JOB 39 - Maung a Balita Biblia (PnPV)(PnPV)

1Amtam no kapigan so kianak na saray kanding ed palandey?

Abantayan mo lan manaanak iray ulsad katakelan?

2Amtam no panoy kabayag na panlokun da?

Amtam no kapigay pananak da?

3Amtam no kapigay ikorung dan mampasakit,

tan ipaway da ray anak da?

4Ombaleg tan ombiskeg ed kalawakan iray anak da;

ontaynan ira tan ag la ra ompawil.

5Siopay angiter na kawayangan da ray asnod katakelan?

Siopay angibolus ed sikara tan impantawataw to ra?

6Inter kon panayaman da so kalawakan

tan impanayam ko rad saray maasin a patar.

7Aarawian da ray maingal a siudad;

anggapoy makapaamo

tan makapangikimey ed sikara.

8Say kapalandeyan so pastulan a pankakabkaban da,

a dimay panaanapan day malambut a dikan kanen da.

9Napankimey mo so kalakyan a bakad katakelan?

Maabuloy a manayam a sanlabi ed koral a ginawam?

10Nasinger moy sakey a bakan kalakyan, pian napambakam?

Odino napansagar mod kaalogan mo?

11Napanmatalkan mo so ontan lan biskeg to

tan napanilaloan mon gawaen toy kimey mo?

12Napanilaloan mo a mangisempet na naanim,

tan mangisinup na ilik a manlapud panagilikan mo?

13Agaylay peles na pamparakpak na saray payak na manok ya abistrus!

Balet anggapoy abistrus a makatikyab a singa dulakak.

14Say abistrus ititilak tod dalin iray iknol to,

pian napetangan ira ed dalin.

15Ag to balet amta a nayarin nagatinan ira na too,

odino betagen ira na ayep ed katakelan.

16Ipapasen ton singa ag to kayaryan iray iknol to,

tan anggapoy walad sikato anggan nadarak so sagput to.

17Siak so nanggawad sikato ya anggapoy kalakal,

tan ag ko initdan na kakabatan.

18Balet no sikatoy ombatik,

elekan toy kabayo tan say akakabayon onoosil ed sikato.

19Sika, Job so angiter na biskeg ed kabayo

tan amatobod tenger to na marakep a buek?

20Sikay angiter ed sikara na pakayarin makalukso ran singa dorun,

tan napatakot da ray totoo lapud pamponges da?

21Ikokosay-kosay day dalin ed patar;

iyooput day biskeg dan onkoyat ed bakalan.

22Ag da amta so ontakot odino ompaga,

tan ag ira napasoner na anggan anton ispada.

23Mankidiam tan makalangakang iray armas

a sankaawit na saray akakabayod sikara.

24Diad sebeg tan pasnuk agaylay peles dan ombatik;

no trumpitay apaknul ag ira makapandeen.

25Omponges ira kapag napaknul so trumpita;

nasisingob day bakal anggan arawi ni ra,

tan narerengel da ray ganggan na saray sondalon opisyal.

26Sikay panaaralan na baga ya ontikyab

sano buskagen to ray payak ton mamaarap ed abalaten?

27Manoobung ed tagey na kapalandeyan so agila lapud ganggan mo?

28Manaayam ed toktok na saray sankatageyan a bato

tan onsasanib-sanib ed saray bato.

29Diad sayan pasen mantatalaran na nayarian ton pateyen tan kanen;

nanenengneng toy anggan saray walad arawi.

30Saray agila mankokompug irad kawalaay bangkay,

tan saray anak da sosopsopen day dala.