Salmo 26 - Maung a Balita Biblia (PnPV)(PnPV)

Say Pikakasi na Maung a Too

1 Katawan, ibawag mo pan anggapoy kasalanan ko,

ta maung iray gagawaen ko

tan sigput so panmamatalek kod sika.

2Sokayan tan subok mo ak pa, Katawan;

sintinsiaan mo pa ray pilalek ko tan saray kanunotan ko.

3Iwawanwan ak na ag mangoman a panangarom;

itotonton ak lawas na katooran mo.

4Ag ak mililimug ed saray totoon andi-kakanaan;

ag ak mibabalid saray mansimpisimpitan.

5Kabosul koy olup da ray totoon maoges,

tan papaliisan ko ray managgaway kaogsan.

6 Katawan, oorasan ko ray limak a pangipanengneng kon anggapoy kasalanan ko,

tan liliberen koy altar mo diad pangigagalang kod sika.

7Maksil so pangakantak na imnon pisasalamat,

tan ibabagak ya amin iray makapakelaw a gawgawam.

8 Katawan, inarok so abung a panaayaman mo,

say pasen a kawalaay kagalangan mo.

9Ag mo ak pa pidudusad saray makasalanan;

ipaliis mo ak pad pansumpalan da ray managpatey na too

10saray totoon manggagawa lawas na kaogsan

tan sipaparaan ira lawas a mangawat na pasoksok.

11Siak balet, maung so gagawaen ko;

kasian tan ilaban mo ak pa!

12Arawi ak ed antokaman a kaatapan;

idadayew koy Katawan diad olup da ray totoo to.