JOB 5 - Maung a Balita Biblia (PnPV)(PnPV)

1Tawag ka, Job, ta nengneng mo no walay onebat ed sika.

Walay siopaman ya anghil a nayarian mon piregan?

2Inaambagel tan andi-kakanaan

so alablabas a panggunigon tan pansakit na linawa.

3Akanengneng ak na saray totoon makulang-kulang a maligen so panagbilay da,

balet biglan insambak iray kaabungan da.

4Ag makaarawid kaatapan iray anak da;

diad korti anggapoy mangyagel ed sikara.

5Kanen na totoon narasan iray bungay tanaman na toon makulang-kulang

anggan saray trigon walad kasabitan

tan panggonaetan na saray napgaan a totoo so kayamanan to.

6Ag ontobod dalin so kaogsan,

odino onsulming ed dalin so gunigon.

7Ingen manlapud sikato met lamlamang so gunigon na too,

a singa panlalapud apoy na saray talagsik.

8No siak so sika, onsingger ak ed Dios

tan sikatoy pangipiregan koy kipapasen ko.

9Ag natalusan iray gagawaen ton makapakelaw a bengatla,

tan andi-tonda iray gagawaen ton milagro.

10Ipepelag tod dalin so oran

a manalog ed kaalogan.

11Say Dios so mangitanduro ed saray totoon mapaabeba

tan diad saray maermen iter toy gayaga.

12-13Deralen to ray plano na saray totoon masilib,

tan erelen tod kasiliban da iray totoon makabat,

pian ag onaligwas so antokaman a gagawaen da;

14anggan diad kagkaagwan

karapkarap irad kabilongetan.

15Balet say Dios iyaagel tod patey iray mairap-bilay;

iyaagel tod panamairap na arum a totoo iray walad pankaukolan.

16Iitdan toy ilalo iray mairap-bilay,

tan ag to paeeselen iray totoon maoges.

17Maliket so toon pepeteken na Dios!

Ag mo liliknaen no dusaen to ka.

18Beberberen na Dios iray sinusugat to;

mamapasakit tan mamapaabig ed sika iray lima to.

19Lawas iyagel to ka ed gunigon tan kaogsan;

20no panaoy eras pansiansiaen to kan mabilay,

tan no panaoy bakal ipaliis to kad patey.

21Say Dios ipaliis to kad panamaoges na arum a totoo;

iyagel to ka no onsabiy deral.

22Elekan moy onsabin deral tan eras,

tan ag mo takotan iray masesebeg ya ayayep.

23Anggapoy bato so kaalogan a bakaen mo;

ag kan balut dogpaan na saray masesebeg ya ayayep.

24Insan ka manayam a walay kareenan diad dalem na tuldam;

no nengnengen mo ray karnirom, arawi rad kaatapan.

25Nawalaan ka na amayamay ya anak,

a singa karakel na dika ed tapew na dalin.

26Mambilay kay andokey,

a singa trigon ontatakken ya anggad panagani.

27Job, amta mi ya, ta abayag min inaral.

Tua ya, kanyan panisiaan mo la, ta pankaabigan mo.