1 JUAN 2 - Mam of Todos Santos -- Guatemala Unicode

Ja te Cristo jun Onel ke nyolen te kxel twitz Kman Dios

1Key wuya nim n-oc cyakꞌa weya, nxiꞌ ntzꞌiꞌbena jyol lu te cyey tuꞌntzen miꞌn chi binchana il. Pero ka ma chi binchana il, at jun Onel ke nyolen te kxel twitz Kman Dios, ja te Jesucristo. At toclen tuꞌn tyolen twitz Dios, cuma mintiiꞌ til,

2bix cuma e cyim te chojbil kil. Bix yaaꞌn nuk oꞌcx tuꞌn tlaj kil e cyim. E cyim te chojbil cyil cykilca xjal twitz txꞌotxꞌ.

3Ojtzen n-oc kbiꞌn tyol Cristo, n-eltzen kniyꞌ tiꞌjxin.

4Ka nxiꞌ tkbaꞌn jun xjal: “Ntzkiꞌna Cristo,” ka tz̈i, pero min nbint tley Cristo tuꞌn, jun ẍtakꞌ xjal. Min ma tzꞌocx yol jaxxix tuj tanem.

5Pero nuk laꞌ alcyexja jun xjal ma tzꞌoc tbiꞌn tyol Cristo, tzin tyeecꞌan ma tzket-xix tkꞌakꞌbil tcꞌuꞌj tiꞌ Dios. Tuꞌnj knimbil tiꞌ Cristo n-el kniyꞌ tiꞌj at kmojbabl kiib tuya.

6Alcyej xjal tzin tkbaꞌn junx taꞌ tuya Cristo, ilxix tiꞌj tuꞌn t-xiꞌ tiiꞌn tnaabl tisen e bint tuꞌn Cristo tej tten twitz txꞌotxꞌ.

7Key ocslal n-oc cyakꞌa weya, ja mandamyent lu yaaꞌn jun acꞌaj ley bajx cybiy, sino jun yol o cybiy te ootxa, ja jun yol o cybiy jatxe tuj tneel.

Jun acꞌaj ley

8Pero jaꞌlewe cxeꞌl ntzꞌiꞌbena cyey tiꞌj jun ley acꞌaj, jaj tuꞌn toc cyakꞌ cyuyey cyey. Ja ley lu o cyaj yeecꞌat tuꞌn Jesucristo, bix jax juꞌx cyey ma cyaj cyyeecꞌana. Tzinen taꞌ jlu, cuma nbaj tilel tyem te klolj, bix ma tzyet tyem te spiꞌyen.

9Ka at jun ocslal tzin tkbaꞌn ka nbet tuj spiꞌyen, pero n-el tiiqꞌuen juntl ocslal, lux nbet tuj klolj.

10Yaltzen te cyej ocslal n-oc takꞌ niyꞌtl ocslal cye, jatzen ocslalja nbet tuj spiꞌyen. Bix mlay jaw tzꞌak tuj tbe, tisen tej tbet tuj klolj nejl.

11Pero j-ocslal n-el tiiqꞌuen juntl ocslal, jatztzen taꞌ tuj klolj bix nbet tuj klolj. N-el tzpet tuj tbe, cuma tisen jun mos̈ tuj klolj.

12Key wuya nim n-oc cyakꞌa weya, nxiꞌ ntzꞌiꞌbena cyey cuma o najset cyila tuꞌn Dios tuꞌnj o bint tuꞌn Cristo.

13Key ocslal mas tij, nxiꞌ ntzꞌiꞌbena cyey cuma cytzkiꞌna Cristo, jaj xjal at jatxe tuj tneel. Key ocslal maa cwalx, nxiꞌ ntzꞌiꞌbena te cyey cuma ma chi xcyey tibaj taaw il.

Key ocslal n-oc cyakꞌa weya, nxiꞌ ntzꞌiꞌbena te cyey cuma ma cytzkiꞌna Kman Dios.

14Key ocslal mas tij, nxiꞌ ntzꞌiꞌbena cyey cuma cytzkiꞌna jxjal ya attl tej mitknaꞌx tbint twitz txꞌotxꞌ, ja te Cristo. Key ocslal maa cwalx, nxiꞌ ntzꞌiꞌbena te cyey cuma cyiw eteꞌy tuj cyocslabla, bix cuma nakꞌanan Dios tuj cyanema tuꞌnj tyolxin, bix cuma ma chi xcyey tiꞌj taaw il.

15Miꞌn tzꞌoc cykꞌaꞌbena tiꞌj achbil te twitz txꞌotxꞌ bix tikꞌch at twitz txꞌotxꞌ. Ka nuk oꞌcx taj jun xjal tikꞌch at twitz txꞌotxꞌ, min tzꞌoc takꞌ Kman Dios te.

16Miꞌn tzꞌoc cykꞌaꞌbena alcyej taj kxumlal bix alcyej taj tbakꞌ kwitz, bix miꞌn tzꞌoc cykꞌon cyiiba te nintzaj bix tuꞌn tcnet nimcꞌa cyuꞌna, tuꞌn tjaw nimsan cyiiba, cuma yaaꞌn junx taꞌ tkꞌakꞌbil kcꞌuꞌj tiꞌj tikꞌch at twitz txꞌotxꞌ tuya tkꞌakꞌbil kcꞌuꞌj tiꞌ Dios.

17Pjel twitz txꞌotxꞌ tuyax cykilca achbil at twitz txꞌotx. Pero tej xjal nbinchan tajbil Dios, ctemel te junx maj.

Tzul jun jawnex ẍtakꞌ xjal kꞌojlel tiꞌ Cristo

18Key wuya n-oc cyakꞌa weya, ma ko ocx cyuj mancꞌbil kꞌij. O cybiy cyuj mancꞌbil kꞌij tzul jun jawnex ẍtakꞌ xjal kꞌojlel tiꞌ Cristo. Pero ya jaꞌlewe ma chi ul jlet nim xjal ẍtakꞌ nchi kꞌojl tiꞌ Cristo. Juꞌ tzunj, n-el kniyꞌ tiꞌj o ko ocx cyuj mancꞌbil kꞌij.

19Kxol ma chi exke. Pero amale e tentke kxol, pero mintiiꞌ kmojbabl kiib cyuya. Nuket at cymojbabl cyiib kuyake, jaxitle eteꞌ kxol. Pero ma chi ex, bix juꞌ tzunj e cyyeecꞌa yaaꞌn junx eteꞌ kuya.

20Perotzen cyey, yaaꞌn tisen ejeeꞌ. Ma kꞌoj Espíritu Santo te cyey, bix cykilca key n-el cyniꞌya tiꞌj yol jaxxix.

21Juꞌ tzunj, min nxiꞌ ntzꞌiꞌbena tuꞌn tel cyniꞌya tiꞌj, cuma ma tzꞌel cyniꞌya tiꞌj yol jaxxix, bix n-el cyniꞌya tiꞌj mlay tzaj jun yol ẍtakꞌ tiꞌj yol jaxxix.

22Cxeꞌl nkbaꞌna cyey alcye xjal tzin tkbaꞌn yaaꞌn Jesús ja Scyꞌoꞌn tuꞌn Dios te cawel, jatzen ẍtakꞌ xjal. Alcye xjal tzin tkbaꞌn jlu, jatzen xjalja aj kꞌoj tiꞌj Kman Dios bix tiꞌj Tcwalxin.

23Alcyej xjal n-el tiiqꞌuen ja Cristo te Clol te, yaaꞌntzen t-xjal Kman Dios. Pero alcyej xjal tzin tkbaꞌn Tcwalte Dios ja Cristo, attzen Kman Dios tuya.

24Yaltzen cyey, cyaj tenxit tuj cyanema ja jaxxix yol e cybiy tej tpon tpocbal Cristo cyxola. Ka ma cyaj ten ja jaxxix yol tuj cyanema, attzen cymojbabl cyiiba tuya Tcwal Dios bix tuya Kman Dios.

25Bix j-o cyaj tkbaꞌn Jesucristo tuꞌn ttzaj tkꞌoꞌn ke, ja kchunkꞌlal te junx maj.

26Kej yol lu nxiꞌ ntzꞌiꞌbena cyey tuꞌn cycꞌojlan cyiiba cywitz kej ẍtakꞌ xnakꞌtzal n-oc cykꞌon cyiib tuꞌn cyel tzpeta.

27Cyey, ja Espíritu Santo e tzaj tkꞌoꞌn Jesucristo cyey at cyuyey. Juꞌ tzunj, mintiiꞌ il tiꞌj tuꞌn cytena tjakꞌ juntl wik xnakꞌtzal yaaꞌn jiquen. Nxnakꞌtzan Espíritu Santo cykilca jaxxix te cyey. Jaxxix t-xnakꞌtzbil, yaaꞌn ẍtakꞌ yol. Juꞌ tzunj, junx chi tena tuya Cristo, tisen ma txiꞌ t-xnakꞌtzaꞌn Espíritu Santo cyey.

28Key wuya nim n-oc cyakꞌa weya, jaꞌlewe cxeꞌl nkbaꞌna cyey tuꞌn cycyaj tena junx tuya Cristo, tuꞌntzen mintiiꞌ ttz̈i cyiꞌja bix mintiiꞌ cychꞌixewa twitzxin oj tul meltzꞌajxin.

29N-el cyniꞌya tiꞌj jiquenxix te Dios. Juꞌ tzunj, oj nxiꞌ tiiꞌn jun xjal tnaabl jiquenxix, n-eltzen cyniꞌya tiꞌj jatzen xjal ja tcwal Dios.