SARAY ARARI 23 - Maung a Balita Biblia (PnPV)(PnPV)

Impolisay nen Josias so Paganon Panangigalang(2 Awa. 34:3-7,29-33)

1Impaawit nen Josias iray amin a pangulo na Juda tan Jerusalem,

2insan ira nambabansag a linmad Timplo, a kaolup da ray papari tan saray propita, tan amin da ray arum a totoon manaayam ed Jerusalem, mayaman may mairap-bilay. Imbasa na ari diad arap dan amin so intiron libro na sipanan ya arumog ed dalem na Timplo.

3Nanalagey ed abay na lusek a para ari, insan akisipanan ed Katawan ya onuren toy Katawan, sumpalen to diad intiron puso tan kamarerwa to iray ganggan tan bilin to, tan gawaen to iray kakaukolan na sipanan onung na nisulat ed samay libro. Insipan met na amin a totoo a sumpalen da so sipanan.

4Insan ingganggan nen Josias so Pangulon Pari a si Helcias, saray mananulong ton papari, tan saray nipasen a guardia ed lolooban na Timplo ya ipaway dad Timplo iray amin a kagawaan ya ikakanad pangigalang ed Baal, diosan Asera, tan saray bitewen. Pinoolan na ari ira yan amin a kagawaan ya ikakanad pangigalang ed Baal, diosan Asera, tan saray bitewen. Pinoolan na ari ira yan amin diad paway na siudad diad asingger ed Patar na Cedron, insan to impaiyakar ed Betel so dapul da.

5Inekal tod kimey iray kinonsagra na saray ararid Juda a papari a mambagat ed saray paganon altar diad saray siudad na Juda tan diad saray pasen ya asingger ed Jerusalemamin da ray paparin angibagat ed Baal, agew, bulan, saray planita, tan saray bitewen.

6Inekal tod Timplo so masanton tiken a nisaklang ed Asera, impaway tod siudad tan inyakar tod Patar na Cedron, pinoolan to, minekmek to ya anggad nagmaliw a dapul, insan to impokopuk ed kamposantoy karaklan.

7Dineral to ray kuarton walad dalem na Timplo ya ayaman na saray marotak a bibii tan lalaki. (Diman so nanggagawaan na saray bibii ed saray kawes ya inkakanad pangigalang ed Asera.)

8Inyakar tod Jerusalem iray paparin walad saray siudad na Juda, tan diad intiron bansa ginagawa ton andi-kabaliksan iray altar a nambabagatan da. Inggeba to met iray altar a nisaklang ed saray dimonyon kanding diad asingger ed puirtan ginawa nen Josue, say gobirnador na siudad. Walad nikawigi na puirta na siudad ira may puirta no onloob kad siudad.

9Ag naabuloyan a manlingkur ed dalem na Timplo ira may papari, balet nayarian day mangan na anggapoy libaduran tinapay a niparaan para saray kapara ran papari.

10Ginawa met nen Ari Josias ya andi-kabaliksan so Tofet, say pasen na panangigalangan na saray pagano diad Patar na Hinom, pian anggapo lay makapangisaklang ed dios a Molec na anak ton laki o bii.

11Inekal to met iray kabayon insaklang na saray ararid Juda diad pangigalang ed agew, insan pinoolan to ray karwahin inkakana ed sayan panangigalang. (Nikolung tan niiyan ira yan kabayo tan karwahi diad dalem na patioy timplo ya asingger ed puirta tan ag arawid ayaman nen Natanmelec a sakey a manonan opisyal.)

12Inggeba nen Ari Josias iray altar a ginawad toktok na palasio na saray ararid Juda, tan wala rad tagey na nanayaman nen Ari Acaz. Inggeba to met iray altar a ginawa nen Ari Manases diad duaran patio na Timplo; minekmek to ra, insan to ra imbantak ed Patar na Cedron.

13Ginawa met nen Josias ya andi-kakanaan iray altar a ginawa nen Ari Solomon diad bokig na Jerusalem, abalaten na Palandey na Oliba. Sarayan altar et para pangigalang ed saray makapaingungot a talintao na saray diriyosAstarte a dios na Sidon, Kemos a dion na Moab, tan Molec a dios na Ammon.

14Minekmek nen Ari Josias iray baton lusek, binatang tod sengeg so masanton tiken a nisaklang ed diosan Asera, insan to tinabunan na pokel da ray inaatey so dalin a niletnegan da.

15Inggeba met nen Josias so pasen a panangigalangan diad Betel a ginawa na lakin anak nen Nebat a si Ari Jeroboam a nilagyat ton nankasalanan so Israel. Inggeba nen Josias imay altar, minekmek to ray bato ya anggad dinmabuk ira; pinoolan to met so masanton tiken a nisaklang ed diosan Asera.

16Insan linmingaw-lingaw ed kaliber-liber si Josias, et anengneng to ray pigaran lobuk diad pokdul; impaala toy karga ran pokel, insan to ra pinoolan ed tapew na altar. Diad onya ginawa ton andi-kabaliksan imay altar onung na impasakbay lan abayag na propita nen manalalagey ed abay na altar si Ari Jeroboam legan na pista. Linmingaw-lingaw ed kaliber-liber si Ari Josias, et naimano toy lobuk na samay propita ya angipasakbay ed saya.

17Siopay akanlobuk ed saman? tepet to.

Inmebat iray totood Betel, Lobuk na samay propitan nanlapud Juda tan angipasakbay ed saray ginawam ed sayan altar.

18Ag yo didiwiten, ganggan nen Josias. Ag nepeg ya iyalis iray pokel to.

Kanyan ag nialis iray pokel to, anggan saray pokel na samay propitan nanlapud Samaria.

19Diad balang siudad na Israel inggeba nen Ari Josias ya amin iray paganon pasen a panangigalangan ya impapaalagey na saray ararid Israel ya apampasnuk day Katawan lapud saya. Inggeba ton amin iray altar a singa impangigeba tod altar na Betel.

20Pinatey ton amin iray paganon papari diad tapew na saray altar a nanlilingkuran da, tan pinoolan tod tapew na balang altar iray pokel na inaatey. Insan pinmawil ed Jerusalem.

Sinilibraan nen Josias so Paskua(2 Awa. 35:1-19)

21Si Ari Josias ingganggan to ray katoowan a silibraan day Paskua a pamagalang dad Katawan a Dios da, onung na nisulat ed libro na sipanan.

22Anggapoy Paskua ya asilibraan na singa onya na anggan siopan ari na Israel o Juda, nanlapu lad samay panaon ya inoleyan na huis so bansa.

23Asilibraan a siansia so Paskua ed Jerusalem, nen kumalabinwalon taon na panooley nen Josias.

Saray Arum ya Inooman nen Josias

24Pian nasumpal nen Ari Josias iray ganggan a nisulat ed libron nalmo na Pangulon Pari a si Helcias diad dalem na Timplo, pinataynan tod Jerusalem tan diad intiron Juda iray amin a manangipanon ed saray ispiritu na inaatey tan amin a managpalar, tan inekal to ray diriyos ed abung, saray talintao, tan amin a bengatlan igagalang na saray pagano.

25Diad saray ararin akaona tan tinmombuk ed sikato, anggapoy miparad sikato a nanlingkur ed Katawan diad intiron puso, kanunotan, tan biskeg to; inonur ton amin iray Ganggan nen Moises.

26Balet ag ni kinmepa ya anggad natan so mapalalon pasnuk na Katawan ed Juda lapud saray ginagawa nen Ari Manases.

27Inkuan na Katawan, Gawaen kod Juda so singa ginawak ed Israel: pataynanen ko ray totood Juda, tan ipolisay koy Jerusalem, say siudad a pinilik. Ipolisay ko met so Timplo, say pasen ya imbagak a pangigalangan ed siak.

Say Samput na Impanoley nen Josias(2 Awa. 35:20—36:1)

28Nisulat ed libron Say Awaran da Ararid Juda iray arum nin ginagawa nen Josias.

29Legan na panaari nen Josias, impangulo nen Ari Neco na Egipto ed Ilog na Eufrates so sakey ya olup na saray sondalo, ta tulongan toy ari na Asiria. Inatey ed bakal si Ari Josias nen diad Megido et inabet ton patondaen ira may sondalo na Egipto.

30Saray opisyal to inlogan dad karwahi so bangkay to, insan da inyakar ed Jerusalem tan diman nipompon ed kamposanto da ray arari.

Pinili na saray totood Juda si Joacaz a lakin anak nen Josias, insan nilanaan dan manari ya onsalat ed kinen ama to.

Si Ari Joacaz na Juda(2 Awa. 36:2-4)

31Duamplo tan taloy taon nen Joacaz nen nagmaliw ya ari na Juda, tan nanoley ed Jerusalem na taloy bulan. Say ina to si Hamutal ya anak nen Jeremias a taga siudad na Libna.

32Nanggagaway kaogsan ed arap na Katawan, a singa ginagawa na saray lalaki to.

33Nansamput so impanoley to nen adakep nen Ari Neco na Egipto, insan to inawit ed Ribla, diad dalin na Hamat. Impanbuis nen Ari Neco so Juda na talon libo tan liman lasus a kilon pilak, tan talomplo tan liman kilon balituk.

34Si Ari Neco impasen ton ari na Juda si Eliakim a lakin anak nen Josias. Insalat tod kinen Josias tan sinalatan toy ngaran to na Joakim. Inawit nen Neco si Joacaz ed Egipto, tan diman la inatey.

Si Ari Joakim na Juda(2 Awa. 36:5-8)

35Nanaala na buis si Ari Joakim ed saray totoo onung na kapetekay kayamanan da, pian makatipon na ibayar ed kakaukolan na ari na Egipto.

36Duamplo tan limay taon nen Joakim nen nagmaliw ya ari na Juda, tan nanoley ed Jerusalem na labinsakey taon. Say ina to si Zibida ya anak nen Pedayas a taga baley na Ruma.

37Nanggagawa na kaogsan ed arap na Katawan si Joakim, a singa ginagawa na saray lalaki to.