Salmo 62 - Maung a Balita Biblia (PnPV)(PnPV)

Panagmatalek ed Panangyagel na Dios

1Aanosan kon aalagarey pangilaban na Dios ed siak;

sikato labat so panmamatalkan ko.

2Sikato labat so mangyaagel tan mangilalaban ed siak;

sikatoy manangyagel ko,

et ag ak balut natalo.

3Kapigay itonda na idodogpa yon amin ed sakey a toon

diad kapkapoy to et aliling toy ageban padir?

4Labay yo labat ya iyabeban manlapud matalonggaring a kipapasen to;

panliliketan yo ray tila.

Mansasalita kayoy panamindision,

balet isasamba yo ed dalem na kapusoan yo.

5Say Dios labat so panmamatalkan ko;

sikatoy paniilaloan ko.

6Sikato labat so mangyaagel tan mangilalaban ed siak;

sikatoy manangyagel ko,

et ag ak balut natalo.

7Walad Dios so kilalaban tan kagalangan ko;

sikatoy mabiskeg a manangyagel ko;

sikatoy salimbeng ko.

8Sikayon totook, manmatalek kayod Dios diad amin a panaon.

Ibaga yod sikatoy amin a gunigon yo,

ta sikatoy salimbeng tayo.

9Singa labat ingas iray totoo;

anggapoy kana da ray totoon walad abeba odino atagey a kipapasen.

Pantitipon mo ran simbangen et anggapoy belat da;

anlemew ni ra nen say ingas.

10Ag yo panmamatalkay panagduksa;

ag yo iilaloan a walay nagonggona yod panagtakew;

anggan ondakel so kayamanan yo,

ag yo panmamatalkan.

11Aliwan amimpinsan a nadngel koy Dios ya imbaga to

a kayaryan toy pakayari,

12tan ag mangoman so panangaro to.

Sikan dili, O Katawan, so ontutumang ed balang sakey a too

onung ed saray gawgawa to.