JUDIT 11 - Maung a Balita Biblia (PnPV)(PnPV)

1Inkuanen Holofernes ed kinen Judit, Ag ka mapaga; anggapoy nepeg mon takotan. Anggapo nin balut so pinasakitan kon maliket a manlingkur ed kinen Nabucodonosor ya ari na intiron mundo.

2Anggan natan, no ag ak pinabaingan na saray totoom ed tagey na kapalandeyan, ag ak komun mibakal ed sikara. Sikaran diliy angiter na sayan gunigon da.

3Balet ibagam ed siak, akin et tinaynan mo ra tan linma ka diad si kami? Ag ka dia naano. Ag ka nepeg ya ontakot! Kinawanan miy bilay mo natad sayan labi, tan arawi kad kaatapan ed arapen a panaon.

4Anggapo diay mamasakit ed sika; maung so ipatnag dad sika, a singa saray arum ya aripen na amok a Nabucodonosor.

5Inkuanen Judit ed kinen Holofernes, Abuloyan mo ak a mitongtong ed sika, katawan ko, tan ipangasim pan dengelen so ibagak ed sika. Ibagak ed sikay katwaan.

6No sumpalen moy simbawak, manggawa so Dios na matalonggaring a bengatla diad panamegley mo, tan ontua so planom.

7Ta sasambaan kod sika diad panamegley na bilay tan biskeg nen Nabucodonosor, say ari na intiron mundo tan say angibakid sika a mangiter na oksuy ed amin a totoon nanaoleyan ed nanarian to, ya aliwan saray totoo labat so napanlilingkur mod sikato, no ag ingen ontotoluk met ed sikato iray baka, saray ayayep ed katakelan, tan saray manok ya atap. Lapud sika, onaligwas si Nabucodonosor tan say intiron nanarian to.

8Nadngelan mi so ontan lan inkakabat tan inkasilib mo. Amta na intiron mundo a sikay pangulon sankamaungan, sankarunongan, tan sankarakelay nagagawaan diad intiron Impirio na Asiria.

9Inyagel na saray totood Betulia si Akior, tan imbaga tod sikami so sinalita tod konsihom a para bakal.

10Ipangasim, katawan, ya ag mo ipapasen ya andi-kakanaan so imbaga nen Akior, no ag ta sisiam lapud tua. Anggapoy siopaman a makapasakit odino makadakep ed saray totoo mi likud no mankakasalanan irad Dios da.

11Balet anggapoy kataloan mo, tan andi-duruwan nagamuran moy getmam. Ompatey iray Israelita no mankasalanan ira tan pampasnuken day Dios da.

12Kinmulang lay kakanen da, tan dagdaiset lay nainom da, kanyan nampapaknaan dan pateyen da ray ayayep da tan kanen da ray taganon malinlinew ya isesebel na Ganggan na Dios.

13Nannononungan day mangan na trigon imbiig ed ononan naani tan say kakaplo na alak tan larak; masanto ra ya tan nigana ran para saray papari a manlilingkur ed Dios diad Jerusalem. Sebel ed saray arum ed sikami so anggan maniwit ed sarayan masanton kakanen,

14balet bangta sinumlang la na saray totood Jerusalem iyan ganggan, saray totood baley mi et angibaki rad Konsihod man, ta onkerew iray abuloy ya onalig ira

15Diad agew a naawat day abuloy tan kanen da may tagano, napatey mo ra.

16Nen akabatan ko ya, imbatikan kon tampol iray totook. Imbaki ak na Dios a manggawa a kaiba ta ka na bengatlan pankelawan na amin a totoo ed intiron mundo a makadngel ed saya.

17Katawan, rilihioso ak a bii; igagalang kod agew tan labi so Dios na tawen. Manayam ak diad kampon tan kapag labi onla ak ed patar a mampikasi ed Dios, et ibaga tod siak no kapigay pankasalanan na saray Israelita.

18No naamtaan ko, ibagak a tampol ed sika, tan nayarian mo tan saray sondalom so onsulong. Ag nayarin iyagel na saray Israelita so sikaran dili ed sika.

19Iwanwan ta ka ya ombaliw ed pegley na dalin na Juda ya anggad pakasabi tayod Jerusalem, a dimay pangoronaan kod sika ya ari diad pegley na siudad. Ikaykayat mo ray totood Jerusalem a singa ra saray karniron anggapoy pastol. Ag ka anggan dangulan na aso. Impaonan imbagad siak ya na Dios tan imbaki to ak a mangibalitad sika.

20Aliketan si Holofernes tan saray dilin aripen to lapud saramay imbaga nen Judit, tan indayew day kakabatan to.

21Sikato la angangkoy biin sankakabatan tan sankagangganaan ed intiron mundo, kuandad sakey tan sakey.

22Insan inkuanen Holofernes ed sikato, Agaylay abig, ta imbaki ka dia na Dios a mangiter ed sikami na pananalo tan pakapatey mid saramay nampabaing ed kinen Ari Nabucodonosor.

23Aliwa labat a maganggana ka, no ag ingen amtam met so mansalita. No gawaen moy insipan mo, magmaliw a Dios ko so Dios mo. Manayam ka ed palasio nen Nabucodonosor tan magmaliw kan bantug ed initron mundo.