2 SAMUEL Say Kumadwan Libro nen - Maung a Balita Biblia (PnPV)(PnPV)

Say Kumadwan Libro nenSAMUELPangiparontalSay Kumadwan Samuel a katuloyan na Ononan Samuel et istoria na impanari nen David, onona diad Juda a walad abalaten (kapitulo 1-4), insan diad intiron bansa, a pati Israel a walad baybay (kapitulo 5-24). Sayan libro et malinew ya impakasalaysay no panon a si David, diad pilalek ton onawang so nanarian to tan onelet so kipapasen to, et akibakal ed saray kalaban ton walad loob na bansa tan saray walad paway na bansa. Nipanengneng a si David et walay malet a pananisia tan panangaro tod Dios, tan apagmaliw ton matoor ed sikato iray totoo. Balet nipanengneng met a no maminsan sikatoy maruksa tan sipaparaan a manggaway ambelat a kasalanan, pian nagamuran to ray pilalek tan getma to. Balet nen niparontal iray kasalanan to diad panamegley nen Natan a propita na Dios, impatwa to ra tan inako toy dusa ya inter na Dios.Ontan lay impandayew na saray totood Israel ed kinen David lapud impanbilay to tan saray agawaan to. Kanyan diad arapen iran panaon a dinmalan so kairapan ed intiron bansa, nen nampilalek iran nawalaan na sananey ya ari, say labay da et say anak nen David, salanti say sakey a kabyangan na boleg nen David a miparad sikato.Logan na sayan LibroImpanoley nen David ed Juda 1:1—4:22Impanoley nen David ed intiron Israel 5:1—24:25a. Saray akaonan taon 5:1—10:19b. Si David tan si Batseba 11:1—12:25c. Saray gunigon tan kairapan 12:26—20:26d. Saray kaonuran a taon 21:1—24:25