SOFONIAS 2 - Maung a Balita Biblia (PnPV)(PnPV)

Say Tawag a Nipaakar ed Pagbabawi

1Sikayon totood andi-baing a bansa, mankakasakey tan mantitipon kayo,

2kasakbayan a napataynan kayon singa taep impalir na dagem, kasakbayan ya ondapod sikayo so mandarlang a sanuk na Katawan, kasakbayan na agew ya ipanengneng to so ontan lan pasnuk to.

3Singger kayod Katawan, amin yon mapaabeban totoo ed bansa, sikayon manusumpal na saray ganggan to. Manggawa kayo na kaptekan, tan mampaabeba kayo ed arap na Katawan. Angangko napaliisan yoy dusa no agew ya idapo na Katawan so pasnuk to.

Say Pakadusa na saray Bansan walad Kaliber-liber na Israel

4Anggapoy nakeraan ed siudad na Gaza. Nataynan so Ascalon. Napataynan a kapalduay agew iray taga Asdod, tan napataynan ed siudad da iray taga Ekron.

5Pakaskasi kayo la, sikayon Filisteo a manaayam ed gilig na dayat. Sinintinsiaan kayo la na Katawan. Pateyen to kayo, et anggapo so nakeraan ya anggan sakey ed sikayo.

6Magmaliw a maawang a kaalogan iray dalin yod gilig na dayat, wala ray nipaalagey ya alolung na pumapastol tan saray pokukan na karniro.

7Say dalin yo panayaman na saray taga Juda ya akapaliis ed patey. Ipastol da rad may karniro ra tan manogip irad saray kaabungan ed Ascalon. Asikasoen ira na Katawan a Dios da tan paaligwasen to ra lamet.

8Say Katawan a Makapanyarin-amin kuanto, Nadngel kon saray totood Moab tan Ammon et babalawen tan leleglemewen da ray totook, tan matangtangsit iran mangibabaga a nalooban day dalin da.

9Legan a siak so mabilay a Katawan a Dios na Israel, sambaan ko a say Moab tan say Ammon et naderal iran singa say Sodoma tan say Gomorra. Magmaliw iran sakey a pasen ya abut na asin tan andi-anggaan a deral-deral tan atubo-tubuan na saray dika. Saray totook ya akapaliis ed patey et alaen day antokaman a kayamanan da tan kayaryanen day dalin da.

10Onya so pakadusa na saray totood Moab tan Ammon lapud panagpaatagey da tan lapud pinapabaingan da ray totoo na Katawan a Makapanyarin-amin.

11Taktakoten ira na Katawan. Pagmaliwen ton andi-kakanaan iray diriyos ed tapew na dalin, et balang bansa galangen toy Katawan diad dilin dalin to.

12Pateyen met na Katawan iray totood Sudan.

13Ipakana na Katawan so pakayari to ed paneral tod Asiria. Pagmaliwen ton ataynan ya aderal-deral so Ninive, sakey a pasen na kabueren ya anggapoy danum.

14Magmaliw a sakey a pasen a pandokul-dokulan na saray karniro, baka, tan amin a klasiy ayayep. Manayam ed kawalaan da ray deral-deral iray kolayut tan ontaglool irad saray bintana. Manwakwak ed saray sasabiyen na puirta iray wawak. Naekal ed saray paalagey to iray tablan sidro.

15Ontan so nagawa ed siudad ya ipapangaya toy dilin pakayari to tan ipapasen toy sikaton dili ya arawid kaatapan. Ipapasen na saray totoo to a say siudad da so sankatalonggaringan ed intiron mundo. Magmaliw a begte-begtew a pasen, sakey a pasen a panayaman na saray ayayep ed katakelan! Balang toon ondalan ed saman a pasen et makasoner ed kataktakot to.