1Diad ermen nen Ari Ezekias nen nadngel toy imbalita da ra may opisyal to, pinilat toy kawes to, insan linmad dalem na Timplo na Katawan.
2Imbaki tod kinen propita Isaias a lakin anak nen amoz ira di Eliakim a makaoley ed palasio, Sebna a sikritario na palasio, tan saray mamatakken a papari. Akakawes met iray sako.
3Saya so impaikuantod kinen Isaias: Agew natan na kairapan; nadudusa tan napapabaingan itayo. Singa itayo biin asabi lay pananak to, balet et makapkapoy a mangibuknak na ogaw.
4Imbaki na impirador na Asiria so manonan opisyal to ya amabaing ed mabilay a Dios. Nadngel komun Katawan a Dios mo ira man a panamabaing tan dusaen to may nansalita. Kanyan ipikasim pad Dios iray nakdaan a totoo tayo.
5Nen nadngel nen Isaias so impaibaga nen Ari Ezekias,
6onyay inyebat to: Ibabaga na Katawan ed sika ya ag ka patataktakot ed saray taga Asiria lapud pangibabaga ran ag to ka nilaban.
7Parengelan na Katawan so impirador na balbalitan makasengeg na pawilan tod dilin bansa to, tan diman papatey na Katawan.
Say Kumadwan Impanaktakot na saray taga Asiria(Isa. 37:8-20)8Akabatan na samay opisyal na Asiria a tinaynan na impirador so Lakis, ta mibabakal ed siudad na Libna, kanyan linmad man a pangipanonan to.
9Nadngelan na impirador na Asiria a diad panangipangulo nen Ari Tirhaca na Etiopia onsasabi ray sondalon ondogpad sikato, kanyan nansulat ed kinen Ari Ezekias
10na Juda, tan inkuantod sulat to, Ag ka palilingod imbaga na dios a panmamatalkan mo ya ag ka napelag ed silong na pakaoley ko.
11Nadngelan mo lay ginawa na saray impirador na Asiria ed anggan anton bansan ginetma ton deralen. Abaloan mon makapaliis ka?
12Dinederal na saray lalakik iray siudad na Gozan, Haran, Rezef, tan pinapatey da ray totoon taga Eden a manaayam ed Telasar, et anggapod saray diriyos da so akapangyagel ed sikara.
13Antoy agawaan na saray ararid saray siudad na Hamat, Arfad, Sefarvaim, Hena, tan Iva?"
14Inawat nen Ari Ezekias so sulat ed lima na saramay imbaki na impirador tan binasa to. Insan linmad dalem na Timplo, inyan tod man imay sulat diad arap na Katawan,
15tan nampikasi, O Katawan a Dios na Israel, manyodyorung kad mapagalang a tronom diad tagey na saray kirubin, bukbukor moy Dios a manooley ed amin a nanarian diad mundo. Pinalsam so tawen tan dalin.
16Imanom pa, Katawan, so nagagawad sikami. Dengel mo pan amin iray salitan pamapabaing nen Senakerib ed sikan Dios a mabilay.
17Amta min amin, Katawan, a dinederal na saray impirador na Asiria so amayamay a bansa, ginagawa ran andi-kabaliksan iray dalin da,
18tan pinopoolan da ray diriyos da ya aliwa ran tuan diriyos, no ag ta talintao ran kiew labat odino bato a ginagawa na limay too.
19Kanyan natan, Katawan a Dios mi, iyagel mo kami pad saray taga Asiria, pian naamtaan na amin da ray bansa ed intiron mundo a bukbukor mo, O Katawan, so Dios.
Say Imbaga nen Isaias ed Ari(Isa. 37:21-38)20Insan impaibaga nen Isaias ed kinen Ari Ezekias a dinengel na Katawan so pikakasi na ari tan inebatan to.
21Inkuan na Katawan, Elekan ka na siudad na Jerusalem, Senakerib, tan ludlureyen to ka.
22Siopay abaloan mon papabaingan tan luludlureyen mo? Ag mo ak pinagalangan, siak a masanton Dios na Israel.
23Angibaki kad siak na saray totoom a mampasirayew a lapud saray amayamay a karwahim dinakep mo ray sankaatageyan a palandey, anggan say toktok na Palandey na Libano. Impasirayew mod siak a nambabatang kad man na saray sankatageyan a kiew a sidro tan saray sankaabigan a kiew a saleng tan asorub mo ray sankaoteotelan na saray takel.
24Impasirayew mon angotkot ka na saray bobun tan inminom ka na danum ed arum iran dalin tan pikaekat mo ray kolus ed Egipto diad panamegley na impanggagatin na saray sondalom.
25Ag mo ta ni nadngelan ya abayag ko la yan ginetma? Susumpalen ko la ya natan. Initdan ta kay pakayari a napagmaliw mon bontun na deral-deral iray aliber na padir a siudad.
26Anggapoy agawaan na saray totoon manaayam diman. Ataktakot ira tan akatanga ran nikelawan. Nagmaliw iran singa dikad alog odino dikan tinmubod toktok na abung ya alenes ira diad insiplug ed sikara na ampetapetang a dagem.
27Balet amtak ya amin iray nipaakar ed sika, saray gagawaen mo tan saray lalaen mo. Amtak so ontan lan petang na olom ed siak.
28Naawat koy pakabat a nipaakar ed satan a pamapasnuk mo tan satan a panagpaatagey mo, kanyan natan inan koy patili so eleng mo tan pakalat so sangim, tan papawilen ta kad dalan a nanlapwan mo.
29Insan inkuanen Isaias ed kinen Ezekias, Niay sakey a pakapatnagan ed sakey a nagawa. Diad sayan taon tan diad ontombuk a taon, bungay tanaman a balang labat so naakan yo, balet diad onsoblay a taon nayarian yo lay mantanem na saray trigo tan naani yo, tan makapantanem kayo met na ubas tan makapangan kayo na bunga ra.
30Saray mansiansian mabilay a taga Juda et onaligwas iran singa saray tanaman a manlamut na aralem, insan ira mambunga.
31Wala ray mansiansian mabilay a totood Jerusalem tan diad Palandey na Sion, ta ginetma la na Dios a gawaen to yan andi-saew.
32Onyay inkuan na Katawan nipaakar ed impirador na Asiria: Ag to ya looban a siudad odino panaen na anggan sakey. Anggapo ray onsingger ed siudad a sondalon wala ray samper da, tan anggapoy nagawan bontun a para panakep ed siudad.
33Ompawil ed dinalan to, tan ag to looban yan siudad. Siak a Katawan, so nansalita.
34Iyagel ko yan siudad lapud sikatoy pakagalangan ko tan lapud samay sipan kod kinen David ya aripen ko.
35Diad saman a labi linmad kampo na saray taga Asiria so sakey ya anghil na Katawan tan pinatey toy sanlasuswalomplo tan liman libon sondalo. Diad palbangon ed ontombuk ya agew kibalatar irad man ya inaatey!
36Insan sinmoner si Senakerib ya impirador na Asiria tan pinmawil ed Ninive.
37Aminsan ya agew, nen mangigagalang si Senakerib ed dalem na timplo na dios ton Nisroc, saray duaran anak ton lalaki a di Adramelec tan Sarezer, pinatey dad ispada, insan batik irad dalin na Ararat. Sakey ed saray anak to a si Esarhadon so sinmalat ed sikaton nanoley.
Who We AreWhat We EelieveWhat We Do
2025 by iamachristian.org,Inc All rights reserved.
