JOB 26 - Maung a Balita Biblia (PnPV)(PnPV)

1Inmebat si Job:

2Agaylay impanulong mod siak,

siak a sakey ya anggapoy lay pakayari,

tan naandian na biskeg!

3Agaylay abig na simbawan inter mod siak,

tan say kakabatan ya inter mod siak anta makulang-kulang ak.

4Siopay abaloan mon ondengel ed amin a salitam?

Siopay angipuyan ed sikan mansalita na singa onya?

[Inmebat si Bildad]

5Mampayegpeg iray ispiritu na saray inaatey a wala rad danum diad silong na dalin.

6Sankanengneng na Dios so pasen a panaayaman da ray inaatey;

anggapoy makasanib ed mata to.

7Impanat na Dios so baybay a tawen,

tan imbitin tod liwang so mundo.

8Sikatoy mamapano na danum ed saray lorem,

tan mamopokpok ed ipelag da anggan ambelat la ra.

9Iyaamut tod sanib na lorem so baleg a bulan.

10Imbiig toy liwawa ed bilonget,

diad panamegley na malimpek a gulis ed tapew na dayat.

11No pampasnukan to ray lusek na tawen,

onggalaw tan onggiwgiw irad takot.

12Lapud pakayari to tinalo to so dayat,

lapud karunongan to pinatey toy dragon a Rahab.

13Lapud ingas to pinaliwawa toy tawen,

tan diad lima to pinatey toy ombabatik a dragon.

14Melag labat ira yan kabyangan na pakayari to;

esaes labat so nadngel tayo.

Siopay makapikabat no kaonungay kabaleg na pakayariy Dios?