1Say Katawan kuanto,
Babilonia, epas kad tan ed tronom
tan yorung kad dabuk ed dalin.
Nen saman singa ka sakey a birhin, sakey a siudad ya ag natalo,
balet natan aliwa ka lan anlemek tan masimpit!
Aripen ka la natan!
2Patelek moy gilingan! Manggiling kay arina!
Ekal moy pandung mo! Lakseb moy marakep a kawes mo!
Itagey moy paldam diad ibaliw mod saray kolus.
3Nanengneng na saray totoo a labus ka;
nanengneng da kan apaabeba tan abaingan.
Ombawi ak, et anggapoy mamatondad siak.
4Imbolus itayo na masanton Dios na Israel
say ngaran to et Yahweh a Makapanyarin-amin.
5Say Katawan kuantod Babilonia,
Yorung kan andi eseesel tan dia kad ambilonget a pasen;
ag da ka la tawagen a riyna na saray bansa!
6Akapasnuk ak ed saray totook;
impasen kon ag ko la ra kayaryan:
Impasilong ko rad pakayarim,
et ag mo ra kinasian;
anggan saray mamatakken pinairap mo ran tuloy.
7Abaloan mo a sika lawas so riyna,
tan ag mo inngalngalep ira yan bengatla;
ag mo anggan ninunot no kapigay pangangga ra.
8Dengel ka, sikan maarod like-liket,
sika ya abaloan mon arawi kad kaatapan.
Ipapasen moy sikan dili a matalonggaring a singa Dios
ya anggapoy miparad sika.
Abaloan mo ya ag kan balut nabalo
odino nasalim so nabalangan na anak.
9Balet diad sakey a bekta, diad sakey ya agew,
nagawa ra yan dua ed sika.
Anggan antoy panggawam na amin a salamangka,
nabalang moy asawam tan saray anak mo.
10Anggapoy kapagaan mo ed panggagawam a kaogsan;
abaloan mon anggapoy makanenengneng ed sika.
Pinalikdo ka na kakabatan tan pakatalus mo,
tan inkuanmod sikan dili, Siak so Dios
anggapo lay arum a singa siak.
11Onsabid sikay deral,
et anggapoy salamangkam a makapatondad saya.
Biglan onsabid sikay desyang
say desyang ya ag mon balut inilaloan!
12Ituloy moy panagsalamangkam tan say panagparles mo;
inkakanam la ra nanlapu lad impanogaw mo.
Angangko makatulong irad sika;
angangko nataktakot mo ray kalaban mo.
13Mapagpaga ka anggaman ya amayamay iray simbawad sika.
Pamparontal mo la natan iray astrologom ta ilaban da ka
saray totoon aaralen day kiwas da ray bitewen,
saray totoon mangipapasen na ketegan da ray katawenan
tan ibabaga rad sikan binulan no antoy nagawad sika.
14Aliling da naaniy dayami,
et poolan iran paandipaten na apoy!
Ag da anggan nilaban so sikaran dili
ag da natepelan so petang na dalang;
aliwan makapinawa yan apoy a pandangdangan da.
15Onyay pasen da ray astrologon
pangipapanonan mo nanlapu lad impanogaw mo.
Taynanan da ka tan onla la rad labay dan laen,
tan anggapod sikaray natilak a mangilaban ed sika.
Who We AreWhat We EelieveWhat We Do
2025 by iamachristian.org,Inc All rights reserved.
