SARAY ARARI 18 - Maung a Balita Biblia (PnPV)(PnPV)

Si Elias tan saray Propita nen Baal

1Kayariy pigaran agew, nen mikatloy taon lan anggapoy oran, inkuan na Katawan ed kinen Elias, Laka, ta iparontal moy sikan dili ed kinen Ari Acab, insan ko la paoranen.

2Linma sirin si Elias.

Mapalalo lan tuloy natan so eras ed Samaria,

3kanyan tinawag nen Acab si Obadias a makaoley ed palasio. (Masimoon so panamagalang nen Obadias ed Katawan,

4et nen papateyen nen Jezebel iray propita na Katawan inala toy sanlasus ed saray ongib, tan iniitdan to ray tagano tan nainom.)

5Inkuanen Acab ed kinen Obadias, Tala, ta anapen tan amin iray kawalaay sobul tan saray kolus diad intiron nanarian, tan nengnengen ta no wala ray dikan nipakan tayod saray kabayo tan saray mula, pian ag ira ompatey. Angangko ag tayo mamatey na anggan sakey ed saray ayayep tayo.

6Akapampakna ra no anton pasen so laen na balang sakey ed sikara, kanyan nansian ira.

7Nen walad dalan si Obadias, biglan nabet toy Elias. Abirbir to, dinmakmomod arap to, tan tinepet to, Sikan tua si Elias?

8On, siak, ebat to. Laka, ta ibagam ed amom ya ari a wadya ak.

9Inmebat si Obadias, Antoy ginawak a kaogsan a makasengeg na pangitapang mod siak, pian napatey ak nen Ari Acab?

10Diad ngaran na mabilay a Katawan a Dios mo, sambaan ko ya impaanap ka na ari ed anggad iner a sokung na mundo. Diad inerman a baley ya impakapangibagaan ya andi kad man, impansamba toy pangulod saman a pasen ya ag da kad man narumog.

11Et natan papaonlaen mo ak ed sikato, ta ibagak ed sikaton wadya ka?

12Antoy amtak no kataynan ko dia et awiten ka na ispiritu na Katawan ed pasen ya anggapoy mikabat? Insan mo ibagak ed kinen Acab a wadya ka tan ag to ka narumog, pateyen to ak. Nepeg mon nunoten a gagalangen koy Katawan nanlapu lad impanogaw ko.

13Ag mo ta nadngelan a nen papateyen nen Jezebel iray propita na Katawan et pinaamut kon alimamplo ed saray ongib iray sanlasus ed sikara, iniitdan ko ray tagano tan say nainom da?

14Panon sirin so pangibabakim ed siak ya ibagak ed ari a wadya ka? Andi-saew a pateyen to ak!

15Inmebat si Elias, Diad pakayari na Makapanyarin-amin a Katawan a panlilingkuran ko, isipan ko ya iparontal ko natan so siak a dili ed ari.

16Kanyan linmad Acab si Obadias tan imbaga tod sikato imay papaibaga nen Elias. Linma sirin ya onabet ed kinen Elias si Acab.

17Nen anengneng nen Acab si Elias, inkuanto, A, wadya ka manaya, sikan managgunigon ed Israel!

18Aliwan siak so managgunigon, ebat nen Elias. Sikasika tan si amam. Ag mo oonuren iray ganggan na Katawan tan igagalang mo ray talintao nen Baal.

19Iganggan mon banaen ak na amin a totood Israel diad Palandey na Carmelo. Awit mo ray apat a lasus tan limamplon propita nen Baal tan saray apat a lasus a propita na diosan Asera a tataganoen ira nen Riyna Jezebal.

20Kanyan impantitipon nen Acab ed Palandey na Carmelo iray amin a totood Israel tan saray propita nen Baal.

21Linmay Elias ed saray totoo tan kuanto, Kapigay pangipasakey yod kanunotan yo? No Dios so Katawan sikatoy igalang yo; no Dios si Baal, sikatoy igalang yo! Balet ag inmesel iray totoo.

22Insan inkuanen Elias, Bukbukor ko lay atilak a propita na Katawan, balet apat a lasus iray propita nen Baal.

23Ala kayoy duaran bakan kalakyan; paala yod sikaray sakey, pateyen da, insan da tegtegtegen; iyan dad tapew na saray kiewbalet ag da seselselan. Nampara met so gawaen kod samay sakey a baka.

24Insan pampikasi yod dios da iray propita nen Baal, balet mampikasi ak ed Katawan; say Dios a mangipelag na apoy ya ebat na pikakasisikato so Dios.

Inmebat iray totoo, Maung itan. Siabobun kami.

25Insan inkuanen Elias ed saray propita, Lapud dakerakel kayo, ala kayoy sakey a bakan kalakyan, ta onona kayon mamparaan. Mampikasi kayod dios yo, balet ag yo seselselan so kiew.

26Inala da may bakan niiter ed sikara, imparaan da, tan nampikasi rad kinen Baal ya anggad kaagewan. Ineyag da, Ebatan mo kami pa, Baal! tan nansayaw-sayaw irad kaliber-liber na altar a ginawa ra. Balet anggapoy ebat a naalagar da.

27Nen kaagewan la ginapwan nen Elias a lureyen ira, Ikasil yoy mampikasi! Sikatoy sakey a dios! Ompano mankokogip, odino mampapainawa, odino walay nila to! Odino ompan nanaogip, kanyan nepeg yon bangonen!

28Kanyan inkasil day pampipikasi ra, tan sinasalger day laman da na saray yuro tan saray punyal, onung na sirimonya ra, ya anggad inmaagos so dala.

29Nanlalabir-labir tan naneeyag-eyag ira ya anggad onngangarem la; balet anggapoy ebat, anggapoy anggan narengel a tanul.

30Insan inkuanen Elias ed saray totoo, Asinggeran yo ak, kanyan minokut da. Inapiger toy nigeban altar na Katawan.

31Angalay labinduan bato, sakey so para kapag sakey a tribu ya inngaran onung ed saramay labinduan anak nen Jacob, say lakin angitdan na Katawan na ngaran ya Israel.

32Inkana nen Elias ira yan bato diad impangapiger tod samay altar a pangigalangan ed Katawan. Angotkot na banawang ed kaliber-liber na altar, a nayarin mankarga na apatiran galon a danum diad kinabaleg to.

33Insan to intapew ed altar iray kiew, tinetegteg to may baka, tan intapew tod saramay kiew. Inkuanto, Pano yoy danum so apatiran boyug tan ikalbo yod samay bagat tan saramay kiew. Ginawa ray imbaga to

34tan kuanto, Pidwa yon gawaenet ginawa ra. Gawa yo ni lamet, kuanto niet ginawa ra.

35Inmagos ed kaliber-liber to may altar so danum tan napno may banawang.

36Diad oras na panagbagat ed ngarem, inasinggeran nen Elias imay altar tan nampikasi, O Katawan a Dios di Abraham, Isaac, tan Jacob, ipaamtam natan a sikay Dios na Israel, tan siak so aripen mo a nanggawad saya, lapud panangiganggan mo.

37Ebatan mo ak pa, Katawan, ebatan mo ak pa, pian nabirbir na sarayan totoo a sika, say Katawan, et Dios, tan papapawilen mo rad sikan dili.

38Angipelag na apoy so Katawan, tan pinoolan to may bagat, saramay kiew, tan saramay bato, tan tinektek toy dalin tan pinamaga to may banawang a kawalaay danum.

39Nen anengneng ya na saray totoo tinmiblak irad dalin, tan kuanda, Say Katawan et Dios; say Katawan labat so Dios!

40Ingganggan nen Elias, Erel yo ray propita nen Baal; ag kayo mamapabatik na anggan sakey ed sikara! Inerel da ra, insan inyakar nen Elias iran amin ed Kolus na Kison tan diman to ra pinapatey.

Say Inggapo Lamet na Oran

41Inkuanen Elias ed kinen Ari Acab, Laka, ta mangan ka la. Narerengel koy ungol na onsasabin oran.

42Nen onlan mangan si Acab, kinmalab ed toktok na Palandey na Carmelo si Elias tan diman dinmakmomo ya anggad dalin a walad pegley na saray pueg to so olo to.

43Inkuantod aripen to, Laka, ta bantag moy dayat.

Linma may aripen, insan pinmawil a kuanto, Anggapoy anengneng ko. Amimpiton imbaki nen Elias ya onlan onnengneng.

44Diad kumapito pinmawil tan kuanto, Akanengneng ak na melag a lorem a singa daklap so kabaleg to tan ontatagey a nanlapud dayat.

Ingganggan nen Elias imay aripen to, Lakad Ari Acab, ta ibagam ed sikaton onlogan lad karwahi to tan onsempet la, ta ompan naabot na oran ed dalan.

45Kabebekta akobutan na makapal a lorem so tawen, ginmapon sinmiplug so dagem, tan pinmelag so mapmaples ya oran. Linmogan ed karwahi to si Acab tan pinmawil ed Jezreel.

46Linmoob so pakayari na Katawan ed kinen Elias; malet ton imbariber so kawes tod balangbang to tan batik ya inonaan si Acab ya anggad lolooban ed Jezrell.