ISAIAS 13 - Maung a Balita Biblia (PnPV)(PnPV)

Dusaen na Dios so Babilonia

1Sikato yay propisiya a nipaakar ed Babilonia, say propisiya ya impuyan na Dios ed kinen Isaias a lakin anak nen Amoz.

2Diad toktok na kinmelang a pokdul, ibitin yoy bandiran para bakal! Kolyaotan yo ray sondalo tan itagey yo ray taklay yon maninyas ed sikara ya ondogpa rad saray puirta na mapaatagey a siudad.

3Tinawag na Katawan iray mapaatagey tan masebeg a sondalo to, ta milaban irad masanton bakal diad panusa rad saray pamapasnukan ton totoo.

4Dengel yoy ingal ed kapalandeyansay ingal da ray amayamay a totoo, say ingal da ray mantitipon a bansa tan nanarian. Ipaparaan na Katawan na saray Sondalo iray sondalo ton mibakal.

5Onsasabi ran nanlapud ararawin bansa diad saray samput na dalin. Diad pasnuk na Katawan onsasabi a maneral ed intiron bansa.

6Ingal kayod paniirap yo! Asingger lay agew na Katawan, say agew a pangyakar na Makapanyarin-amin na panagderal!

7Nalaylay iray amin a taklay, tan ombetel so linawa na balang sakey a too.

8Ontakot iran amin tan manirap iran singa biin mampapasakit. Diad gaway takot da mannenengnengan ira, tan ombalangay lupa rad kababaingan da.

9Onsasabiy agew na Katawan, say maruksan agew ya isabi na pasnuk tan petang na olo to. Magmaliw ed satan a kalawakan so mundo tan ompatey ya amin iray makasalanan.

10Ontondan onsinag iray bitewen tan amin da ray onsisinag a walad liwang, ambilonget so agew no ompaway, tan ag onsinag so bulan.

11Say Katawan kuanto, Mangyakar ak na deral ed tapew na dalin tan dusaen kon amin iray totoon maoges a totoo lapud saray kasalanan da. Ipaabebak ya amin iray totoon mapaatagey tan dusaen kon amin iray totoon malastug tan maruksa.

12Daiset ni nen say balituk iray totoon makapaliis ed patey.

13Diad agew a siak, say Katawan a Makapanyarin-amin, et ipanengneng koy pasnuk ko, yakayaken koy katawenan tan yegyegen koy mundo pian naekal ed pasen to.

14Saray sangkailin manaayam ed Babilonia et ombatik irad dilin dalin da; ombatik ira a singa saray ulsan ibabatikan da ray umaanup, tan singa ra karniron anggapoy pastol da.

15Nasaksak ya anggad ag to ipatey so siopaman a naerel.

16Legan ya ibabasig na saray kalaban da iray mansususon anak da, aakokosen da ray kayaryan dad abung da, tan papasooten da ray kaasawaan da, mamambantay ira labat ta anggapoy nagawaan dan mangyagel.

17Say Katawan kuanto, Sosogsogan kon ondogpad Babilonia iray taga Medes. Anggapoy walad sikara so pilak tan anggapoy liket dad balituk.

18Pateyen dad pana iyar tobun-balon lalaki. Ag da kasian iray ogogaw.

19Say Babilonia et sankarakepan ed amin da ray nanarian; ikikinon na saray totoo to. Balet siak a Katawan, temeken ko a singa samay ginawak ed Sodoma tan Gomorra!

20Anggapon balut ed satan so malabay a manayam diman. Saray Arabe ag da la labay so mangipaalagey na tulda rad man, tan anggapo lay pumapastol a mampastol na saray karniro tod man.

21Magmaliw a pasen a saray ayep ed katakelan labat so manayam tan panobungan na saray kulayot. Panayaman na saray abistrus, tan pambatikbatikan na saray kanding ed katakelan iray aderal-deral.

22Saray hayina tan saray asod katakelan et mandangul-dangul irad saray tori tan saray palasio. Sinmabi lay agew na pakaderal na Babilonia. Ngalngali la mangangga ray agew to.