SAN MARCOS 5 - Mam of Todos Santos -- Guatemala Unicode

Jun xinak aj Gadara otk tzꞌoc biman tiꞌj(Mt. 8:28-34; Lc. 8:26-39)

1Bix iyꞌpan bajkexin juntl jlaj tnijabel aꞌ, jaaꞌ najla kej xjal aj tnom Gerasa tbi.

2Tej tzunj tetz Jesús tuj choc, bix e xiꞌ lkꞌe junxin xjal toc biman tiꞌj. Jatzen otk tzꞌetzenxin cyxol tjayel anem,

3cuma jatzen najlaxin tuj camposant. Pero tij cyiw xsunxin. Min-al juntl baꞌn tcub ẍpon texin, mitetpe tuya cadena.

4Nimxse maj e cub ẍpet tkenxin bix tkꞌabxin tuya cadena, pero oj toc cyeꞌyet-xin, otk baj ttzakaxin cadena. Min-al juntl ocx cye tiꞌjxin.

5Bix e bet-xin te kꞌijl bix te koniyan cyxol witz bixsen tuj camposant. Ns̈-in tzunxin, bix n-ocxetzen tpjun tiibxin tuya xak.

6Tej tzunj takꞌ twitzxin tiꞌj Jesús, bix e xiꞌ ajkelxin tuꞌn tpon cananxin tiꞌj Jesús. Tpon tzunxin, bix e cub majexin twitz Jesús.

7-8Bix e xiꞌ tkbaꞌn Jesús te biman najl tuj tanem jxin xjal:

—Xewbaj yuwin, ctetz tuj tanem xjala―tz̈i Jesús te biman.

Bix akꞌ biman s̈-il twitz Jesús:

—¿Titzen toclena wiꞌja, Jesús, Tcwal nintzaj Dios? Miꞌnxse chin baj tyajlaꞌna, nuksamxse Dios―tz̈i biman te Jesús.

9Bix e xiꞌ tkanen Jesús te biman:

—¿Ti tbiy?―tz̈i Jesús.

Bix aj ttzakꞌbeꞌn biman:

—Nimxse nbiya, cuma nimxse kbeta najl tuj tanem jxjala―tz̈i biman.

10Bix akꞌ biman kanl xtalbil te Jesús tuꞌn miꞌn chi ex tlojoꞌn Jesús ke biman tuj cytxꞌotxꞌ Gerasa.

11Bix attzen jun witz nka ttziiꞌ tnijabel aꞌ. Bix attzen nimjil boch nchi waaꞌn tcꞌuꞌj witz.

12Bix e xiꞌ cykanen biman te Jesús:

—Ko ttzakpiꞌcxa cyxol jil bocha, tuꞌntzen kocxa tuj cyxumlaljil―tz̈i ke biman.

13Bix e tcuya Jesús, bix etz ke biman tuj tanem jxin xjal, bix ocxke tuj cyxumlal boch. Tej tzunj cyocx biman tuj cyxumlal boch, bix e xiꞌ ajkelkejil tcꞌuꞌj witz tuꞌn cycuꞌpanjil tuj tnijabel aꞌ. Bix e jaw jikꞌbakejil. Caꞌba mil jil boch e cyim.

14Yal tzun kej xjal cylel boch, bix e xiꞌ ok ke xjal tuj tnom bix tuj cojbil te kbalte ti otk baj cye boch. Bix e xiꞌ baj ke xjal ttziiꞌ aꞌ te cyeyꞌlte ti otk baj.

15Tej tzunj cypon xjal jaaꞌ tcwaꞌ Jesús, bix oc cycyeꞌyen xjal jxin ocx najan ke biman tuj tanem, kꞌuklcꞌaxin, toc tiꞌjxin, bix baꞌntl tzunxin, mintzen s̈-intlxin. Bix e jaw seyꞌpaj ke xjal.

16Bix alkch tzunj otk tzꞌoc cyeꞌyente ti otk baj tuyaj xin xjal e najan biman tuj tanem bix ti e baj cye boch, bix akꞌkexin kbalte te juntl wik.

17Tejtzen tbaj cybiꞌn xjal, bix akꞌ ke xjal cubsal cywitz te Jesús tuꞌn texxin tuj cytanem xjal.

18Tej tzunj tocx meltzꞌaj Jesús tuj choc juntl maj, ja tzunj xin xjal otk ten biman tuj tanem, bix oc tenxin cubsal twitzxin tuꞌn t-xiꞌxin tuya Jesús.

19Pero min e tcuya Jesús, bix e xiꞌ tkbaꞌnxin:

—Cutxa tey cyxol t-xjala. Kꞌumenxse cye ti xtse Dios jay, bix ti tten s-oc kꞌaꞌben tcꞌuꞌjxin tiꞌja―tz̈i Jesús tej xin xjal.

20Bix aj jxin xjal, bix akꞌxin kbalte tuj Gerasa bix t-xol juntl tnom tuj ja lugar Lajaj Tnom tbi ti otk temaxin tuꞌn Jesús, ka otk tzꞌel tlojoꞌn Jesús ke biman tiꞌjxin. Cykilcaxse xjal e jaw kleeꞌ tiꞌjxin.

Tej tjatz itzꞌj jun txin tuj cyamecy tuꞌn tyol Jesús(Mt. 9:18-26; Lc. 8:40-56)

21Tej tzunj tpon meltzꞌaj Jesús juntl maj tujx choc juntl jlajxe tnijabel aꞌ, bix oc chmet nim xjal tiꞌjxin ttziiꞌ aꞌ.

22Texse naj hora tej tpon junxin tawil cꞌojlal jun camon jaaꞌ te xnakꞌtzabl tyol Dios, Jairo tbixin. Tpontzen cananxin tiꞌ Jesús, bix e xiꞌ t-xooꞌn tiibxin t-xeeꞌ tken Jesús,

23bix nim oc tenxin cubsal twitzxin te Jesús. Tz̈i tzunxin cyjulu:

—Chꞌix tel tanem jtxin nmeela te cablajaj jnabkꞌitxin. Quixta chꞌin wuya, bix kꞌaꞌcꞌa chꞌin tkꞌaba tibajtxin tuꞌn tul tnaabltxin bix tuꞌn titzꞌjtxin tuꞌn tipemala―tz̈itzen tawil cꞌojlal camon jaaꞌ te Jesús.

24Bix e tcuya Jesús tuꞌn t-xiꞌ tuyaxin. Tej tzunj cyxiꞌxin, nimxse xjal oc lpe cyiꞌjxin. Nimxse oc cutzꞌj Jesús cyuꞌn xjal.

25Cyxoltzen tnimal xjal e pona junxuj xuuj yaab. Otk bint cablajaj jnabkꞌi toclen weꞌ cyak aꞌ tiꞌjxuj.

26Otkxse tziyꞌxuj tuya nim kꞌanel, bix otkxse baj tpwakxuj, pero minxsetiiꞌ chꞌin otk tzꞌoc tbinche. Mastlpe otk tzakꞌ cwel bint-xuj.

27-28Cwatzen toc tbiꞌnxuj ka nim xjal n-ul tnaabl tuꞌn tipemal Jesús, bix otk pon Jesús tuj ttanemxuj, bix iyꞌ tuj tcꞌuꞌjxuj:

—Nuketle oj toc nmocoꞌn t-xbalenxin, ya tzultzen nnaabl―tz̈i tzunxuj. Bix ocx tcutzꞌen tiibxuj cyxol xjal tuꞌn toc tmocoꞌnxuj t-xbalen Jesús.

29Tej tzunj toc tmocoꞌnxuj Jesús, bix e weꞌ tyabelxuj. Biꞌxse e tnaꞌxuj ka otk tzkij tyabelxuj.

30Pero tej tzunj tel tniyꞌ Jesús tiꞌj ka tuꞌn tipemalxin otk tzula tnaabl jun xjal, bix aj meltzꞌajxin kanlte cye xjal:

—¿Al ma tzꞌoc moconte nxbalen?―tz̈i Jesús.

31Bix aj cytzakꞌbeꞌn t-xnakꞌatz Jesús:

—N-oc tcyeꞌyena ka nim xjal n-oc cutzꞌente tey. ¿Tikentzen n-oc tkanentla keya: “¿Al ma tzꞌoc moconte we?”―tz̈i ke t-xnakꞌatz Jesús.

32Pero bix oc ten Jesús cyeyꞌlec cye xjal laꞌ al otk tzꞌoc moconte texin.

33Yal tzunj xuj xuuj, otk jaw luꞌlenxuj tuꞌn ttz̈i, cuma otk tzꞌel tiiꞌnxuj tipemal Jesús tuj ewjel. Bix e xiꞌ lkꞌexuj twitz Jesús, bix e cub majexuj, bix e xiꞌ tkbaꞌnxuj tikꞌch otk baj texuj.

34Bix e xiꞌ tkbaꞌn Jesús texuj:

—Xuuj, tuꞌnxse cykil tanema wiꞌj ma tzula tnaabla. Miꞌn baj tcꞌuꞌja. Cutxey tuj ttz̈yal, cuma ma tzul tnaabla―tz̈i Jesús texuj.

35Nyolenxsete Jesús tuyaj xuj xuuj, tej cypon cab te tja jxin Jairo, bix e xiꞌ cykbaꞌn sanjel texin:

—Ma cyim tmeela. Miꞌntzen tzꞌoc tentla yajlalte Xnakꞌtzal―tz̈ikexin te Jairo.

36Pero bix e tbi Jesús cyyolxin, bix e xiꞌ tkbaꞌnxin te tawil cꞌojlal camon jaaꞌ:

—Miꞌn tzaj ttz̈i tiꞌja. Keeꞌc tcꞌuꞌja. Tzul tnaabl tmeela―tz̈i Jesús te Jairo.

37Bix akꞌ pomel canaxin tja Jairo. Pero min e tcuya Jesús tuꞌn t-xiꞌ lpe nim xjal. Nuk jacꞌa Pedro, Santiago, bix titzꞌen Santiago, Juan. Oꞌcxse xinj e tcuya Jesús tuꞌn cyxiꞌ.

38Bix e ponkexin tja tawil. Tej tzunj cyponxin tja tawil, bix oc cycyeꞌyenxin nim il nbaj, bix nchi ookꞌ xjal.

39Bix ocx Jesús tunwen, bix e xiꞌ tkanenxin cye xjal:

—¿Tikentzen nchi labaney? Min ma cyim tej txin cwala. Nuk nwutantxin―tz̈i Jesús.

40Pero nuk oc cytzeꞌn xjal tyol Jesús. Pero bix etz tlojoꞌn Jesús cykilca ke xjal peꞌn. Bix ocx tiiꞌn Jesús ke tman neeꞌ bix ke t-xnakꞌatzxin jaaꞌj tocxa neeꞌ.

41Bix e tzaj ttzyuꞌn Jesús tkꞌab jtxin cyimne, bix e xiꞌ tkbaꞌnxin te cyimne tuj cyyol xjal:

—Txin niꞌ cwal, weꞌwey―tz̈i Jesús.

42Tzinxix njaw weꞌtl naj tej txin cwal. Nakꞌtltxin betel. Bixse e jaw kleeꞌ cykil xjal.

43Bix e xiꞌ tkbaꞌn Jesús tuꞌn t-xiꞌ twatxin. Pero cyiwtzen e xiꞌ tkbaꞌn Jesús tuꞌn min jaaꞌ tzꞌoca cykbaꞌn xjal ti otk baj.