ESTER 2 - Maung a Balita Biblia (PnPV)(PnPV)

Nagmaliw a Riyna si Ester

1[1] Ag abayag, kinmepay pasnuk na ari. Anggaman ya ag to la bibitlaen si Vasti, lawas nununoten to no panoy impanusa tod sikato.

2[2] Kanyan inkuan ed sikato na pigarad saray sumisimbawa to, Akin et ag ka mananap na pigaran maganan malangwer a bibii a maung so ogali ra?

3[3] Manoro ka na saray opisyal ed balang luyag na impirio tan paawit mod sikara iray amin a maganan malangwer a mamarikit ed harim mo diad Susa. Ipaasikasom irad kinen Hegai a yunukon makaoley ed saray bibiim, tan paitdan mo ra na saray pampaganggana tan antokaman a nakaukolan da.

4[4] Insan alam so biin labalabay mo tan pagmaliw mon riyna a kasalat nen Vasti.

Apaknaan na ari a maung yan simbawa, kanyan tinombuk to.

5[5] Diad Susa walay manaayam diman a sakey a Judion manngaran na Mardokeo a lakin anak nen Jair; nanlapud tribu nen Benjamin tan kabyangay boleg nen Kis tan si Simei.

6[6] Sikatoy sakey ed saray adakep ed Jerusalem nen Ari Nabucodonosor na Babilonia.

7[7] Si Mardokeo so manaasikaso ed kinen Ester ya anak na pangamaen ton si Aminadab. Magangganan bii si Ester, tan kayari na impatey na saray ateng to, inasikaso nen Mardokeo ya anggad imbaleg to.

8[8] Nen impaakseb la na ari yan balon ganggan to, sakey si Ester ed saray amayamay a mamarikit a niakar ed Susa. Niakar met si Ester sirin ed palasio na ari tan nipaasikasod kinen Hegai a makaoley na harim.

9[9] Labalabay nen Hegai si Ester, kanyan nala nen Ester so maung a linawa to. Ag nanabala si Hegai ed impangigapo to na pampagangganad kinen Ester diad panamegley na panagmasahi tan panangiter na nidoman kakanen. Tinoro ton manlingkur ed kinen Ester so pitoran bibii a pinili ed saray bibiid palasio na ari. Maumaung so impangasikaso nen Hegai ed kinen Ester tan saramay aripen to.

10[10] Lapud pananimbawa nen Mardokeo, inyamut nen Ester so katwaan a sikatoy sakey a Judio.

11[11] Inagew-agew a manakar a mampawil-pawil ed arap na solar na harim si Mardokeo, ta iimanoen to no antoy nagagawa ed kinen Ester.

12[12] Sakey taon so niganan panaon a pampaganggana na saramay bibii: anem bulan a pangimasahid sikara na larak na mira tan anem bulan a pangimasahid sikara na saray pabalingit tan arum ni ran pampaganggana.

13[13] Kayari to ya, balang bii et nipalima ed toon atoro a mangyakar ed sikato ed ari, manlapud harim ya anggad palasio.

14[14] Onlad man ed labi, tan niakar ed sananey a harim no ontombuk a kabwasan tan nipalimad panangasikaso nen Hegai, samay yunukon makaoley. Ag to onla lamet ed ari, likud no kerewen na ari diad pamitla toy ngaran na saman a bii.

15[15] Sinmabiy oras a si Ester, ya anak nen Aminadab a pangamaen nen Mardokeo so onlad ari. Ginawa toy amin ya insimbawa nen Hegai, tan indayew na amin ya akengneng ed sikato.

16[16] Kanyan diad kumapiton taon na panaari nen Asuero, nen kumalabinduan bulan, say bulan na Adar, niakar ed ari si Ester.

17[17] Naibegan na ari si Ester, a lalon akapaliket ed sikato nen saray arum, kanyan intoon tod olo nen Ester so koronay riyna.

18[18] Insan angiter so ari na sakey simban ponsia a para amin da ray sumisimbawa tan inkargado to, ta sinilibraan toy impangasawa tod kinen Ester. Impaabeba to met iray buis ed intiron impirio.

Inlaban nen Mardokeo so Bilay na Ari

19[19] Legan to ya, atoron sakey ya atagey a manoley si Mardokeo.

20[20] Balet ag ni imbaga nen Ester a sikatoy sakey a Judio. Imbagad sikato nen Mardokeo ya ag to ibabagad siopaman, et inonur nen Ester ed saya, a singa impangonur tod sikato nen ogaw nin aasikasoen nen Mardokeo. Intuloy nen Ester so mangigalang ed Dios tan mangonur ed saray ganggan na Dios, tan ag to inkaindan iray kagagawa da ray Judio.

21[21] Nen inyatagey na ari so kipapasen nen Mardokeo, saray duaran yunuko na palasio ya opisyal iray umaantabay na ari et akapasnuk ira tan nankomplutan dan pateyen so ari.

22[22] Naamtaan nen Mardokeo yan plano ra, kanyan imbaga tod kinen Riyna Ester, a sikatoy angidalatdat ed ari na nipaakar ed samay komplut.

23[23] Impatepetan na ari ira may duaran lalaki, tan nibitay iran dua. Diad pamagalang ed kinen Mardokeo, ingganggan na ari a sayan inkagawa et nikorit ed panagsulatan na palasio, pian ag nalingwanan yan mablin panaglingkur nen Mardokeo.