DANIEL 9 - Maung a Balita Biblia (PnPV)(PnPV)

Impikasi nen Daniel iray Totoo to

1Nanoley ed nanarian na Babilonia si Dario a taga Media tan lakin anak nen Asuero.

2Nen ononan taon na panooley to siak, si Daniel, inaral ko ray masanton libro tan ninunot koy nipaakar ed pitomploy taon a kaderal na Jerusalem, onung ed imbaga na Katawan ed kinen propita Jeremias.

3Insan masimoon ak a nampikasi ed Katawan a Dios, nankerew ak ed sikato, nanayuno ak, nankawes ak na sako, tan nanirung ak ed dapul.

4Nampikasi ak ed Katawan a Dios ko tan impatwak iray kasalanan na saray totook.

Inkuanko, Katawan a Dios, matalonggaring ka tan gagalangen mi ka Matoor ka ed impisipanan mo tan ipapanengneng mo lawas so ag mangoman a panangarom ed saray mangaarod sika tan manusumpal na saray ganggan mo.

5Nankasalanan kami, maoges kami, makapoy iray ginagawa mi. Sinumlang tan impolisay mi ray ganggan mo tan saray bilin mod sikami.

6Ag mi dinengel iray aripen mon propita a diad ngaran mo et nansasalita ra ed saray arari mi, saray manoley mi, saray lalaki mi tan say intiron bansa.

7O Katawan, matonung lawas so gagawaen mo, balet impelag miy sikamin dili ed kababaingan. Tua ya ed amin min manaayam ed Juda tan diad Jerusalem; tua met ya ed amin da ray Israelitan inkakayat mod saray bansan walad arawi odino asingger lapud aliwa ran matoor ed sika.

8Makapabaing so ginagawa na saray arari mi, saray manoley mi, tan saray lalaki mi; nankasalanan irad sika, O Katawan.

9Mapangasi tan manamirdona ka, anggaman a sinmumpa kamid sika,

10Ag kami dinmengel ed sika, O Katawan a Dios mi, nen imbagam a mambilay kami onung ed saray ganggan ya inter mod sikami diad panamegley na saray aripen mon propita.

11Sinumlang na amin ya Israelita iray ganggan mo tan ag da nilabay a dengelen so imbagam. Nankasalanan kamid sika, kanyan impelag mod sikami iray samban nisulat ed Ganggan nen Moises ya aripen mo.

12Ginawam so imbagam a gawaen mod sikami tan saray manoley mi. Ag miparad arum a siudad ed tapew na dalin so impanusam ed Jerusalem,

13tan inter mod sikami iray amin a dusan nisulat ed Ganggan nen Moises. Balet anggad natan, O Katawan a Dios mi, ag mi ni gagawaen so pamaliket mid sika diad pangibeneg ed saray kasalanan mi odino pangonur ed katwaan mo.

14O Katawan a Dios mi, akaparaan ka la nen saman a manusad sikami, et dinusa mo kamin tua, lapud matonung lawas so gagawaen mo, tan ag mi ka dinengel.

15O Katawan a Dios mi, lapud pakayarim impaway mod Egipto iray totoom, tan ag nalingwanan ya anggad natan so pakayarim. Nankakasalanan kami; maoges iray ginawa mi.

16Nen saman inyaagel mo kami lapud pakayarim, kanyan ag ka pa la mamapasnuk ed Jerusalem. Siudad tan masanton pokdul mo so Jerusalem. Balbalawen na amin a totoo ed saray kaliber-liber a bansa so Jerusalem tan saray totoom, lapud saray kasalanan mi tan saray maoges a ginagawa da ray lalaki mi.

17O Dios mi, dengel mo pay pikakasik tan say kerew ko. Ipawil mo pad gendat a kipapasen so Timplom ya aderal, pian naamtaan da a sika so Dios.

18Dengel mo kami pa, O Dios; nengneng mo kami tan imanom so gunigon mi tan say paniirap na siudad ya atawag ed ngaran mo. Mampipikasi kamid sika, aliwan lapud matonung kami mo ag ingen lapud mapangsi ka.

19Katawan, dengel mo kami pa. Katawan, pirdona mo kami pa. Katawan, talineng mo kami pa tan galaw ka pa! Ag ka pa manaabala, O Katawan, pian naamtaan na amin a totoo a sika so Dios! Kayaryan mo yan siudad tan sarayan totoo.

Impaliwawa nen Gabriel so Propisiya

20Intuloy ko so nampikasi; impatwak iray kasalanan ko tan saray kasalanan da ray totook ya Israel, tan kinerew kod Katawan a Dios ko ya ipawil to la komun ed gendat a kipapasen so masanton Timplo to.

21Legan kon mampipikasi, maples a tinmikyab ed kawalaan ko si Gabriel ya anengneng kod samay inmonan pasingayew ed siak. Oras lad saya na panangisaklang na bagat ed labi.

22Impaliwawa tod siak, Daniel, linma ak dia, ta tulongan ta kan mantalus ed sayan propisiya.

23Nen ginapwan moy mampikasi ed Dios, inebatan to ka la. Inaro to ka, kanyan linma ak dian mangibagad sika na ebat. Dengel kan maung sirin, legan kon ipapaliwawa so kabaliksan na samay pasingayew.

24Mamimpiton pitomplo a taon so karokey na panaon ya inggetar na Dios a pangibolus ed saray totoom tan say masanton siudad mo ed kasalanan tan kaogsan. Napirdona so kasalanan tan niletneg so andi-anggaan ya inkatonung, pian ontua so pasingayew tan say propisiya, tan nisaklang lamet ed Dios so masanton Timplo.

25Amtaen tan talusan mo ya: Manlapud kipaakseb na ganggan a nipawil ed gendat a kipapasen so Jerusalem ya anggad isabi na pangulon pinili na Dios, mamimpiton pitoran taon so napalabas. Nipaalagey lamet so Jerusalem; nipawil iray dalan tan saray mabiskeg a tirinsira to, tan mansiansia ra ya a mamimpiton anemaplo tan duan taon, balet panaon ya na saray gunigon.

26Diad kasamputan na sayan panaon napatey ya anggapoy kasalanan so pangulon pinili na Dios. Deralen na saray ondogpan sondalo na makapanyarin manoley so siudad tan say Timplo. Say kasamputan onsabin singa delap a taruk toy bakal tan deral ya imparaan na Dios.

27Pitoy taon a saman a manoley et nawalaan na malet a sipanan ed amayamay a totoo, tan kalabas na kapalduad sayan panaon, patondaen toy pangisaklang na saray bagat. Nipasen ed sankatageyan a parti na Timplo so Makapataktakot a Managderal tan mansiansiad man ya anggad onsabi so inggetar na Dios a pangangga na samay angipasen diman.