EXODO 25 - Maung a Balita Biblia (PnPV)(PnPV)

Saray Bagat a para Ayaman na Katawan(Exo. 35:4-9)

1Say Katawan kuantod kinen Moises,

2Ibagam ed saray Israelita a mangibagat irad siak. Awat mo so antokaman a bagat ya iter a mabolbolus ed siak na siopaman a too.

3Sarayan bagat et say balituk, pilak, gansa;

4pinon linen; asul, purpura tan ambalangan tinebey; abel a bagoy kanding;

5ambalangan pinamagan katat na karniron kalakyan; pinon katat; tablan akasia;

6larak a para saray lamparaan; saray rikadon onkanad panaglana a larak tan ambalingit ya insinso;

7kornalina tan arum iran alahas ya ipepeket ed ipod tan diad apis na pagew na Pangulon Pari.

8Saray totoo et nepeg a manggawa ra na masanton Tuldan para siak, pian makapanayam ak ed kawalaan da.

9Gawam yan Tulda tan amin iray kagawaan to, onung na planon ipanengneng kod sika.

Say Kaban na Sipanan(Exo. 37:1-9)

10Manggawa ka na Kaban ya akasia; apataplo tan liman pulgada so karokey to, duamplo tan piton pulgada so kaawang to, tan duamplo tan piton pulgada so kaatagey to.

11Okupan mod dalem tan paway to na puron balituk tan moldoraan moy balituk iray gilig-gilig to.

12Manggawa ka na apatiran balituk a liken na samay Kaban tan ipeket mod apatiran sali to, duaran liken ed kapag diking.

13Manggawa ka na saray tiken ya akasia a panagsakbatan tan okupan mo ra na balituk,

14insan mo ra isolung ed saray liken na kapag diking na Kaban.

15Nepeg a natilak ed liken iray tiken tan ag ira ekalen.

16Insan mo ikargad dalem na Kaban iray duaran baton tapyak ya akaitatakan na saray ganggan.

17Manggawa ka na puron balituk a sakub; apataplo tan liman pulgada so karokey to, tan duamplo tan piton pulgada so kaawang to.

18Manggawa ka na duaran kirubin a pinitpit a balituk,

19sakey so para kapag samput na sakub. Gawam iran akatakep ed sakub.

20Saray kirubin et manarapan ira tan sakbungan na saray akabuskag a payak da so sakub.

21Ikargam ed dalem na Kaban iray duaran tapyak a bato tan iyan moy sakub ed tapew to.

22Banaen ta kad man tan diad tagey na sakub, diad nampegleyan na duaran kirubin, iter kod sika ray amin a ganggan kod saray Israelita.

Say Lamisaan a Pangitapewan na Tinapay ya Imbagat ed Dios(Exo. 37:10-16)

23Manggawa ka na lamisaan ya akasia; talomplo tan anem a pulgada so karokey to, labinwalon pulgada so kaawang to tan duamplo tan piton pulgada so kaatagey to.

24Okupan mod tapew to na puron balituk tan moldoraan mo na balituk iray gilig-gilig to.

25Igawaan moy pinagkakuadro to a taloran pulgaday kalapar tan diad saray gilig-gilig to moldoraan mo na balituk.

26Igawaan mo na apatiran panakbatan a balituk a liken tan ipeket mo ed apatiran suyok a kawalaan na saray sali.

27Saray liken a pangisolungan na saray tiken a panagsakbatan ed lamisaan et ipeket ira ed abay na pinagkakuadro.

28Akasian kiew so gawaen mon tiken tan okupan mo na balituk.

29Manggawa ka na saray plato, saray kupa, saray ankelag a pasig, tan saray yaung ya ikanad saray bagat ya alak. Amin da ra ya et balituk.

30Diad tapew na lamisaan mangyan ka lawas na tinapay a nibagat ed siak.

Say Panangipatoonan na Lamparaan(Exo. 37:17-24)

31Manggawa ka na puron balituk a panangipatoonan na lamparaan. Pinitpit a balituk so dapan to tan say sengeg to. Itekep mod saya iray rosas a pati saray simit tan pital.

32Anemiran sanga so akaonat ed saray diking to; talora ed balang sakey.

33Say balang sakey ed saray anemiran sanga to et nepeg a walay taloran rosas tan singa almindras a pati saray simit tan pital.

34Say sengeg na panangipatoonan na lamparaan et nepeg a walay apatiran rosas to a singa almindras, a pati saray simit tan pital.

35Nepeg a walay sakey a simit ed kapag silong na taloran paris a sanga.

36Saray simit, saray sanga, tan say panangipatoonan na lamparaan et nepeg a nantetekep iran pinitpit a puron balituk.

37Manggawa ka na pitoran lamparaan tan ipatoon mo rad panangipatoonan, pian onwandag ira ed bandad arap.

38Manggawa ka na saray puron balituk a panagpotut na pabilo tan saray delsangan.

39Talomplo tan kapalduan kilo a puron balituk so ikanam ed panggawa na panangipatoonan na lamparaan tan amin da ra yan kagawaan.

40Gawam ira onung ed samay planon impanengneng kod sika dimad tagey na palandey.