LEVITICO 5 - Maung a Balita Biblia (PnPV)(PnPV)

Saray Kason Mankaukolan na saray Bagat a Para Kasalanan

1Say bagat a para kasalanan et nakaukolan ed saray onggendan a kaso.

No say sakey a too et tinawag na korti a mantasi et ag to ibaga so nipaakar ed anengneng odino nadngel to, nepeg a nadusa.

2No say sakey a too et ag to ginagalan adiwit so bengatlan marotak onung ed ganggan, a singa bilang say inatey ya ayep, magmaliw a marotak tan nankasalanan diad bektan abirbir to so agawa to.

3No say sakey a too et ag to ginagalan adiwit so bengatlan marotak a nanlapud too, anggan anton bengatla, sikatoy nankasalanan diad bektan abirbir to so agawa to.

4No say sakey a too et nansamban andi-nunotan, ya anggan antoy kipaakaran, sikatoy nankasalanan diad bektan abirbir to so ginawa to.

5No say sakey a too et nankasalanan na anggan dinan ed saray abitla, nepeg ton ipatua so kasalanan to,

6tan say dusay kasalanan to et say pangibagat tod Katawan na sakey a kabatyan a karniro odino kanding. Say pari isaklang to so bagat a para kasalanan to yan too.

7No say sakey a too et ag to nayarian so mangibagat na kordiro odino kanding lapud irap na bilay to, mangyakar ed Katawan na duaran palekpek odino duaran malangwer a malapati a pinagkabayar na kasalanan to; say sakey ibagat para kasalanan tan say sakey isaklang a bagat a popoolan.

8Iyakar to ra ed pari, tan say pari onaen ton isaklang so manok ya ibagat para kasalanan. Yesyesen tod beklew balet ag to ekalen so olo.

9Insan to iwalsik ed dapag na altar so daiset a dala to. Say arum a dala ipaterter tod leksab na altar. Sikato yay bagat a pangekal na kasalanan.

10Insan to isaklang imay sakey a manok a sakey a bagat a popoolan, onung ed saray totontonen. Diad onya say pari isaklang to so bagat a para kasalanan na sakey a too, et napirdona yan too.

11No ag nayarian na sakey a too so mangibagat na duaran palekpek odino duaran malangwer a malapati lapud irap na bilay to, mangyakar na sakey kilon arina a bagat ton para kasalanan. Ag to laukan na larak na oliba odino insinso, lapud bagat a para kasalanan.

12Iyakar tod pari imay arina, insan samay pari mangalay sankaakup ed samay arina a pakapatnagan a nibagat lan amin ed Katawan imay arina. Diad tapew na altar poolan ton bagat a popoolan imay sankaakup ya arina. Sikato ya so bagat a mangekal na kasalanan.

13Diad onya say pari isaklang to so bagat a para kasalanan na sakey a too, et napirdona yan too. Say soluk ed samay arina kayaryan na pari, a singa say gawaen ed bagat a trigo.

Saray Bagat a Pambayar

14Say Katawan inter tod kinen Moises iray onggendan a totontonen.

15No say sakey a too et nankasalanan ya ag to ginagala lapud ag to impangiter na saray babayaran a masantod Katawan, nepeg a mangyakar na sakey a kalakyan a karniro odino kanding ya anggapoy deral na laman to, ta ibagat to a pambayar. Say bili na sayan bagat kuintaen onung ed panagkuinta ed santuario.

16Nepeg ya iter toy ag to abayaran tan pasolukan to na kakalima. Iter to ya ed pari, tan say pari ibagat to so ayep a pangekal na kasalanan to yan too, et napirdona yan too.

17No say sakey a too et ag to ginagalan asumlang so sakey ed saray ganggan na Katawan, nankasalanan tan nepeg a nadusa.

18Nepeg a mangyakar ed pari na sakey a kalakyan a karniro odino kanding ya anggapoy deral na laman to, ta ibagat to a pambayar. Say bili na sayan bagat kuintaen onung ed panagkuinta ed santuario. Say pari isaklang to so bagat a pangekal na ag ginagalan kasalanan to yan too, et napirdona yan too.

19Sakey yan bagat a pambayar ed kasalanan a ginawa to sumpad Katawan.