2 SAMUEL 12 - Maung a Balita Biblia (PnPV)(PnPV)

Say Imbaga nen Natan tan say Impagbabawi nen David

1Imbaki na Katawan si propita Natan ed kinen David. Linmay Natan ed sikato tan kuanto, Walay duaran laki a manaayam ed saksakey a baley; mayaman so sakey tan mairap-bilay so sakey.

2Samay mayaman amayamay so baka tan karniro to.

3Samay mairap-bilay saksakey so kordiro to, a sinaliw to. Inasikaso to, tan binmaleg a kaiba na saray anak to. Initdan toy dilin kakanen to, pinapinom tod dilin kupa to, tan inakakwal to. Singa to dilin anak a bii.

4Aminsan ya agew walay sinmabin sangkaili na samay mayaman a laki. Ag labay na samay lakin mayaman so mamatas na dilin ayep to a panagkaili to; ingen, inala to may kordiro na samay mairap-bilay tan sikatoy impanangkaili to.

5Pinmetang a maung so olo nen David ed samay mayaman a too. Inkuanto, Isipan kod mabilay a Katawan a nepeg ya ompatey iman a nanggawad saya!

6Nepeg ton bayaran na mamipat a karakel so inala to, lapud sayan andi-panangasin ginawa to.

7Sika man a too, inkuanen Natan ed kinen David. Onyay kuan na Katawan a Dios na Israel: Ginawa ta kan ari na Israel tan inyagel ta kad kinen Saul.

8Inter kod sikay nanarian to tan saray asawa to; ginawa ta kan ari na Israel tan Juda. No kinmulang ni ya, initdan ta ka ni komun na singa karakel na inter ko lad sika.

9Akin sirin et ag mo inonur iray ganggan ko? Akin et ginawam yan kaogsan? Impapatey mod bakal si Urias; inabuloyan mon pinatey na saray Ammonita, insan mo inasaway asawa to!

10Natan sirin diad balang kailalakan, pigaran kabyangay boleg mo so napatey diad panamegley na ispada, lapud ag mo ak inonur tan inasawam so asawa nen Urias.

11Tandaan mo, dagdagen ko a manngunigon ed sika so sakey a kabyangay pamilyam. Naimatunan mo ya, no alaen ko ray asawam insan ko ra iter ed sakey a laki; akdulan to ra ya anggan agew.

12Maamut so impankasalanan mo, balet abuloyan ko yan nagawa ed agew, pian naimatunan na intiron Israel!

13Nankasalanan ak ed Katawan, kuanen David ed kinen Natan.

Inmebat si Natan, Pinirdona ka na Katawan; ag ka ompatey.

14Balet lapud sinumpam so Katawan diad impanggawam ed sayan kaogsan; ompatey so anak mo.

15Insan sinmempet lay Natan.

Inatey so Lakin Anak nen David

Impaninagem na Katawan so ogaw ya anak nen David ed asawa nen Urias.

16Nampikasiy David a paabigen na Dios komun imay ogaw. Ag mangan si David; labi-labin onloob ed kuarto to tan mandokul ed datal.

17Laen na saray opisyal na palasio a bangonen, balet ag to, tan ag mangan a kaiba to ra.

18Kalabas na sakey simba, inatey so ogaw; antakot iray opisyal nen David a mangibalitad sikato. Inkuanda, Nen mabilay ni may ogaw, ag itayo inebatan nen David nen akitongtong itayod sikato. Panoy pangibaga tayod sikaton inatey so anak to? Ompan manggaway maoges ed sikaton dili?

19Nen naimano nen David a maneesaesan ira, atalusan ton inatey lay ogaw. Kanyan tinepet tod sikara, Inatey lay ogaw?

On, inatey la, ebat da.

20Binmangon ed datal si David, nanames, nansagaysay, tan nampales. Insan linman angigalang ed abung na Katawan. Nen pinmawil ed palasio, kinmerew na nakan, tan kapangisaklang da, angan.

21Ag mi ya natalusan, kuan na saray opisyal to ed sikato. Nen mabilay ni may ogaw, ineerman mo tan ag ka mangan; balet kapatey to, binmangon ka tan angan ka!

22On, ebat nen David. Nanayuno tan nanermen ak legan a mabilay ni. Abaloan kon kasian ak na Katawan tan ag to abuloyan ya ompatey so ogaw.

23Balet natan ta inatey la, akin et manayuno ak? Napabilay ko ta ni? Onsabiy agew ya onla ak ed pasen a kawalaan to, balet ag to lan balut makapawil ed siak.

Nianak si Solomon(1 Awa. 20:1-3)

24Niligliwa nen David si asawa ton Bat-seba tan inakdulan to. Nananak na sakey a laki si Bat-seba. Solomon so inngaran nen David ed ogaw. Inaro na Katawan so ogaw,

25tan ingganggan toy Natan a ngaranan toy ogaw na Jedidia, ta inaro na Katawan.

Adakep nen David so Rabba(1 Awa. 20:1-3)

26Intuloy nen Joab so impibakal tod Rabba, say manonan siudad na Amnon. Nen ngalngali to la nadakep,

27angibaki na saray totoon mangibalitad kinen David: Dinogpaan koy Rabba tan nalak lay dipositoy danum na siudad.

28Tipon mo ray arum a sondalom, dogpaan yoy siudad tan sikan diliy manakep. Ag ko labay a siak so napagalangan ed pakadakep ed siudad.

29Kanyan tinipon nen David iray sondalo to, linmad Rabba, dinogpaan to tan adakep to.

30Say talintaoy dios na saray Ammonita a si Milcom et walay balituk a korona to a mambelat na sakey a talomplo tan apat a kilo, walay mablin bato ed samay korona. Inala nen David imay bato, insan to inyan ed korona to. Amayamay met ni ray nala ton bengatla ed siudad,

31tan impankikimey to ray totood man diad panamegley na saray ligari, buka, balatyang, tan wasay a balatyang. Pinapasoot to ran impanggagaway ankakabaleg a laryo. Onya met so ginagawa tod saray totood arum a baley na Amnon. Insan pinmawil ed Jerusalem a kaiba to ray totoo to.