1Nen kumalabinwalon taon na panooley nen Ari Jeroboam ed Israel, nagmaliw ya ari na Juda si Abiam.
2Nanoley na taloy taon ed Jerusalem si Abiam. Say ina to si Micaya ya anak nen Uriel a taga siudad na Gabaa.
Ginmapo so bakal dan dua di Abiam tan Jeroboam.
3Apat a lasus a libo so sondalon impibakal nen Abiam; walon lasus a libo balet si Jeroboam.
4Nambabanad kapokdulan na Efraim iray sondalo. Kinmalab ed Palandey na Zemaraim si Ari Abiam tan kinolyaotan toy Jeroboam tan saray Israelita. Dengel yo ak! inkuanto.
5Ag yo ta amta a say Katawan, say Dios na Israel, et walay ag naderal ya impisipanan tod David, nen inter tod sikato tan saray kabyangay boleg to so nanarin ed ando lan ando ed Israel?
6Si Jeroboam a lakin anak nen Nebat et linmaban ed Solomon ya ari to.
7Ag abayag anogyup na saray andi-kakanaan a lalaki, tan impasoot day labay da ed lakin anak nen Solomon a si Roboam ya ogaogaw nid saman tan anggapo niy asalsali tod bilay, kanyan ag to ra nalabanan.
8Natan labay yon labanan so pakayari na ari ya inter na Katawan ed saray kabyangay boleg nen David. Dakerakel kayon sondalo, tan walad sikayo ray balituk a bakan kilaw a diriyos yo a ginagawa nen Jeroboam.
9Pinapataynan yo ray papari na Katawan a kabyangan iray boleg nen Aaron; pinapataynan yo met iray Levita. Insan anoro kayo na saray papari a singa gagawaen na saray arum a bansa. Siopamay ondagon sankaawit toy bakan kalakyan odino pitoran karniro et nayari lan magmaliw a pari na saray tatawagen yon diriyos yo!
10Balet, sikami, mansiasiansia kamin manlilingkur ed Katawan a Dios mi tan ag mi inkaindan. Saray papari a say sengeg da et si Aaron so manlilingkur ed Katawan tan tutulongan ira na saray Levita.
11Kapag kabwasan tan labi mangisasaklang irad Katawan na insinso tan saray ayayep a bagat a popoolan. Mangisasaklang iray bagat a tinapay ed lamisaan a malinis onung ed ganggan, tan kapag labi seselselan da ray lamparaan ya akatoon ed balituk a panangipatoonan. Sikami susumpalen mi ray ganggan na Katawan, balet sikayo inkaindan yo.
12Say Dios a dili so pangulo mi, tan wadya ray papari to ya akaparaan lan mamaknul na saray trumpita diad panawag dad sikamin mibakal. Totood Israel, ag yo komun lalabanan so Katawan a Dios na saray lalaki yo! Ag kayo manalo!
13Legan to ya, angibakiy Jeroboam na saray totoo to a biglan ondogpa ed saray sondalo na Juda diad beneg da; saray arum balet a sondalo to akiarapan ira.
14Ninmengneng iray taga Juda ed kaliber-liber da et naimano ra ya aliktub la ra. Tinmawag irad Katawan na tulong, tan pinaknul na saray papari iray trumpita.
15Diad panangipangulo nen Abiam, inmeyaeyag iray taga Juda tan dinmogpa ra; tinalo na Dios si Jeroboam tan saray sondalon taga Israel.
16Imbatikan na saray taga Israel iray taga Juda, tan impanalo na Dios iray taga Juda.
17Mapalaloy impanalo nen Abiam tan saray sondalo to ed saray taga Israelliman lasus libo a sankamaungan a sondalo na Israel iray inaatey.
18Lapud saray taga Juda et nanmatalek irad Katawan a Dios na saray lalaki ra, tinalo da ray taga Israel.
19Inosilan nen Abiam iray sondalo nen Jeroboam tan adakep da ray onggendan a siudad: Betel, Jesana, tan Efron, tan saray barion asingger ed balang sakey ed sarayan siudad.
20Ag la apapawil nen Jeroboam so pakayari to legan na impanoley nen Abiam. Diad kaonuran kinabil na Katawan, et inatey.
21Si Abiam, balet, pinmalaloy pakayari to. Labinapat so asawa to, duamplo tan duay lalaki tan labinanem a bibii iray ilalak to.
22Say arum nin kabyangan na impanbilay nen Abiam, saray sinasalita tan saray ginagawa to et nikorit ira ed Say Awaran nen Propita Iddo.
Who We AreWhat We EelieveWhat We Do
2025 by iamachristian.org,Inc All rights reserved.
