EZEKIEL 15 - Maung a Balita Biblia (PnPV)(PnPV)

Say Alimbawan Nipaakar ed Wakal na Ubas

1Say Katawan akisalitad siak.

2Sika a toon ompatey, kuanto, panon ya ipara so kaabigan ya iter na wakal na ubas ed sakey a kiew? Anto so kaabigan na sangay kiew ya ubas no ipara ed saray kiew ed katakelan?

3Nikana yo ta ed panggawa yo na antokaman so wakal na ubas? Makala kayod wakal na gawaen a pansabitan na bengatla?

4Anggapoy arum a kana to no ag ta ipool labat. No apoolan la ray nantopag a samput to tan nagmaliw lan oring so pegley to, nikana yo ni kasi ed panggawa na antokaman?

5Anggapoy kana to, anggan nen ag ni apoolan. Natan ta apoolan la tan nagmaliw lan oring, lalon anggapoy kana to.

6Natan saya so ibabaga na Katawan a Dios: No panon a say wakal et naalad takel tan napoolan, ontan met so pangalak ed saray totoon manaayam ed Jerusalem,

7insan ko ra dusaen. Apaliisan da lay sakey ya apoy, balet natan poolan ira na kumadwan apoy. No dusaen ko ra, naamtaan mo a siak so Katawan.

8Aliwa ran matoor ed siak, kanyan pagmaliwen ko a kalawakan so bansa ra. Say Katawan a Dios so nansalita.