1Anak, dengel yo ak; siak so ama yo. Gawa yoy ibabagak ed sikayo, et arawi kayo ed kaatapan,
2ta initdan na Katawan na pakaoley ed saray anak da iray kaamaan, tan initdan to ray anak na kanepegan ya ontoluk ed saray kainaan da.
3No pagalangan moy amam, nasakuban mo ray kasalanan mo,
4tan no pagalangan moy inam, makalmo kay baleg a kayamanan.
5No pagalangan moy amam paliketen ka na saray anak mo naani; dengelen na Katawan iray pikakasim.
6No onuren moy Katawan diad panamegley na pamagalang mod amam tan diad pamaliket mod inam, mambilay ka na andokey.
7Onur mo ray atateng mo a singa ka aripen da.
8Pagalangan moy amam ed amin a gagawaen mo tan sasalitaen mo, pian naawat moy bindision to.
9No iter na saray atateng iray bindision da, mangiiter ira na biskeg ed kaabungan na saray anak da; no isamba da ray anak da, dederalen da ray dilin pundasion.
10Ag mo aanapey pakagalangan mo no sikatoy pakaleglemewan na amam; aliwan kagalangan mo no naleglemew so amam.
11Say dilin pakagalangan mo manlalapud pamapagalang mod amam. No ag pagalangan na saray anak so kainaan da, napelag irad kababaingan.
12Anak, asikasom so amam no masiken la; ag mo iitdan na pakagunigonan to legan ton mambibilay.
13Magmaliw kan maabagey ed sikato, anggan kabaw la; ag mo leleglemewen lapud mabiskeg tan maabig so laman mo.
14Ag lingwanan na Katawan so panangasin ipapanengneng mod amam; makatulong ya ed pakasakub na saray kasalanan mo.
15No wala kad gunigon, nanunotan na Katawan so panangasim tan tulongan to ka; natonaw tan naandi iray kasalanan mo a singa linaew ed petang na agew.
16Siopamay ikaindan to ray atateng to odino iitdan to ray makasengeg na pampasnuk da et isasamba toy Katawan; sikatoy isasamba la na Katawan.
Say Panagpaabeba17Anak, mampaabeba kad amin a gagawaen mo, et labay ni na saray totoo so gagawaen mo nen saray rigalo.
18No lalon ontalonggaring ka, lalon nepeg moy mampaabeba; diad ontan napaliket ed sika so Katawan.
20Baleg so pakayari na Katawan, tan sikatoy pagagalangan na saray mapaabeba.
21Ag mo sasalien a talusan iray bengatlan mairap a talusan mo, odino sokayan iray bengatlan ag narandan na pakayarim a mangamta.
22Iyapasakey moy kanunotan mo ed Ganggan a niiter ed sika. Ag nakaukolan ya amtaen mo ray nipaakar ed saray bengatlan ag impaamta na Katawan,
23kanyan ag mo la ra pibabalian. Ta say katwaan to say nipanengneng ed sika et ag nayarian na toon talusan.
24Amayamay iray totoon napapalikdo na dilin kanunotan da; saray aliwan kanunotan da so amikewet na panagsintinsia ra.
26Pakagunigonan mod kaonuran so awet na olom. No mambilay kad kaatapan, pateyen to ka met lamlamang.
27Nabuntonan na gunigon so toon anawet so olo to. Mambubuntonan so kasalanan na saray totoon makasalanan.
28Anggapoy makapatonda ed saray gunigon na saray totoon mapaatagey; linmamulamut ed sikara so kaogsan.
29Makaaral ed saray probirbio tan saray alimbawa iray totoon matudyoy kanunotan. Marengerengel ira, lapud labay day makaaral.
Say Panangiter ed saray Mairap-bilay30Makasakub na kasalanan so pangiter ed saray mairap-bilay, a singa pakasebseb na danum ed manliub ya apoy.
31Siopamay mangipapanengneng na panangasi tod arum a totoo et nununoten toy arapen, lapud makalmo na tulong no sikato bilang so napelag no panaon na kairapan.
Who We AreWhat We EelieveWhat We Do
2025 by iamachristian.org,Inc All rights reserved.
