SIRAC 20 - Maung a Balita Biblia (PnPV)(PnPV)

Pangamta no Kapigay Pansalita

1Nayarin aliway pakapampasnuk ed sakey a too; nayarin maung niy ag ka onesel nen say mansalita ka.

2Balet magmaung niy pampasnukan moy too nen say pokpokan moy pasnuk mo.

3Birbir mo no alingo ka, et napaliisan moy pakabaingan.

4Say pamasoot pian nibagam so labay mo et singa sakey a toon kapon a mamapasoot na sakey a bii.

5Bibirbiren a makabat iray arum a totoo, lapud aliwa ran masalita; nabobosul iray arum lapud aliwa ran masalita.

6Mandedeen iray arum a totoo, lapud anggapoy labay dan ibaga; mandedeen iray arum lapud amta ra so manepeg ya oras na pansalita.

7Say makabat a too ag mansalita ya anggad manepeg a bekta, balet ag amta na malastug tan makulang-kulang itan ya oras.

8Anggapoy makaanos ed toon mansalita na andokey tan ag to mangiter na pankanawnawa ed saray arum a totoo.

Biglan Pansalat na Kapalaran

9No maminsan mansumpal ed aligwas so makapoy a kapalaran, tan no maminsan mansumpal ed kadederal so maung a kapalaran.

10No maminsan say pangiter a mabonbonluk et anggapoy nagawaan tod sika a kamaungan, balet no maminsan dobliy iter tod sikan tumang.

11Nayarin ontombuk ed kagalangan so kababaingan, balet wala ray totoon nanlapud abeban kipapasen ya akakalab ed saray pasen na kagalangan.

12No maminsan say singa tuan impakatawal et magmaliw a magastos ya inkalingo.

13No mansalita so sakey a toon walay maung a kakabatan to, nakaaro to ray totoo. Balet anggapoy kana so pangidayew ed amin a totoo na toon makulang-kulang.

14No itdan kay bengatla na satan a too, anggapoy maabig a nagawaan na iter tod sika; aliwan mablin singa abaloan to.

15Say mabonluk labat ya iter to et say balaw, ya ibawag ton iparengel ed sankamundoan. No pabayesen to ka natan, labay ton napapawil ed ontombuk ya agew. (Ag mo ta kabosul so toon singa ontan?)

16Insan satan a makulang-kulang ikuanto, Anggapoy malabay ed siak. Anggapoy misasalamat ed gagawaen kon para sikara. Alaen day iiter kod sikara, insan da ak tontongtongen ed beneg-benegan.

17Et dugay ibabaga tosikato lawas so pakakalekan na balang sakey a too.

Aliwan Manepeg a Tongtongan

18Maoges ni so lingod panagsalita nen say kikaronyas ed anawet a dalan; biglan naderal so toon maoges a singa biglan kikaronyas tan katumba na sakey a too.

19Say toon aliwliway ogali to et singa saray andi-kabaliksan ya istorian naynay ya isasalaysay na saray totoon anggapoy amta.

20Anggapoy toon manlabay ed sakey a probirbion imbalikas ed andid oras na toon makulang-kulang.

21No ag makapankasalanan so too lapud inkairap na bilay to, makapampainawa ya ag goloen na konsinsia to.

22Nayarin nabalang moy talek mod sikan dili diad ag mo pansalita no walay nagagawan inkakulang-kulang.

23No mangisipan kan mangiter na bengatla ed sakey a kaaro lapud ambaing kan mangibagay andi, manggagawa ka labat na sakey a kalaban.

24Aliwliwan dotak ed ogali na sakey a too so pangtila, balet gagawaen ya lawas na toon anggapoy amta.

25Maung niy matakew nen say toon ogali toy mantila, balet mamapaarap iran dua ed kadederal.

26Anggapoy kagalangan na toon matila. Lawas mambibilay a naplag ed kababaingan.

Napanmatalkan na Kakabatan

27Mansalita kan napnoy kakabatan, et mampalabo ka diad mundo. Pakaliliketan na saray bibirbiren a totoo so maung a kalakal.

28Palabasen da ray lingom no labay da ka, kanyan bokalkal moy dalin, pian manani ka!

29Bubulagen na saray rigalo tan pasoksok iray anggan totoon makabat, tan sesebelan to ran mansalitay katwaan nipaakar ed aliwan nagagawa.

30Singa kayamanan a niamut so kakabatan ya ag nibabalikasandi-kana ran dua.

31Balet maung ni so toon sasakuban toy inkakulang-kulang to nen say toon iyaamut toy kakabatan to.