JUDIT 1 - Maung a Balita Biblia (PnPV)(PnPV)

Say Bakal di Nabucodonosor tan Arfaxad

1Nen manooley si Nabucodonosor ed Asiria tan manaayam ed manona ton siudad na Ninive, manooley si Ari Arfaxad ed Media tan manaayam ed manona ton siudad na Ecbatana.

2Niliber nen Ari Arfaxad so Ecbatana na padir, a talomplo tan apat a mitro so kaatagey to, duamplo tan talon mitro so kalapar to. Tinabas iran bato so inkana; sakey tan kapalduan mitro so kakapal na balang sakey tan taloran mitro so karokey.

3Diad balang sakey a puirta angipaalagey na tori a limamplon mitro so kaatagey to, tan talomplon mitro so kakapal na pundasion to.

4Talomplo tan apat a mitro so kaatagey na balang puirtan lolooban tan duamplon mitro so kaawang to; nayarin dalanen na amin a sondalo to, a dugad lira iray sondalon akaran.

5Diad kumalabinduan taon na panooley nen Ari Nabucodonosor, linman akibakal ed Ari Arfaxad diad maawang a patar a kaliber-liber na siudad na Rages.

6Amayamay iray bansa ya akigampid Ari Arfaxad amin da ray totoon manaayam ed kapalandeyan, saray totoon manaayam ed gilig na saray ilog na Tigris, Eufrates tan Idaspes, tan saray totooon manaayam ed patar ya ooleyan nen Ari Arioc na Elam. Amayamay iray bansa ya akikasakey ed sayan impanmomoyung da ray Kelodita.

7Nampabakian nen Ari Nabucodonosor iray totood Persia tan saray totoon manaayam ed sagur, saray lugar na Cilicia, Damasco, Libano, Antelibano, saray gilig na dayat,

8tan saray taga Carmelo, Galaad, baybay na Galilea, tan Patar na Jezreel.

9-10Nampabakian to met iray totoon manaayam ed Samaria tan saray baley a kaliber-liber to, saray totoon manaayam ed sagur na Ilog na Jordan ya anggad saray siudad na Jerusalem, Betania, Kelus, Kades, tan diad distritoy Gosen. Nipaamta met ed totood saray siudad na Egipto, Tapanhes, Rameses, Tanis, Tan Memfis tan diad distrito na Ilog na Nilo ya anggad ketegay Sudan.

11Balet ag dinengel na amin a totood sarayan pasen si Ari Nabucodonosor tan ag da labay so mibakal. Inisip da ya anggapoy pananalo to, kanyan ag da la tinakotan si Ari Nabucodonosor tan pinapawil dan abaingan tan kalima-lima iray totoon imbaki to.

12Lapud sayan agawa, mapalaloy pasnuk nen Nabucodonosor, kanyan sinambaan ton isuba toy intiron nanarian to diad ibales tod amin da ra yan totoo. Sinambaan to a pateyen ya amin iray totood Cilicia, Damasco, Siria, Moab, Ammon, Juda, tan Egiptoamin da ray totoo, manlapud Dayat na Mediteraneo ya anggad Dayat na Persia.

13Diad kumalabimpiton taon na panooley nen Ari Nabucodonosor, impangulo to ray sondalo to a mibakal sumpad Ari Arfaxad. Tinalo ton amin iray sondalo nen Arfaxad, pati amin a sondalon akakabayo tan saray akakarwahi.

14Insan to sinakop ya amin iray baley diad dalin na Media tan tinuloy ton dinogpaan so siudad na Ecbatana. Adakep to ray tori na siudad, sinamsaman to ray tindaan, tan dineral to man a marakep a siudad.

15Adakep toy Ari Arfaxad diad saray palandey a walad kaliber-liber na Rages tan pinatey tod man. Kapatey nen Arfaxad.

16Si Nabucodonosor tan saray sondalo to et pinmawil irad Ninive a sankaawit day amin ya asamsam dad bakal. Apat bulan a nampainawa tan nampista rad man.