1Say Katawan kuantod kinen Moises, Manabas ka na duaran tapyak a bato a singa saramay inmona, ta itatak kod sikara iray salitan nitatak ed saramay inmonan duaran tapyak a bato ya imbetag mo.
2Mamparaan ka nabwas na kabwasan, kalab kad Palandey na Sinai, tan bana mo ak dimad tagey to.
3Anggapoy nepeg a milad sika; anggapoy toon nepeg a nenengneng ed anggan iner a pasen na palandey; nepeg met ya anggapo so karniro odino baka a mankabkab ed alusadsar na palandey.
4Kanyan si Moises anabas na duaran tapyak a bato, tan diad kabkabwasan na ontombuk ya agew inawit to rad tagey na Palandey na Sinai, onung na ingganggan na Katawan.
5Say Katawan inmakseb diad panamegley na sakey a lorem, nanalagey diman a kaiba toy Moises, tan imbawag toy ngaran to a Yahweh.
6Say Katawan ed satan linmabas ed arap nen Moises tan imbawag to, Siak a Katawan so sakey a Dios a maaro tan mapangasi; aliwa ak a maipapasnuk tan napno ak na baleg a panangaro tan katooran.
7Tooren koy sipan kod saray libo-libon kailalakan tan pirdonaen koy kaogsan tan kasalanan; balet dusaen kon dusaen iray anak tan apo, anggad kumatlo tan kumapat a kailalakan, lapud saray kasalanan na saray atateng da.
8Tampol a dinmakmomo ya anggad dalin si Moises tan angigalang.
9Inkuantod, Katawan, no talagan makaliliket kad siak, kerewen kod sikan mila kad sikami. Anawet so olo na sarayan totoo, balet pirdonam pa ray kaogsan tan kasalanan mi, tan awat mo kami a totoom.
Say Impakapasimbalo na Sipanan(Exo. 23:14-19; Deut. 7:1-5; 16:1-17)10Say Katawan kuantod kinen Moises, Misipanan ak natan ed saray Israelita. Diad arap da manggawa ak na saray makapakelaw a bengatla ya ag nin balut agawa ed inerman a pasen diad saray bansa ed tapew na dalin. Amin a katoowan nanengneng da ray makapakelaw a gawaen ko, siak a Katawan, lapud manggawa ak para sikayo na makapakebyew a bengatla.
11Onur yo ray ganggan ya iter ko natan ed sikayo. Pagiten ko ray Amorreo, saray Cananeo, saray Heteo, saray Perezeo, saray Heveo, tan saray Jebuseo legan na pankukurang yo.
12Ag kayo misisipanan ed saray totood bansa a laen yo, ta nayarin patit ya ed sikayo.
13Igeba yo ingen iray altar da, deral yo ray masanton lusek da, tan batang yo ray tanda na diosa ran Asera.
14Ag kayo mangigagalang ed arum a diriyos ta siak a Katawan et maimon ak a Dios.
15Ag kayo misisipanan ed saray totood bansan laen yo, ta no mangigalang irad diriyos da tan mangibagat irad sikara, bagaan da kayon mibiang ed sikara, et natukso kayod satan a mangan na kakanen ya ibabagat da ed saray diriyos da.
16Saray lalakin anak yo et asingger a mangasawa ra na saray bibiin anak da, et natanggoyur da ran ombeneg ed siak tan mangigalang ed saray diriyos da.
17Ag kayo manggagawa na inmoldoran diriyos a galangen yo.
18Silibraan yoy Pista na Tinapay ya Anggapoy Libadura. Onung na ingganggan kod sikayo, mangan kayo na tinapay ya anggapoy libadura ed loob na pitoran agew no bulan na Abib, ta saman imay bulan ya impanaynan yod Egipto.
19Amin a lakin pangulowan tan amin a besag a kalakyan ya amon ayep et kayaryan ko,
20balet nepeg yon dondonen so balang besag ya asno diad pangibagat yo na sakey a kordiro a mangalay pasen to. No ag yo dondonen, poter yoy beklew to. Dondon yo so balang pangulowan a laki.
Balang toon ondagod siak nepeg a walay awit ton bagat.
21Walay anem agew a pakapankimey yo, balet mampainawa kayo no kumapiton agew, anggan panaon na panagbaka odino panagani.
22Silibraan yoy Pista na Panagani no igapo yo lay manani na onaan a bungay trigo yo, tan silibraan yoy Pista na Abung-abung diad samput na taon no borboren yo la ray bungay kakiewan.
23Diad loob na sakey taon amin da ray lalaki ed sikayo et nepeg a mamitlo ran ondago a mangigalang ed siak a Katawan, say Dios na Israel.
24Kayarik a pagiten iray totood bansan looban yo tan no apaawang ko lay dalin yo, anggapo lad satay toon manakop na bansa yo legan na taloran pista ya abitla.
25Ag kayo mangibabagat na tinapay a pinaalsad libadura no mangisaklang kayod siak na ayep. Ag kayo mangikekera ya anggad kabwasan na antokaman a parti na ayep a pinatey no Pista na Paskua.
26Kapag taon iyakar yod abung na Katawan a Dios yo so ononan trigon naani yo.
Ag yo ilulutod gatas na ina to so kordiro odino kilaw na kanding.
27Say Katawan kuantod kinen Moises, Isulat mo ra yan salita, ta sikara yay letnegan na pisisipanan kod sika tan say Israel.
28Diad loob na apataploy agew tan labi si Moises kaiba tod tagey na palandey so Katawan; ag balut angan, ni inminom. Intatak tod saray tapyak a bato iray salita na sipanansaray Samploran Ganggan.
Say Inakseb nen Moises Manlapud Palandey na Sinai29Nen inmakseb a nanlapud Palandey na Sinai si Moises a sankaawit to ray Samploran Ganggan, sinminag so lupa to lapud akisalita ed Katawan; balet ag to ya amta.
30Si Aaron tan amin a totoo ninengneng day Moises, et anengneng da a masnag so lupa to, kanyan antakot iran onsingger ed sikato.
31Balet si Moises pinaasingger to ra di Aaron tan saray amin a pangulo na katoowan tan akisalitad sikara.
32Kayari to ya, si Moises minungkog na amin ya Israelita, tan inter tod sikara iray amin a ganggan ya inter ed sikato na Katawan dimad tagey na Palandey na Sinai.
33Kayari na impitongtong nen Moises ed sikara, sinakbungan to so lupa to.
34Kapag si Moises onlan mitongtong ed Katawan diad dalem na Tuldan Ayamay Katawan, ekalen toy sakbung na lupa to. Kapaway to, ibaga tod saray Israelita iray amin ya ingganggan na Katawan;
35nanengneng na saray Israelita a masnag so lupa to. Insan to sakbungan so lupa to ya anggad iyakar ton pitongtong lamet ed Katawan.
Who We AreWhat We EelieveWhat We Do
2025 by iamachristian.org,Inc All rights reserved.
