BILANG 6 - Maung a Balita Biblia (PnPV)(PnPV)

Saray Ganggan a Nipaakar ed saray Nazareo

1Say Katawan ingganggan toy Moises

2ya iter to ray onggendan a bilin ed saray totood Israel. Siopamay laki odino bii a manggawa na nidoma-doman sipan a magmaliw a sakey a Nazareo tan isaklang toy sikaton dili ed Katawan,

3nepeg ya ag balut oninom na alak odino antokaman a makabuek. Ag ton balut oninom na iinomen a ginawad tabul na ubas odino mangan na ubas, o pasas.

4Legan a sikatoy sakey a Nazareo, ag ton balut mangan na antokaman a nanlapud tanaman ya ubas, ya anggan say bokel odino ubak na bungay ubas.

5Legan a sikatoy Nazareo, nepeg ya ag mapakatli odino mambalbas. Diad intiron panaon na inkisaklang tod Katawan nepeg a masanto, tan padokeyen toy buek tan balbas to.

6-7Say buek to tanda na inkisaklang tod Dios. Ag to nepeg a dotakan so sikaton dili, kanyan ag nepeg ya onsingger ed bangkay ya anggan say bangkay na ateng odino agi to.

8Legan a sikatoy Nazareo, nisaklang ed Katawan.

9No adotakan so nisaklang a buek na sakey a Nazareo lapud biglan inatey so toon walad abay to, nepeg a manalagar na pitoran agew insan to pakiskisay olo to tan say balbas to; diad ontan magmaliw a malinis onung ed ganggan.

10Diad kumawalon agew mangyakar ed pari na duaran palekpek odino duaran malapati diad lolooban na Tuldan Ayamay Katawan.

11Say pari isaklang ton bagat a para kasalanan so sakey a manok tan isaklang ton bagat a popoolan so sakey, ta gawaen to so sirimonya na panlinis ed sikato lapud impakadiwit tod bangkay. Diad saman lamlamang ya agew samay too pasimbaloen ton isaklang so buek to,

12tan isaklang to lamet ed Katawan so panaon to a sakey a Nazareo. Ag nibilang imay imbeneg a panaon to lapud adotakan imay nisaklang a buek to. Mangyakar na sakey taon a kordiro ya isaklang ton bagat a pambayar.

13No say sakey a too et mansamput lay panaon na impangisaklang toy sikaton dili a sakey a Nazareo, gawaen to yan sirimonya. Onla ed lolooban na Tulda

14tan iyapay tod Katawan so taloran ayep ya anggapoy deral na laman da: sakey taon a kordiron kalakyan a para bagat a popoolan, sakey taon a kabatyan a kordiron ibagat a para kasalanan, tan sakey taon a karniron kalakyan ya ibagat a para kareenan.

15Mangibagat met na sanbaskit a tinapay ya anggapoy libadura: saray makapal a tinapay ya agaw a rad arinan inkames ed larak na oliba tan saray maimpis a tinapay a pinoranisan na larak na oliba. Mangisaklang met ni na saray bagat a trigo tan alak.

16Say pari iyapay to rayan amin ed Katawan tan isaklang to may bagat a para kasalanan tan samay bagat a popoolan.

17Samay karniron kalakyan iyapay tod Katawan a bagat a para kareenan, tan isaklang ton katekep na samay sanbaskit a tinapay; isaklang to met ira may bagat a trigo tan alak.

18Diad lolooban na Tulda kiskisan na samay Nazareo so olo to insan to iyan so buek ed apoy a pakapopoolan na samay bagat a para kareenan.

19No alambung lay takeb na samay karniron kalakyan, say pari alaen to tan iyan tod saray lima na samay Nazareo a katekep na sakey a makapal a tinapay tan sakey a maimpis a nanlapu rad samay baskit.

20Insan say pari iyapay to ran nidoma-doman rigalo ed Katawan; masanton bagat ira a para pari, a kaaruman ira na pagew tan ulpo na samay karniro ya onung ed ganggan et kayaryan ira na pari. Kayari to ya, samay Nazareo nayarin oninom la na alak.

21Sikara yay ganggan a nipaakar ed saray Nazareo, balet no say sakey a Nazareo et isipan ton pasolukan toy sakey a bagat so nepeg ton iyapay onung na inkisaklang to, nepeg ton sumpalen so insipan to.

Say Bindision ya Ikana na Pari

22Say Katawan ingganggan toy Moises

23ya ibaga tod kinen Aaron tan saray lalakin anak to ya ikana ray onggendan a balikas diad pamindision dad saray totood Israel:

24Bindisionan kayo komun na Katawan tan talimaen to kayo;

25Abageyen kayo komun na Katawan tan kasian to kayo;

26Imanoen kayo komun na Katawan tan itdan to kayoy kareenan.

27Insan say Katawan kuanto, No ibalikas day ngaran ko a pamindision ed saray totood Israel, bindisionan ko ra.