BILANG 31 - Maung a Balita Biblia (PnPV)(PnPV)

Say Masanton Bakal sumpad Madian

1Say Katawan kuantod kinen Moises,

2Dusam iray taga Madian lapud ginawa ra ed saray totood Israel. Kasumpal mon gawaen itan, ompatey ka la.

3Kanyan inkuanen Moises ed saray totoo, Mamparaan kayon mibakal, pian nayarian yon dogpaan iray taga Madian et nadusa yo ra lapud ginawa ra ed Katawan.

4Mangibaki na sanlibon lalakin mibakal so kapag tribu na Israel.

5Kanyan sanlibon lalaki so apili ed kapag tribu; labinduan libo ya amin iray lalakin akaparaan a mibakal.

6Si Moises imbaki to ran mibakal diad panangipangulo nen Finees a lakin anak nen Eleazar a pari, tan sikatoy makaoley ed saray masanton bengatla tan saray trumpita a mangiter na saray tanda.

7Dinogpaan day Madian onung na ingganggan na Katawan ed kinen Moises tan pinatey da ray amin a lalaki,

8pati saray limaran ari na Madian a di Evi, Rekem, Zur, Hur, tan Reba. Pinatey da met si Balaam a lakin anak nen Beor.

9Saray totood Israel et dinadakep da ray bibii tan saray ogogaw a taga Madian, inaala da ray baka ra tan saray karniro ra, tan sinasamsam da ray amin a kayamanan da.

10Pinopoolan da ray amin a siudad da tan saray kampo ra.

11Inala da ray amin ya asamsam da, pati saray adakep dan priso tan saray ayayep,

12insan da ra inyakar ed kindi Moises tan Eleazar tan saray arum ya Israelita, a wala rad kampo diad saray patar na Moab diad nibaliw na Jordan manlapud Jerico.

Pinmawil iray Sondalo

13Si Moises, si Eleazar, tan arum nin pangulo na saray Israelita et pinmaway irad kampo a mangabet ed saramay sondalo.

14Akapasnuk si Moises ed saray opisyal, saray pangulo na tunggal libo tan tunggal lasus a sondalo a pinmawil ira kayari ran akibakal.

15Tinepet tod sikara, Akin et ag yo pinatey iray bibii?

16Nepeg yon nunoten a saray bibii so inmoonur ed saray bilin nen Balaam tan, diad Peor, inggolo da ray totoo ya onsumpad Katawan. Sikatoy makasengeg a dinmalan so salot ed saray totoo na Katawan.

17Kanyan natan patey yo ray amin a lalakin ogogaw tan saray bibiin asali da lay akiakdul.

18Balet ag yo papateyen iray bibiin ogogaw tan saray mamarikit, ta ala yo ran para sikayo.

19Natan amin yo ya akapatey na siopaman odino aniwit na bangkay et nepeg a manayam a pitoy agew ed paway na kampo. Diad kumatlo tan diad kumapiton agew linisan yoy sikayon dili onung ed ganggan tan saray bibiin adakep yo.

20Nepeg met a linisan yo onung ed ganggan so balang kawes tan amin a bengatlan ginawad katat, bagoy kanding, odino kiew.

21Si Eleazar a pari kuantod saray lalakin pinmawil a nanlapud bakal, Saraya so totontonen ya inter na Katawan ed kinen Moises.

22-23Amin a bengatlan ag napoolan a singa balituk, pilak, gansa, balatyang, lata, odino ismay et nepeg a nalinisan onung ed ganggan diad pangipadalan ed apoy. Saray arum nin bengatla nepeg a nalinisan na danum.

24Diad kumapiton agew nepeg yon ipesak so kawes yo et diad ontan nalinisan kayo onung ed ganggan tan nayarian yo lay onloob ed kampo.

Say Panagapag ed Asamsam

25Say Katawan kuantod kinen Moises,

26Sika tan si Eleazar tan saray arum a pangulo da ray totoo et nepeg a bilangen yo ray amin ya adakep, pati saray priso tan saray ayayep.

27Pankadua yo ra; say kapaldua betang na saray sondalo tan saray kapaldua betang na saray totoo.

28Diad betang da ray sondalo mamawas kay buis a para Katawan, sakey a priso ed kapag limanlasus; ontan met so gawaen mod saray baka, asno, karniro, tan kanding.

29Iter mo ra ed kinen Eleazar a pari a nidoma-doma ran rigalo ed Katawan.

30Diad betang da ray totoo, mamawas ka na sakey a priso ed kapag limamplo; ontan met so gawaen mod saray baka, asno, karniro, tan kanding. Iter mo rad saray Levita a makaoley ed Tulda na Katawan.

31Ginawa di Moises tan Eleazar so ingganggan na Katawan.

32-35Say onggendan et say listaan na saray adakep na saray sondalo, a kaaruman ira na saray inaala ran kayaryan para sikara: anem a lasus, pitomplo tan liman libon karniro tan kanding, pitomplo tan duan libon baka, anemamplo tan sakey a libon asno, tan talomplo tan duan libon mamarikit.

36-40Say kapalduan betang na saray sondalo et talon lasus, talomplo tan piton libo tan limanlasus a karniro tan kanding a say binawas a buis a para Katawan et anem a lasus, pitomplo tan lima; talomplo tan anem a libon baka a say binawas a buis a para Katawan et pitomplo tan dua; talomplon libo tan limanlasus ya asno a say binawas a buis a para Katawan et anemaplo tan sakey; tan labinanem a libon mamarikit a say binawas a buis a para Katawan et talomplo tan dua.

41Kanyan inter nen Moises ed kinen Eleazar yan buis a nidoma-doman rigalo ed Katawan, onung na ingganggan na Katawan.

42-46Say betang da ray totoo et kapara na betang na saramay sondalo: talon lasus, talomplo tan piton libo tan limanlasus a karniro tan kanding, talomplo tan anem a libon baka, talomplon libo tan liman lasus ya asno, tan labinanem a libon mamarikit.

47Diad sayan betang amawas si Moises na sakey a priso ed kapag limamplo; onya met so ginawa tod saray ayayep. Onung ed ganggan na Katawan, inter to rad saray Levita a makaoley irad Tulda na Katawan.

48Insan saray opisyal ya angipangulo ed saray sondalo linma rad kinen Moises

49tan inkuandad sikato, Binilang mi ray sondalon ipapangulo mi et anggapoy anggan sakey a naandi.

50Kanyan inaawit mi ra diay balituk ya alahas, saray pulsiras, saray singsing, saray ikaw, tan saray kolintas ya inaala na balang sakey ed sikami. Iyapay mi ra ed Katawan a bayar ira na bilay mi, pian iyagel to kami.

51Inawat di Moises tan Eleazar ira may amin ya alahas a balintuk.

52Say belat na amin ya inrigalo na saramay opisyal et sanlasus tan walomplon kilo.

53Saray aliwan opisyal et insisinup da lan kayaryan iray asamsam da.

54Kanyan si Moises tan si Eleazar inyakar dad Tulda ira may balituk, pian iyagel na Katawan iray totood Israel.