1Impantitipon nen Ari Ben-hadad na Siria iray amin a sondalo to. Kaiba toy talomplo tan duan manoley a kaolup da ray kabayo ra tan saray karwahi ra, ta looban day Samaria, insan dinogpaan da.
2Angibakid siudad na pigaran totoo tan inkuandad Ari Acab, Papaibaga nen Ari Ben-hadad
3ya isukom ed sikato ray pilak tan saray balituk mo, saray sankagangganaan ya asawam tan saray sankabiskegan ya anak mo.
4Ibaga yod kagalang kon Ari Ben-hadad ya onabuloy ak; alaen to ak tan amin a kayaryan ko, ebat nen Acab.
5Ag abayag, pinmawil ed Acab ira may imbaki tan imbaga ray impaikuanen Ari Ben-hadad: Impaibagak lad sika ya ipalimam ed siak iray pilak tan saray balituk mo, saray asawam tan saray anak mo.
6Natan, balet, ibakik iray opisyal ko, ta mansokimat irad palasiom tan diad kaabungan na saray opisyal mo tan alaen day antokaman ya ipapasen dan mabli. Diad singa onyan oras nabwas onla rad tan.
7Impaawit nen Ari Acab ya amin iray pangulo na bansa tan kuanto, Nengneng yo no panoy panggugunigon na sayan too ed sikatayo. Inmabuloy ak la lantid pangala tod saray asawak tan saray anak ko, saray pilak tan saray balituk ko.
8Inmebat ira may pangulo tan saray totoo, Ag mo dedengelen; ag ka onaabuloy ed labay to.
9Kanyan inmebat si Acab ed saramay imbaki nen Ben-hadad, Ibaga yod Kagalang kon Ari ya onabuloy ak ed samay inmonan aalaen to, balet ag ak onabuloy ed sayay kumadwan labay ton gawaen.
Tinmaynan ira may imbaki, insan pinmawil iran onyay papaibaga
10nen Ben-hadad: Looban ta kad tan a kaibak iray amayamay a sondalon maneral na siudad mo. Diad karakel da sarasarag dan akupen iray deral-deral. Pateyen ak komun na saray diriyos no ag ko ya gawaen!
11Inmebat si Ari Acab, Ibaga yod kinen Ben-hadad a mampasirayew so peteg a sondalo kayariy bakal, aliwan diad kasakbayan na bakal.
12Naawat nen Ben-hadad so ebat nen Acab legan a sikato tan saray kakaiba ton pangulo et maniinoman irad dalem na saray tulda ra. Kanyan ingganggan tod saray totoo to a mamparaan iran ondogpa ed siudad; et namparaan ira.
13Legan to ya, linmay sakey a propita ed kinen Ari Acab tan kuanto, Ibabagay Katawan, Ag ka ontatakot ed saraman ya amayamay a sondalo! Panaloen ta kad sayan agew, et diad ontan naamtaan mo a siak so Katawan.
14Siopa ray mangipangulod idogpa? tepet nen Acab.
Inmebat imay propita, Saray sondalon walad silong na pakaoley da ray gobirnador na saray distrito, ta onyay imbilin na Katawan.
Siopay mangipangulod amin da ray sondalo? tepet nen Acab.
Sika, ebat to may propita.
15Kanyan tinawag na ari iray sondalon walad silong na pakaoley da ray gobirnador na saray distrito; duan lasus tan talomplo tan dua ran amin. Insan tinawag to ray sondalo na Israel; piton libo ran amin a lalaki.
16Ginmapod kaagwan so indogpa ra legan a si Ben-hadad tan saray talomplo tan duan kakaiba ton pangulo et maniinoman irad dalem na saray tulda ra.
17Inmonan kinmurang ira may duan lasus tan talomplo tan dua a sondalo. Saray managsiim ya imbaki nen Ben-hadad imbaga rad sikaton walay sakey a grupo na saray sondalon ompapaway ed Samaria.
18Ingganggan nen Ben-hadad, Ala yo ran mabilay, onla ra dia man a milaban odino mikaaro.
19Inmonan dinmogpa ra may duan lasus tan talomplo tan duan sondalo, insan tomtombuken ira na saray sondalon Israelita.
20Apatey na balang sakey ed sikara so kalaban to. Batik iray Siriano, tan inoosilan ira na saray Israelita. Akakabayon binmatik si Ben-hadad tan saray pigaran akakabayo met a kaiba to.
21Linmad bakalan si Ari Acab, inaala to ray kabayo tan saray karwahi na saray kalaban to, tan amayamay so pinapatey ton Siriano.
22Insan linmay propita ed kinen Ari Acab tan kuanto, Pawil ka tan pabiskeg moy kipapasen da ray sondalom tan apiapiger moy panagplanom, ta diad arapen a tiagew dogpaan ka lamet na ari na Siria.
Say Kumadwan Indogpa na saray Siriano23Inkuan na saray opisyal nen Ben-hadad ed sikato, Diriyos na palandey iray diriyos na Israel, kanyan tinalo itayo na taga Israel. Balet andi-saew a taloen tayo ra no labanan ti rad saray patar.
24Ekal mo lad kipapasen da ra may talomplo tan duan manoley tan salatan mo ra na saray opisyal da ray sondalo.
25Insan ka manipon na singa karakel na saramay angikaindan ed sika, tan manipon ka met na singa karakel na saray kabayo tan saray karwahi. Labanan tid patar iray taga Israel, et taloen ti rad satan.
Inmabubon si Ari Ben-hadad tan tinombuk to may simbawa ra.
26Diad ontombuk a tiagew tinipon nen Ben-hadad iray totoo to, ta onla rad siudad na Afek, insan dogpaan da ray taga Israel.
27Atipon met iray totood Israel tan naitdan iray ikana ra; kinmurang ira tan nanayam irad kampon sankaarap da ray Siriano. Duara ran grupo tan singa ra labat duaran ankekelag a poluk na saray kanding no ipara rad saray Siriano, ta pinanatan na saray Siriano so intiron sakey a bario.
28Walay sakey a propita a linmad kinen Ari Acab tan kuanto, Ibabagay Katawan: Lapud ibabaga na saray Siriano a dios ak na saray palandey, aliwan dios na saray patar, panaloen ta kad saray amayamay a sondalo ra, et nabirbir mo tan saray totoom a siak so Katawan.
29Pitoy agew a saray Siriano tan saray taga Israel et nanayam irad saray kampo ra a nanaarapan. Diad kumapiton agew ginapwan day nanlalaban, et akapatey iray Israelita na sanlasus libon Siriano.
30Saray ag apatey batik irad siudad na Afek, et apataan diman na saray padir na siudad iray duamplo tan piton libo ed sikara.
Batik met ed loob na siudad si Ben-hadad, tan inmamut ed kuartod beneg na sakey ya abung.
31Linma ray opisyal to tan kuandad sikato, Nadngelan min mapangasi ray arari na Israel. Abuloyan mo kamin mamberber na sakod balangbang mi tan mangibaliber na lobir ed beklew mi, insan kami onlad ari, ta ag la pigan ag to ka pateyen.
32Kanyan namberber iray sako ed balangbang da, nambaliber iray lobir ed beklew da, tan linma rad kinen Acab tan kuanda, Mikakasid sikayoy aripen yon Ben-hadad ya ag mo la komun papateyen.
Inmebat si Acab, Mabilay ni? Maung! Singa agi so pasen tod siak!
33Inimano na saray opisyal nen Ben-hadad so maung a pakapatnagan, et nen inkuanen Acab so agi sinambot dan inkuan, On, tua tay kuanmo, agim si Ben-hadad!
Awit yo dia, ganggan nen Acab. Kasabi nen Ben-hadad, inimbitaan nen Acab a manloganan irad karwahi.
34Inkuanen Ben-hadad ed sikato, Ipawil kod sika ray baley a sinamsam nen amak ed kinen amam, tan nayaryan moy mamaalagey na panaglakowan ed Damasco, a singa ginawa nen amak ed Samaria.
Inmebat si Acab, Ibolus ta ka sirin lapud saratan a paknaan. Akipaknay Acab ed sikato, insan to la imbolus.
Sinintinsiaan na Sakey a Propita si Acab35Lapud ganggan na Katawan, say sakey a kabyangay grupo na saray propita ingganggan toy sakey a kapara ton propita, Kabil mo ak! Balet ag to kinabil.
36Kanyan inkuantod sikato, Lapud ag mo inonur so ganggan na Katawan, pateyen ka na lion kataynan mo dia. Kataynan to may propita, sinabat tan pinatey na lion.
37Insan linmad sananey a too man a propita tan kuanto lamet, Kabil mo ak! Kinabil to tan asugatan.
38Binerberan toy abel so lupa to pian ag nabirbir, insan linman nanalagar diad abay na dalan ed ilabas na ari na Israel.
39Nen onlalabas lay ari, tinawag na samay propita tan kuanto, Kagalang ya Ari, mibabakal ak nen angyakar ed siak so sakey a sondalo na sakey ya adakep a kalaban tan kuanto, Bantayan mo yan too; no nabolus mo, bilay moy ibayar mo, odino mambayar kay talon libon pilak.
40Balet nen amayamay so gagawaen kon arum a bengatla, akabatik imay too.
Inmebat may ari, Sikay anintinsiad sikan dili, nepeg kan mambayar.
41Biglan inekal to may akabariber ed lupa to, et say ari abirbir ton tampol a sakey ed saray propita.
42Insan inkuan na samay propita ed ari, Ibabagay Katawan; Lapud inabuloyan mon makabatik so ingganggan ko a pateyen mon too, patey so ibayar mo, tan napatey iray totoom lapud impamabatik mod saray totoo to.
43Agunigon tan maerermen a sinmempet imay ari ed abung tod Samaria.
Who We AreWhat We EelieveWhat We Do
2025 by iamachristian.org,Inc All rights reserved.
