JUDIT 3 - Maung a Balita Biblia (PnPV)(PnPV)

Say Olup na Totoon Migawaan na Paknaay Kareenan ed kinen Ari Nabucodonosor

1Amin da ra yan bansa et angibaki ray olup na totoon migawaan na paknaay kareenan ed kinen Ari Nabucodonosor a taruk da ra yan balikas:

2Mansiasiansia kamin matoor ed sika, matalonggaring ya Ari Nabucodonosor; sipaparaan kamin manlingkur ed sika tan mangonur na amin a ganggan ya ipaakseb mo.

3Ipapalima mid sika ray paalagey mi, amin a dalan mi, saray kaalogan min tatanemay trigo, saray ayayep mi, tan saray tulda mi; ikanam ira onung ed labay mo.

4Magmaliw ya aripen mo iray totoo mi, ta nayarian mon ikana ray baley mi onung ed labay mo.

5Kayarin imbaga na samay olup na totoo ira yan balikas,

6impangulo nen Holofernes iray sondalo nen Nabucodonosor a linmeksab ed gilig na Dayat na Mediteraneo. Angyan na saray guardia ed amin da ray baley ya aliber na padir tan nampili na pigaran lalaki ed balang baley tan impagmaliw to ran sondalon sipaparaan ya onsalat.

7Saray totood baley tan diad kaliber-liber a bario et maliket dan inawat si Holofernes; kinokoronaan day kaoloan da na saray rosas tan nansasayaw ira legan a natotogtog iray tambul.

8Balet dinederal nen Holofernes iray amin a pasen a panangigalangan da tan binabatang to ray masanton kakiewan da. Niganggan a maneral na amin a diriyos na dalin, pian galangen na amin a bansa tan tribu si Nabucodonosor labat tan pampikasian da a sakey a dios.

9Insan dinmalan si Holofernes ed Patar na Jezreel ya abay na Dotan, a walad arap na manonan dalan ya onlad kapalandeyan na Juda.

10Nankampod nanleetan na Geba tan Sitopolis tan nanayam diman a sakey bulan, pian makalay abasto na saray sondalo to.