ESTER 6 - Maung a Balita Biblia (PnPV)(PnPV)

Pinagalangan na Ari si Mardokeo

1Diad saman a labi ag makaogip so ari, kanyan impaala toy libro na saray awaran tan impabasa to pian narengel to.

2Nibasa imay nipaakar ed impangipaamta nen Mardokeo ed komplut a pamatey ed ari, say komplut ya implano di Bigtan tan Teres, saray duaran yunuko ed palasio a nangguardiad saray kuarto na ari.

3Tinepet na ari, Panoy impangiter tayod kinen Mardokeo na galang tan tumang lapud saman a ginawa to?

Inmebat iray aripen to, Anggapoy niiter ed sikato.

4Wala diad palasio so siopaman ya opisyal ko? tepet na ari.

Diad saman a bekta kalooloob nen Haman ed patio na palasio. Sinmabi ta kerewen tod ari ya ibitay si Mardokeo ed panagbitayan ya imparaan to.

5Kanyan inmebat ira may aripen. Wadyay Haman; manaalagar, ta mitongtong ed sika.

Paloob yo, kuan na ari.

6Linmoob sirin si Haman, et inkuan na ari ed sikato, Walay toon labay kon pagalangan. Antoy nepeg a gawaen kon para sayan too?

Ninunot nen Haman ed sikaton dili, Siopa niy toon labay na ari a pagalangan no ag say siak?

7-8Kanyan inmebat ed ari, Paiyakaran mo na kawes a para arisay kawes ya isosolung mo. Inan moy koronan manepeg a para ari so olo na dilin kabayom.

9Insan mo pasolungan ed sakey ed saray atagey ya opisyal mo. Kayari to ipakabayo to tan tengtengen to may kabayo ya iliber ed plasa na siudad. Paibandom ed samay atagey ya opisyal mo legan dan onliliber, Nengneng yoy tumang na toon labay a pagalangan na ari!

10Insan inkuanen ari, Ganatan mon alaen imay kawes tan samay kabayo, tan gawam ed kinen Mardokeo a Judio iray amin ya imbagam a nagawa. Wadman natan a manyodyorung ed lolooban na palasio.

11Inala sirin nen Haman imay kawes tan samay kabayo. Insolung tod kinen Mardokeo imay kawes. Kinmabayo si Mardokeo, tan tinengteng nen Haman imay kabayo. Inliber to ed plasa na siudad, tan imbabando to legan dan onliliber, Nengneng yo so tumang na toon labay a pagalangan na ari!

12Pinmawil si Mardokeo ed lolooban na palasio; balet si Haman magangganat a sinmempet a sinakuban toy lupa to, lapud kababaingan to.

13Imbaga tod asawa to tan amin a kakaaro iray amin ya agawad sikato. Insan samay asawa to tan saramay makabat a kakaaro to inkuandad sikato, Nababalang mo lay pakayarim tan niyaalis ed kinen Mardokeo. Sakey a Judio, kanyan ag mo nalabanan. Andi-duaruwan taloen to ka.

Nibitay si Haman

14Legan ni ran mantotongtong, sinmabin magangganat iray yunukod palasio, ta awiten day Haman ed ponsia ya imparaan nen Ester.