APOCALIPSIS 21 - Mam of Todos Santos -- Guatemala Unicode

Acꞌaj twitz cyaꞌj bix acꞌaj twitz txꞌotxꞌ

1Tbajlenxitltzen jlu, e wila jun acꞌaj twitz cyaꞌj bix acꞌaj twitz txꞌotxꞌ. Otk chi baj tneel twitz cyaꞌj tuyax tneel twitz txꞌotxꞌ tuyax mar.

2Bix e wila jnintzaj tnom xjan, j-acꞌaj Jerusalén tbi, ncuꞌtz tuj cyaꞌj. Juꞌ e tzaj tuya Dios. Binnexsen tten tisen jun xuuj binne tten tuya t-xbalen cyeca tuꞌn tmaje tuya tchmil.

3Bix e xiꞌ nbiꞌna jun cyiwxix tkꞌajkꞌajel tuj cyaꞌj. E xiꞌ tkbaꞌn:

—Ma tzul Dios tuꞌn tten cyuya xjal. Ma pon tumel tuꞌn tnajan Dios cyuya xjal. Chi oquel xjal te t-xjal Dios, bix jax Dios ctemel cyuya te Cydios.

4Bix ja te Dios qꞌuelel suꞌnte cykil taꞌl cywitz. Mintiiꞌtl cyamecy. Mintiiꞌtl bis. Mintiiꞌtl ookꞌel. Mintiiꞌtl qꞌuixcꞌaj. Kej pena te nejl, ma chi baj te junx maj―tz̈i jun aj cyaꞌj.

5Bix e tzaj tkbaꞌn Dios kꞌukl tuj tkꞌukbil:

—Jeyꞌ, cykilca oquel te acꞌaj wuꞌna. Tzꞌiꞌbeqꞌuey jma tila, cuma jaxxix kej yol lu, bix baꞌn tuꞌn tke cycꞌuꞌja tiꞌj―tz̈i Dios weya.

6Bix e tzaj tkbaꞌntl Dios weya:

—Ma bint. Inayena tuj tneel bix mancꞌbil. Alcye kej xjal at takꞌ aꞌ cyiꞌj, cxeꞌl nkꞌoꞌna aꞌ cye nuk cotz, jaj twiꞌ aꞌ te chunkꞌlal te junx maj.

7Alcye kej xjal ma chi xcye tibaj cykilcaj luwe, ccyiikꞌel ja cotz lu te cykab. Bix chin oquela te Cydios, bix chi oquel te ncwala.

8Pero kej xjal at ttz̈i cyiꞌj tuꞌn cyxiꞌ lpe wiꞌja, bix kej min n-oc ke cycꞌuꞌj wiꞌja, kej at cyil, kej byol xjal, kej nchi binchan pajlel, kej chmambaj, kej nchi suuken cyxeeꞌ cyken sant, kej ẍtakꞌel, cykilca kej lu chi xeꞌl tuj tnijabel kꞌakꞌ bix azufre, jatzen tcab cyamecy―tz̈i Dios weya.

J-acꞌaj Jerusalén

9E tzajtzen jun tsanjel Dios tuj cyaꞌj wuyena, jun cyej wuuk ángel e wila nejl kꞌiꞌn wuuk lak cyuꞌn nojne tuya wuuk jxitbil te tchiyonel. E tzaj tkbaꞌn weya:

—Quixtey. Cxeꞌl nyeecꞌana tey jxuuj tuꞌn tmaje tuyaj Tal Carnel―tz̈i ángel.

10Bix e xiꞌ tiiꞌn ángel wanema twiꞌ jun jawnex witz te nim tweꞌ, bix e tzaj tyeecꞌan jnintzaj xjan tnom, ja Jerusalén. Ncuꞌtz tuj cyaꞌj ntzaj tuya Dios.

11Nkoptzꞌaj tnom tuꞌn tspiꞌyemal Dios. Ntxakakanxsen tisen jun xak wiꞌyelxix, tisenj jun wik xak diamante.

12At jun tapya tiꞌj tnom te nim tweꞌ, bix at cablaaj ttzi pwert. At juun ángel ttzi juun ttzi pwert. Tzꞌiꞌben cybi jcablaaj cyiyꞌjil aj Israel cyiꞌ kej ttzi pwert.

13At oxe ttzi pwert ttxlaj tnom te ocne, bix at oxe ttzi pwert ttxlaj tnom te cubne, bix at oxe ttzi pwert ttxlaj tnom te jawne, bix at oxe ttzi pwert ttxlaj tnom te elne.

14Bix tjakꞌ tapya at cablaaj xak te t-xeeꞌ tapya. Tzꞌiꞌben cybi kej cablaaj t-xnakꞌatz Jtal Carnel tiꞌj juun xak t-xeeꞌ tapya.

15J-ángel e yolen wuyena jun tal ptzꞌunt kꞌiꞌna tuꞌn tuꞌn tcub tmloꞌn tnom cyuyax ttzi pwert tuyax tapya.

16Junelne cykena kej cyaja plaj te tnom. Tej tcub tmloꞌn jtnom tuya ptzꞌunt, at wukak syent ajlab tkene. Junx taꞌ tweꞌ tisenx tkene tuya twitz tuya tweꞌ.

17Bix e cub tmloꞌn ángel jtapya. Oxcꞌal tuya cablaaj bara tweꞌ. Amale ángelet, pero e cub tmloꞌn tisen jun xjal.

18Ttxꞌotxꞌel jtapya tisenj xak diamante. Yaltzen te tnom, ttxꞌotxꞌel puroxsen oro, bix tisen viiyre tuꞌn tex kcyeꞌyen tuj.

19Yaltzen kej cablaaj xak ajben te tkꞌuklel tnom, e baj bint tuya juun wik xak wiꞌyelxix. Jtneel xak, diamante. Jatzen tcab xak, zafiro. Jatzen toxen xak, ágata. Jatzen tcyaaꞌn xak, esmeralda.

20Jatzen tjweꞌyan xak, ónice. Jatzen twukakan xak, cornalina. Jatzen twuukan xak, crisólito. Jatzen twajxakan xak, berilo. Jatzen tbeljajan xak, topacio. Jatzen tlajan xak, crisoprasa. Jatzen tjunlajan xak, jacinto. Bix jatzen tcablajan xak, amatista.

21Yaltzen kej cablaaj ttzi pwert, perla cytxꞌotxꞌel. Jaca juun ttzi pwert jun perla. Yaltzen ke be tuj tnom, puro oro cytxꞌotxꞌel, bix tisen viiyre, tuꞌn tex kcyeꞌyen tuj.

22Bix mintiiꞌ tja Dios e wila tuj tnom, cuma at Kman Dios te cykilca tipemal tuj, tuyax Jtal Carnel, tuꞌntzen cyjaw nimsaj.

23Mintiiꞌ il tiꞌj tuꞌn tkꞌon kꞌij bix xjaw cyken luz tuj tnom, cuma tuꞌnx tspiꞌyemal Dios bix Jtal Carnel spiꞌyenxsen taꞌ.

24Tuꞌnj spiꞌyel lu, cykilca xjal twitz txꞌotxꞌ nchicꞌajaxsen tuj cybe. Bix cykilca cawel twitz txꞌotxꞌ chi kꞌol nimbil te tnom.

25Mintiiꞌ koniyan, nuk oꞌcx kꞌij. Juꞌ tzunj, mlay chi lmet ttzi pwert.

26Cykilca xjal twitz txꞌotxꞌ cxeꞌl cykꞌoꞌn nimbil bix cykꞌinemal te tnom.

27Pero mlay tzꞌocx jun tzꞌil tuj. Min-al jun binchal il bix ka ẍtakꞌel chi oquex tuj. Nuk oꞌcx kej xjal tzꞌiꞌben cybi tuj tuꞌj Jtal Carnel tzin tkbaꞌn alcyej ma tiikꞌ tchunkꞌlal te junx maj.