Salmo 78 - Maung a Balita Biblia (PnPV)(PnPV)

Say Dios tan saray Totoo To

1Sikayo ran totook, dengel kayod bangat ko,

tan imano yo ray ibabagak.

2Ikanak iray salitan manangiter na kakabatan,

tan ipaliwawak iray mistirio nen saman,

3saray bengatlan nadngel tan naamtaan mi,

saray bengatlan imbagad sikami na saray lalaki mi.

4Ag mi ra iyamut ed saray anak tayo;

ibaga mid ontombuk a kailalakan

so nipaakar ed pakayariy Katawan tan saray matalonggaring a kiwas to

tan saray makapakelaw a ginagawa to.

5Angiter na saray ganggan ed saray totood Israel,

tan diad saray kabyangay boleg nen Jacob.

Binilin to ray lalaki tayo

ya ibangat dad saray anak da iray ganggan to,

6pian naaralan ira na ontombuk a kailalakan,

tan ibangat da met ed saray anak da.

7Diad onya manilalo met irad Dios,

ag da nalingwanan iray ginagawa to,

tan onuren da lawas iray ganggan to.

8Ag ira magmaliw a singa saray lalaki ra

a matonganga tan bangar iran totoo;

aliwan malet so panagmatalek dad Dios,

tan ag ira nansiansian matoor ed sikato.

9Saray kabyangay boleg nen Efraim, a say armas da et saray pana,

et kibatiktik ira nen agew na bakal.

10Ag da tinoor so impisipanan dad Dios;

ag da tinoluk so ganggan to.

11Alingwanan da ray ginagawa to,

saray milagron anengneng dan ginagawa to.

12Diad imatun da ray lalaki ra, nanggaway milagro so Dios,

diad patar na Soan na dalin na Egipto.

13Binelsay toy dayat tan pinadalan to ra;

pinaalagey ton singa padir so danum.

14No agew inwanwan to ra diad panamegley na lorem,

tan no labi diad panamegley na liwawa na apoy.

15Pinasangi to ray baton-dampay diad kalawakan,

tan initdan to ray daakan a danum a nanlapud dalem na dalin.

16Pinapaway tod baton-dampay so sobul

tan pinaagos ton singa ilog so danum.

17Balet intuloy day nankasalanan ed Dios,

tan diad kalawakan sinmumpa rad Sankatageyan.

18Ginagala ran sinubok so Dios,

diad impankerew day kakanen a labay da.

19Nansalita ray sumpad Dios tan inkuanda,

Nayarian kasi na Dios so mangiter na kakanen diad kalawakan?

20Tua a pinekpek to so baton-dampay,

et tinmoroy mapmaples a danum;

balet nayarian to itayo met kasin itdan na tinapay tan karni?

21Kanyan akapasnuk so Katawan nen nadngel to ra;

kinabil to na apoy iray totoo to,

tan linmoor so pasnuk tod sikara,

22ta ag ira nanmatalek ed sikato

tan ag ira anisia ya ilaban to ra.

23Balet nansalitad tawen

tan ingganggan ton onlokas iray puirta to;

24initdan to ray nakan a nanlapud tawen,

diad impangoran to na mana a kanen da.

25Kanyan angan iray kakanen da ray anghil.

Say Dios initdan to ra na daakan.

26Pinasiplug to met so dagem ed bokig,

tan diad pakayari to pinaalimbosabos toy dagem ed abalaten;

27insan pinadapo tod saray totoo to iray manok,

a singa ra karakel na buer ed gilig na dayat;

28napnaplag irad pegley na kampo ra,

diad kaliber-liber na saray tulda ra.

29Kanyan angan tan napnapsel iray totoo;

inter na Dios so nilabay da

30Balet nen legan dan mangakan

tan kasakbayan iran napesel,

31akapasnuk so Dios ed sikara,

et pinatey to ray sankabiskegan ed sikara,

saray sankamaungan a lalakin tobun-balo na Israel.

32Anggaman a wala ra yan agawa intuloy na saray totoo so nankasalanan;

anggaman a wala ray milagron ginagawa to ag ira anisia.

33Kanyan singa ingas so impamaandipat tod saray agew da,

tan makapataktakot so impamasamput tod saray bilay da.

34Balet kapag wala ray pateyen tod sikara,

saray nakdaan onsingger irad Dios;

mampatauli ra tan masimoon iran mampikasid sikato.

35Anunotan dan say Dios so manangyagel da,

tan say Makapanyarin-amin so dinmagon tinmulong ed sikara.

36Balet tilan amiy salita ra,

tan lastug ya amiy imbaga ra.

37Ag ira nansiansian matoor ed sikato,

tan ag da sinumpal so impisipanan dad sikato.

38Balet say Dios mapangasid saray totoo to.

Pinirdona to ray kasalanan da

tan ag to ra pinatey.

Naynay a pinokpokan toy pasnuk to,

tan pinabetel toy petang na olo to.

39Anunotan ton totoo ra labat,

tan singa ra dagem ya onsisiplug tan nanaandi la.

40Naynay iran sinmumpad sikato diad kalawakan;

amimpiga-pigan pinaermen da.

41Inolit-olit dan sinubok so Dios,

tan impanpapasnuk da so Masanton Dios na Israel.

42Nilingwanan day baleg a pakayari to;

alingwanan da may agew ya inliktar to rad saray kalaban da,

43tan nanggagawa na saray milagro tan tanda

diad patar na Soan, ed dalin na Egipto.

44Impagmaliw ton dala iray ilog,

kanyan anggapoy nainom da ray Egipsio.

45Angibakid sikaray amayamay ya apangat a nampapairap ed sikara;

angibaki met na amayamay a patang a nandederal ed dalin da.

46Angibakiy amayamay a dorun a nambubuwag ed saray tanem da,

tan aneral ed saray aaniyen da.

47Pinapatey to ray kaubasan da diad panamegley na oran a kristal

tan saray kakiewan dan igos diad panamegley na mapalalon betel.

48Pinapatey to met iray baka diad panamegley na oran a kristal,

tan saray karniro ra diad panamegley na kirmat.

49Pinadalan tod sikara so ontan lan kairapan

diad impangidapo toy mapalalon pasnuk tan petang na olo

ya imbaki to ran singa saray anghil a managpatey.

50Ag to pinokpokay pasnuk to,

odino kinawanan so bilay da,

no ag ta pinatey to rad sakey a salot.

51Pinatey to ray lalakin pangulowan ya anak

ed amin a pamilya na Egipto.

52Insan singa sakey a pumapastol, impaway to ray totoo to;

tan inwanwan to ran singa poluk na karniro diad imbeltang dad kalawakan.

53Arawi rad kaatapan nen inwanwan to ra, kanyan ag ira tinmakot;

balet tinabunay dayat iray kalaban da.

54Inyakar to rad masanton dalin to,

diad kapalandeyan a sikaton diliy anakep.

55Pinataynan to ray totoon manaayam diman nen mankukurang iray totoo to;

inapag toy dalin ed saray tribu na Israel,

tan inter tod saray totoo to iray panaayaman da.

56Balet sinmumpa rad Makapanyarin-amin a Dios,

tan sinubok da.

Ag da tinoluk iray ganggan to,

57balet mananumpa ra tan aliwa ran matoor a singa saray lalaki ra,

tan ag ira napampiaan a singa panan pikewet.

58Pinasanuk day Dios lapud saray paganon pasen a panangigalangan,

tan pinapetang dan maung so olo to lapud saray talintaoy diriyos da.

59Say Dios akapasnuk nen anengneng to ya,

kanyan impolisay ton sigput iray totoo to.

60Inkaindan toy tulda tod Silo,

say tuldan nanayaman tod pegley tayon totoo to.

61Inyabuloy ton nadakep na saray kalaban mi so Kaban na Sipanan,

say tanda na pakayari tan kagalangan to.

62Pinmetang so olo tod saray totoo to,

tan pinaolyan ton pinatey ira na saray kalaban da.

63Inatey ed bakal iray babalolaki,

kanyan anggapoy angasawad saray mamarikit.

64Inatey iray papari ra diad panamegley na ispada,

tan ag naabuloyan a lamayan ira na kaasawaan da.

65Diad kaonuran, say Katawan binmangon a singa aliing ed ogip to;

singa toon mabiskeg a maniingal lapud abuek.

66Pinapoliktar to ray kalaban to;

andi-anggaan tan makapabaing so inkatalo ra.

67Balet impolisay to ray kabyangay boleg na Jose;

ag to piniliy tribu nen Efraim.

68Ingen pinili toy tribu nen Juda

tan say Palandey na Sion ya inararo to.

69Diman to impaalagey so Timplo to a kaparparay abung tod tawen;

inletneg to na malmalet a singa say mundo,

kanyan mansiansian anggad angga.

70Pinili toy aripen ton David a magmaliw ya aripen to;

inala tod pastolan na saray karniro,

71a dimay pangaasikasoan tod saray ayep to;

ginawa ton ari na Israel,

say pumapastol na saray totooy Dios.

72Nilingwanan nen David so sikaton dili diad impangasikaso tod sikara,

tan maabig so impangiwanwan to.