1Say Dios tayo kuanto, Ligliwa yo ray totook, Ligliwa yo ra!
2Pabiskeg yoy linawa da ray totoo ed Jerusalem.
Ibaga yod sikaran andokey lay paniirap da
tan apirdona la ray kasalanan da.
Sigput ko la ran dinusa lapud amin a kasalanan da.
3Sakey a bosis so mankelyaw,
Iparaan yod kalawakan so sakey a dalan a para Katawan!
Linisan yo so dalan ed kalawakan a para Dios tayo!
4Tabunan yo so kapag patar;
patar yo so kapag palandey.
Saray pokdul magmaliw iran patar,
tan say matibagkul a kaomaan et magmaliw a palanas.
5Insan nipaamta ed satan so kagalangan na Katawan,
tan nanengneng na amin a katoowan.
Say Katawan a dili so angisipan ed saya.
6Sakey a bosis so mankelyaw,
Ibawag moy balita!
Antoy balitan ibawag ko? tepet ko.
Ibawag mo ya amin a katoowan et singa ra dika;
ag ira mansiansian singa saray rosas ed uma.
7No ibakid sikara na Katawan so dagem
nalenes iray dika tan nalaylay iray rosas.
Saray katoowan et singa la ra dikan maganoy bilay.
8On, nalaylay iray dika tan onkupas iray rosas,
balet mansiansiad ando lan ando so salita na Dios tayo.
9Jerusalem, tatdang kad atagey a palandey,
ta ipulong moy maung a balita!
Kolyaot ka, Sion,
ibawag moy maung a balita!
Ag ka ontatakot, mansalita ka.
Ibagam ed saray baley na Juda
ya onsasabi lay Dios da!
10Onsasabi so Katawan a Dios a makapanyarin manoley,
onsasabin kaiba to ray totoon inyagel to.
11Asikasoen to ray karniro to a singa panagkomponi na pumapastol;
tiponen to ray kordiro
tan ampopoen to rad taklay to;
anosan ton iwanwan iray kainaan da.
Say Anggapoy Kaparan Dios na Israel12Nasukat na siopaman so dayat ed panamegley na dakolap to
odino say tawen diad panamegley na lima to?
Nikarga na siopaman so dalin na mundo ed sakey a kupa
odino naala so belat na saray palandey tan saray pokdul diad panamegley na simbangan?
13Walay makapangibaga ed Katawan no antoy gawaen to?
Siopay makapangibangat odino makasimbawad sikato?
14Siopay pangipanonan na Katawan
pian naamtaan, natalusan
tan naaralan to no panoy panggawa tod antokaman?
15Anggapoy wala ed Katawan iray bansa,
singa ra labat sankaterter a danum;
singa labat kalemew na dabuk iray ararawin isla.
16Amin da ray ayayep ed katakelan na Libano
et kulang iran ibagat ed Dios tayo,
tan kulang iray kiew ton pamool.
17Diad sikato tuan anggapoy kakanaan da ray bansa.
18Siopay nayarin pangiparaan ed Dios?
Antoy kapara to?
19Sikatoy ag mipara ed talintaon gagawaen na iskotur,
a say platiro et okupan to na balituk
tan ipatoon tod pilak.
20Say toon ag to nayarian ya ikanay pilak o balituk lapud kairapay bilay to,
et pilien to lay kiew ya ag naboluk.
Manaanap na marunong ya iskotur
a manggawa na talintaon ag natumba.
21Ag yo amta?
Ag ni asalitad sikayo nen saman?
Ag yo ni nadngelan no panoy inggapo na mundo?
22Ginawa na samay manyodyorung ed trono to
diad tagey na mundo tan labas na tawen;
singa kamelag na gilata so nengneg da ray totoo diad leksab.
Impanat ton singa kortina so tawen,
singa sakey a tuldan panayaman.
23Papaabebaen to ray makapanyarin manoley,
pagmamaliwen to ran anggapoy kabaliksan.
24Singa ra malangwer a tanaman;
katubo-tubo ra tan kakkapanlamut da.
No say Katawan et paragemen to,
namagaan ira tan nitikyab iran singa dayami.
25Siopay nayarin pangiparaan ed Dios?
Walay siopaman a singa sikato?
26Tangay kayo pa ed tawen!
Sipay amalsad saray sankanengneng yon bitewen?
Say mangiwawanwan ed sikaran singa saray sondalo
et amta toy karakel da
tan tatawagen tod ngaran so balang sakey ed sikara.
Ontan lay kabaleg so pakayari to
anggapoy nabalang ya anggan sakey ed sikara!
27Totood Israel, akin et manririklamo kayo
ya ibabaga yon ag amta na Katawan iray gunigon yo
odino anggapoy walad sikato no nalalames kayo?
28Ag yo amta? Ag yo ni nadngelan?
Say Katawan so andi-anggaan a Dios;
pinalsa to so sankamundoan.
Ag balut nakesawan odino napunaw.
Anggapoy makatalus na kanunotan to.
29Pabibiskegen to ray makapoy tan saray naksawan.
30Onkapoy iray anggan malangwer ni;
napunaw iray totoon kabisbiskegan da.
31Balet napasimbalo so biskeg na saray manmamatalek ed Katawan.
Onalagey iran nampayak a singa agila;
mambatik ira, et ag ira napunaw;
manakar ira, et ag ira onkapoy.
Who We AreWhat We EelieveWhat We Do
2025 by iamachristian.org,Inc All rights reserved.
