SIRAC 43 - Maung a Balita Biblia (PnPV)(PnPV)

1Agalay dakep na maliwawa, malinew a tawen ed tagey tayo!

Agaylay abig a nengnengen!

2Say agew no ompanengneng ibabawag to, legan ton ompapaway,

so ontan lan makapakelaw a kipapasen ton ginawa na Sankatageyan.

3No kaagwan pamamagaen toy dalin;

anggapoy toon makatepel ed ontan lan petang to.

4Say onseselek ya agew paparlangan to ray toktok na kapokdulan,

a singa palbaan na mital a manliub ed petang.

Ibubuyak toy mandarlang a rayos;

makalaram ed mata lapud liwawa to.

5Matalonggaring so Katawan a nanggawad agew;

diad panangiganggan na Katawan, magangganat ya oonlad laen to.

6Wala met so bulan, a manatanda na ilalabas na panaon,

sakey ya andi-anggaan a tanda na panagsalat na saray panaon.

7Igegetar na bulan iray masanton agew.

Onliliwawan maung so silew to, insan onkukuyep.

8Say bulan et ningaran onung ed bulan,

a makapakelaw a bantayan legan ya ombabaleg kapag labi,

sakey a silew a sinyal para saray mangatatawen a sondalo,

ya onsisinag irad tagey na tawen.

9Saray onsisinag a bitewen pagmamaliwen dan marakep so tawen;

masmasnag iran arkos ed atagey a katawenan na Katawan.

10Manaayam irad angipasenan ed sikara na samay Masanto

tan ag dan balut lolokakay pambabantay da.

11Nengneng yoy bonlalakaw tan idayew yoy Manamalsa to!

Agaylay dakep na liwawa to!

12Singa panan pininat na saray lima na Sankatageyan,

a lalaknaban toy liwang diad sakey a limpek na kagalangan.

13Mangganggan so Sankatageyan, et onggapon napelag so yilo;

onlalaris so kirmat a manumpal na saray sintinsia to.

14Nilokas iray kuarton panagsinupan ed tawen,

tan ompapaway a singa saray mantitikyab a manok iray lorem.

15Lapud pakayari to gagawaen to ray makapal a lorem

tan mimisimisiyen ton oran a kristal so yilo.

16-17Mansasalita, et yeyesyesen na karul so mundo;

nayayakayak na pakayari to iray kapalandeyan.

Kapag labay to, onsisiplug so dagem a manlalapud abalaten,

onsasabi ray alimbusabos tan saray bagyo a manlalapud baybay.

Ipepelag ton singa saray manok ya onleleksab so yilo,

singa saray dorun ya ondadapod dalin.

18Mankelaw tayod dakep na inkapoti to,

tan diad pankelaw tayo bambantayan tayon napepelag.

19Iwawalsik ton singa asin

so linaew, tan magmamaliw a masabit iran rosas na yilo.

20Pasisiplugen toy ambetel a dagem a manlalapud baybay,

et onkikigtel tan magmamaliw a yilo so danum;

onkikigtel so balang ilog tan kolus,

tan nakokobutan ira na yilon kawes a para bakal.

21Sisiniten to ray kapokdulan ed kalawakan diad ag to pangipelag na oran,

et onmamaga ray karikaan lapud petang;

22balet ompawil so bilay dan amin lapud malalorem a kelpa

legan ya ombebetel so panaon tan onleletaw so linaew.

23Lapud kakabatan to pinareen to ray dayat

tan impasen tod man iray isla.

24Isasalaysay na saray mariniro iray kaatapan ed dayat,

tan mankelaw tayon onderengel ed ibabaga ra.

25Doma tan makapakelaw a pinalsa iray walad dalem na dayat:

saray ankakabaleg a dragon tan amin a klasiy mabilay a pinalsa.

26Mampapalabo ed kimey to so balang sakey ya imbaki na Katawan.

Mankakasakey ya amin iray bengatla lapud salita to.

27Dakel niy nibaga tayo tan ag tayon balut nasumpal,

balet onyay labay dan ibagan amin: say Katawan et amin a bengatla.

28Panoy pakalmo tayo na pakayarin mangidayew ed sikato?

Matalonggaring ni nen amin da ray pinalsa to.

29Makapataktakot lapud inkatalonggaring to;

ontan lay kabaleg na pakayari to.

30Anggan gawaen moy anggaay nayarian mon mangidayew ed sikato,

matalonggaring ni nen say nayarian mon ibalikas.

Anggan ak ka onsasawa tan iyooput moy biskeg mon mangigalang ed sikato,

siansian kulang so pangidadayew mod sikato.

31Anggapoy toon akanengneng ed sikato, anggapoy makapangibagay nipaakar ed sikato;

anggapoy makapangiter ed sikato na kanepegan ton dayew.

32Ag ni amta ray mistirion ankabaleg mi nen saraya;

dagdaiset so amta tayo ed saray kimey to.

33Ginawa na Katawan so sansinakuban,

insan to inter so kakabatan ed saray totoon walay takot ed Katawan.