diad kalawakay panayaman ko.

8Aporaen koy mananap na siruman ko,

pian naliktaran koy mabiskeg a dagem tan say bagyo.

9Ag mo pa pantatalusan iray kalaban ko diad pantotongtong da, O Katawan!

Nanenengneng koy inkaruksa tan gewgew

10a liliberen day siudad ed agew tan labi,

papanoen da na krimin tan gunigon.

11Walay panagderal ed inerman a pasen;

napnoy panagpairap tan panagpalikdo iray daladalan.

12No sakey a kabosul komuy manmumurmurad siak,

nitepel ko;

no sakey a kalaban komuy manleleglemew ed siak,

sarasarag kon iyamutan.

13Balet, sika, sikan kaiba,

sikan kalimug-limug ko tan malet a kaarok.

14Masamsamit so impantongtong ta,

tan naniba ta ya angigalang ed Dios diad Timplo.

15Biglan ompatey komun iray kalaban ko;

onla ra komun a mabilay ed pasen a panaayaman da ray inaatey!

Say kaogsan walad kaabungan tan kapusoan da.

16Balet onkekerew ak na tulong ed Katawan a Dios,

et ilaban to ak.

17Kabwasan, kaagwan, tan labi

so panririklamo tan paney-ey kod sikato,

et dengelen toy bosis ko.

18Ipawil to ak ya ag adiwit

manlapud saray pibabakal ko

ed saray amayamay a kalaban.

19Say Dios a manaari lan nanlapud gapoy gapo

et dengelen to ak tan taloen to ra;

ta ag da labay so mangoman tan ag da tatakotan.

20Samay gendat a kaibak dinogpaan to ray kakaaro to;

ag to tinoor iray sipan to.

21Marlas a singa mantikilya so panagsalita to,

balet napnoy panagbosul so puso to;

singa larak a panagpoyuk iray salita to,

balet matdem iran singa ispada.

22Imatalek mod Katawan iray gunigon mo,

et iyagel to ka;

ag ton balut aabuloyan a natalo iray totoon matonung.

23Balet sika, O Dios, ibantak mod lobuk,

iray totoon managtila tan managpatey

kasakbayay pakasumpal na kapalduay bilay da diad tapew na dalin.

Siak, balet, sikay panmatalkan ko.